Veveheaga 69

Ko e Huhu ko Hai e Matua

KE HE galue, ne hokulo atu e fakatutalaaga ha Iesu mo e tau takitaki Iutaia. “Kua iloa e au ko e fanau a Aperahamo a mutolu,” he fakailoa e Iesu, “ka e kolo a mutolu ke kelipopo au, ha kua nakai tupu haku a kupu i loto ia mutolu. Ko au nai, kua vagahau au ke he tau mena ne kitia e au ke he Matua haku; ko mutolu foki kua eke e mutolu e tau mena ne kitia e mutolu ke he matua ha mutolu.”

Pete ni he nakai fakakite ha lautolu a matua, ne fakamahino e Iesu e kehe ha lautolu a matua mo e hana. Ne nakai mailoga a ia ne toka ke he loto ha Iesu, ti tali e tau takitaki Iutaia: “Ko Aperahamo ha mautolu a matua.” Ne logona e lautolu ko e tatai ni e tua ha lautolu mo Aperahamo, ko e kapitiga he Atua.

Ka e taha e mena, ne fakaofo e Iesu a lautolu he tali: “Kane mai ko e fanau a Aperahamo a mutolu po kua eke e mutolu e mahani a Aperahamo.” Ko e moli, ko e mena fifitaki he tama fanau hana matua. “Ka kua kolo ainei a mutolu ke kelipopo au,” he talahau e Iesu, “ko e tagata ne talahau atu kia mutolu e mena moli ne fanogonogo ai au mai he Atua, nakai eke pihia e Aperahamo.” Ti ko e mena ia ne pehe foki a Iesu: “Kua eke ni e mutolu e mahani he matua ha mutolu.”

Ne nakai la maama ia e lautolu ko hai ne tala a Iesu ki ai. Ko e mau ni a lautolu ko lautolu ko e tau fanau moli ha Aperahamo, he pehe: “Nakai ko e tau tama tohi a mautolu.” Ti ko e mena ia, ne talahau ko e tau tagata tapuaki moli tuga a Aperahamo, ne talahau fakamakamaka a lautolu: “Ne taha ha mautolu a Matua, ko e Atua haia.”

Ka ko e Atua moli kia e Matua ha lautolu? “Ane mai ko e Matua ha mutolu e Atua,” he tali e Iesu, “po kua fakaalofa mai a mutolu kia au, ha ko e mena ne hau au mai he Atua, mo e hau ki hinai, ha ko e mena foki nakai hau noa au, ka ko Ia ne fekau mai au. Ko e ha kia nakai maama ai haku a vagahau kia mutolu?”

Ko e lali a Iesu ke fakakite ke he tau takitaki lotu e fakahikuaga he ha lautolu a nakai talia a ia. Ka kua tuhi fakatonu e ia mogonei: “Ko mutolu, mai he matua ha mutolu ko e Tiapolo ti kua fia eke e mutolu e tau mena kua manako ki ai e matua ha mutolu.” Ko e matua fefe e Tiapolo? Ne fakakite e Iesu a ia ko e kelipopo tagata mo e pehe foki: “Ko e pikopiko a ia, mo e matua he pikopiko.” Ti fakaoti e Iesu: “Ko ia mai he Atua, to fanogonogo a ia ke he tau kupu he Atua; ko e mena ia nakai fanogonogo ai a mutolu, ha ko e mena nakai mai he Atua a mutolu.”

Ne ita lahi ha ko e fakafiliaga ha Iesu, ne tali e tau Iutaia: “Nakai kia tonu ha mautolu a kupu, ko e tagata Samaria a koe, to ha ha ia koe e temoni.” Ko e talahauaga “tagata Samaria” ne fakaaoga ko e talahauaga eke fakakelea mo e fakama, ko e tau tagata Samaria ko e tau tagata vihiatia he tau Iutaia.

Ne tiaki e ia nakai fanogonogo ke he talahauaga eke fakakelea hagaao ke he Samaria, ne tali e Iesu: “Nakai ha ha ia au e temoni; ka e fakalilifu au ke he haku a Matua; kua nakai fakalilifu foki a mutolu kia au.” He matutaki atu, ne taute e Iesu e maveheaga ofomate: “Kaeke ke omaoma taha ke he haku a kupu, nakai tuai iloa tukulagi e ia e mate.” Ko e moli, nakai ko e kakano a Iesu ke pehe ko lautolu oti ne mumui ki a ia to nakai mamate moli. Ka ko e kakano pehe a ia, to nakai kitia e lautolu e moumouaga tukulagi, po ke “mate ua,” ka nakai fai liu tu mai.

Ka e taha e mena, ne maama moli he tau Iutaia e tau kupu ha Iesu. Ti ko e mena haia ne pehe a lautolu: “Kua iloa tuai e mautolu ainei ha ha ia koe e temoni; kua mate a Aperahamo mo e tau perofeta, ka e pehe mai a koe, Ka omaoma taha ke he haku a kupu, ti nakai tuai iloa tukulagi e ia e mate. Kua mua kia a koe ke he matua ha mautolu, ko Aperahamo kua mate, kua mamate foki mo e tau perofeta; po ko hai kia a koe ne talahau noa ai ni e koe a koe?”

Ko e fakatutalaaga katoa nei, kua kitia mahino ko e tuhi a Iesu ke he tau tagata nei ke he mena moli ko ia ko e Mesia he maveheaga. Ka kua nakai tali fakahako ha lautolu a huhu ko hai a ia, ne pehe a Iesu: “Kaeke ke fakaheke noa au kia au, ti nakai aoga haku a fakahekeaga; ko e Matua haku ko ia ni kua fakaheke kia au, kua pehe mai a mutolu, ko e Atua ia ha mutolu. Ti nakai iloa e mutolu a ia, ka kua iloa ni e au a ia; kaeke foki ke pehe atu au, nakai iloa ni e au a ia, ti eke ai au mo pikopiko tuga a mutolu.”

He matutaki atu, ne liu a Iesu vagahau foki hagaao ki a Aperahamo ne fakamoli, he pehe: “Ko Aperahamo ha mutolu a matua ne fiafia lahi a ia kia kitia ai haku a vaha, kua kitia foki e ia, mo e kolikoli ki ai.” E, ko e tau mata he tua, ne onoono ki mua a Aperahamo ke he hauaga he Mesia he maveheaga. Ne nakai talitonu, ti tali e tau Iutaia: “Nakaila limagofulu hāu a tau tau, po kua kitia kia e koe a Aperahamo?”

“Ko e moli, ko e moli, ke tala atu e au kia mutolu,” he tali e Iesu, “ha i ai au nei, ka e nakala tupu mai a Aperahamo.” Ko e tala moli a Iesu ke he hana moui fakamua ko e tagata fakaagaga malolo he lagi.

Ne ita lahi ke he talahauaga ha Iesu ke moui fakamua ia Aperahamo, ti toto he tau Iutaia e tau maka ke tauliti aki a ia. Ka e fakamumuli a ia mo e fano ki fafo he faituga mo e nakai pakia. Ioane 8:​37-59; Fakakiteaga 3:14; 21:8.

▪ Fakakite fefe e Iesu e kehekehe e tau matua he hana a tau fi mo ia?

▪ Ko e heigoa e kakano he ui he tau Iutaia a Iesu ko e tagata Samaria?

▪ Ko e heigoa e kakano he pehe a Iesu to nakai kitia e lautolu ne mumui ki a ia e mate?