Veveheaga 70

Fakamalolo e Tagata Fanau Mai Matapouli

KO E magaaho ne lali e tau Iutaia ke tauliti maka a Iesu, ne nakai toka e ia a Ierusalema. Ko e magaaho fakamui, he Sapati, ko ia mo e hana tau tutaki ne o he maaga ti kitia e lautolu e tagata matapouli tali mai he fanau. Ne huhu e tau tutaki ki a Iesu: “Rapai na e, ko hai ne hala, ko ia nai, po ke hana tau matua? he fanau mai ai a ia mo e matapouli.”

Liga ko e talitonu e tau tutaki, tuga ni e falu rapai, ko e maeke e tagata ke hala i loto he manava he hana matua fifine. Ka e tala age a Iesu: “Nakai hala e tagata nai, po ke hana tau matua; ka kia fakailoa ai e tau gahua he Atua ia ia.” Ko e matapouli he tagata nakai ha ko e hepe pauaki po ke hala ne taute he tagata po ke hana a tau matua. Ko e hala he tagata fakamua ko Atamu ati tupu mai e nakai mitaki katoatoa he tau tagata oti, mo e ko e mena haia ne nakai katoatoa ai tuga a ia ne fanau mai mo e matapouli. Ko e kelea nei he tagata kua maeke he magaaho ia ia Iesu ke fakakite e tau gahua he Atua.

Ne peehi e Iesu e mafiti ke taute e tau gahua nei. “Ko e mena lata ke eke e tautolu e tau gahua hana ne fakafano mai au, he aho,” he talahau e ia. “Ka hoko ke he po, ti nakai maeke ia taha ke gahua ai. Ko au ko e maama he lalolagi, he nofo au ke he lalolagi.” To nakai leva ko e mate ha Iesu ke tuku a ia ke he pouli he tukuaga ti nakai maeke ia ia ke taute ha mena taha. Ka ko e magaaho ia, ko ia e punaaga he maama he lalolagi.

Ne mole he vagahau e ia e tau mena ia, ti anu a Iesu ke he kelekele ti laku aki e anu e pelapela. Ne tuku e ia e mena nei ke he tau mata he tagata matapouli mo e pehe: “Fano a, holoholo ke he takeleaga i Siloa.” Ne omaoma e tagata. Mo e he magaaho ne taute e ia pihia, ne maeke ia ia ke kitia! Ko e fiafia ha a ia hana he liu mai, ha kua kitia fakamua la ia a ia he tali mai he fanau!

Ne ofomate a lautolu ko e tau katofia mo e falu foki ne iloa a ia. “Ka e nakai kia ko ia hanai ne nofo mo e kaiole?” he huhu e lautolu. “Ko ia hanai,” he tali he falu. Ka e nakai talitonu he falu: “Tuga a ia ni.” Ka e pehe ai e tagata: “Ko au ni hanai.”

“Po ke fakaala fefe hau a tau mata?” he manako e tau tagata ke iloa.

“Ko e taha tagata, ne higoa ko Iesu, ne eke e ia e pelapela, mo e goigoi aki haku tau mata, ti pehe mai a ia kia au, Fano a ke he takeleaga i Siloa, mo e holoholo ai a koe. Ati fano ai au, mo e holoholo ai, ti ala ai au.”

“Ti ko e fe e tagata ia?” he huhu e lautolu.

“Nakai iloa e au,” he tali e ia.

Ko e tau tagata he magaaho ia ne takitaki e tagata ne matapouli he magaaho fakamua ke he ha lautolu a tau takitaki lotu, ko e tau Farasaio. Ne huhu foki e lautolu nei ko e maama fefe hana tau mata. “Ne tuku mai e ia e pelapela ke he haku a tau mata, ti holoholo ai e au, ti kua ala tuai au.” He fakamaama he tagata.

Ko e moli, kua lata e tau Farasaio ke fiafia mo e tagata kaiole kua malolo! Ka ko e mena ne tupu, ne ekefakakelea e lautolu a Iesu. “Nakai ko e tagata mai he Atua a ia,” he talahau e lautolu. Ko e ha ne talahau pihia a lautolu? “Ha ko e mena nakai omaoma e ia ke he Sapati.” Mo e taha e mena ko e falu a Farasaio ne manamanatu: “Kua maeke kia he taha tagata hala ke eke e tau fakamailoga pehena?” Ti ha ha ia lautolu e femaveheveheaki.

Ti ko e mena ia, ne huhu a lautolu ke he tagata: “Po ke heigoa hau a talahau kia ia, he fakaala e ia hau a tau mata?”

“Ko e perofeta ni a ia,” he tali e ia.

Ne nakai talia he tau Farasaio ke talitonu ke he mena nei. Ne iloa tonuhia e lautolu ko e liga ko e fai mena galo ne talia e Iesu mo e tagata nei ke fakavai aki e tau tagata. Ti ke fakatonu aki e tala, ne hea e lautolu e tau matua he tagata kaiole ke maeke ke huhu ki a laua. Ioane 8:59; 9:​1-18.

▪ Ko e heigoa e tuaga ati pouli e tau mata he tagata, mo e ko e heigoa ne nakai?

▪ Ko e heigoa e po ne nakai maeke he tagata ke gahua?

▪ Ko e magaaho ne fakamalolo e tagata, ko e heigoa e talahauaga ha lautolu ne iloa a ia?

▪ Mavehevehe fefe e tau Farasaio ha ko e tagata ne fakamalolo?