Veveheaga 78

Kia Nonofo Tauteute!

NE MOLE e hataki ke he moto tagata hagaao ke he velevelemena, mo e puipui mai hana tau tutaki hagaao ke he manako lahi ke he tau mena he tino, ne fakamalolo e Iesu: “Ua matakutaku a koe e fuifui mamoe gahoa na e; ha ko e mena finagalo ha mutolu a Matua ke foaki mai e kautu kia mutolu.” Ti ko e mena ia ne fakakite e ia ko e numera tote (ne iloa he magaaho fakamui ko e 144,000) ka ha ha i ai he Kautu he lagi. Ko e laulahi ha lautolu ka moua e moui tukulagi ko e tau tagata he lalolagi i lalo hifo he Kautu.

Ko e mena fakaalofa mitaki lahi ha ia, “e kautu”! He fakamaama e tali hako nukua lata he tau tutaki ke moua aki, ne fakamalolo e Iesu a lautolu: “Kia fakafua atu e mutolu ha mutolu a tau mena, ti age ai e mutolu e tau mena fakaalofa noa.” E, kua lata ia lautolu ke fakaaoga ha lautolu a tau koloa ke fakamonuina aki e falu fakaagaga mo e ati hake e “koloa he lagi nakai tuai oti.”

Ne fakalaga e Iesu hana tau tutaki ke mautali tumau ke he hana a liu haele mai. Ne pehe a ia: “Kia pipi ha mutolu a tau tokupu, kia puho foki ha mutolu a tau lamepa; ko mutolu foki, kia tuga e tau tagata a mutolu ne talifaki atu ke he iki ha lautolu, ato liu mai a ia he kaiaga mena; ka hau a ia mo e tukituki mai, ti vevete mai agataha e lautolu e puhala kia ia. Uhoaki e tau fekafekau ia, ka moua mai a lautolu he iki ka hau, ha ne mataala agaia, Ko e moli, ke tala atu e au kia mutolu, to pipi e Ia a ia, ti tala age kia lautolu ke takoto ke kai mena, ti fina age ni a ia, mo e fekafekau kia lautolu.”

He fakataiaga nei, ko e mautali he tau fekafekau ke he liu haele mai he ha lautolu a iki kua fakakite mai he ha lautolu a toto hake he ha lautolu a tau tapulu loloa mo e pipi ke he tau tokupu mo e ha lautolu a tumau ke he tau gahua ke lakafia atu ke he po mo e maama ke he tau moli puke lolo. Ne fakamaama e Iesu: “Kaeke ke hau a ia ke he leoleoaga ne ua he po [mai he matahola hiva he afiafi ke he tuloto po], po ke hau ke he leoleoaga ne tolu he po [mai he tuloto po ke he matahola tolu he pogipogi], ka moua a lautolu ka kua pihia uhoaki e tau fekafekau ia.”

Ne taui he iki hana a tau fekafekau ke he puhala kehe lahi. Ne taute e ia a lautolu ke tatakoto ke he laulau mo e kamata ke fekafekau ki a lautolu. Ne taute e ia a lautolu, nakai ko e tau fekafekau, ka ko e hana a tau kapitiga fakamoli. Ko e taui mitaki ha ia ma e ha lautolu a matutaki tumau ke gahua ma e ha lautolu a iki ke he po katoa ka e fakatali ke he hana a liu mai! Ne fakahiku e Iesu: “Hanai, kia nonofo tauteute a mutolu; ha ko e magaaho nakai manatu ai e mutolu ke hau ai e Tama he tagata.”

Ne huhu mogonei a Peteru: “Ko e Iki na e, kua tala mai kia e koe e fakatai na kia mautolu, po ke tau tagata oti?”

Ne nakai tali fakahako, ka e talahau foki e Iesu e taha fakatai. “Ko hai foki e fekafekau pule,” he huhu e ia, “to kotofa a ia he hana iki ke pule ke he hana tau fekafekau, mo e age kia lautolu e tau mena kai ke he tau magaaho? Uhoaki e fekafekau ia, ka hau hana iki ti moua e ia ha ne eke pihia. Ko e moli, ke tala atu e au kia mutolu, to kotofa e Ia a ia ke pule ke he hana tau mena oti.”

Ko e “iki” ne fakamahino moli ni ko Iesu Keriso. Ko e “fekafekau pule” ne fakatino e “fuifui mamoe gahoa” he tau tutaki ko e tino katoa mo e “tau fekafekau” ne hagaao foki ke he matakau taha nei he 144,000 ka moua e Kautu he lagi, ka e fakamahao e talahauaga nei ke he tau gahua ha lautolu takitokotaha. Ko e hana “tau mena oti” ne kotofa e fekafekau pule ke leveki ko e tau mena fakapatuiki he iki ke he lalolagi, ne putoia ai foki a lautolu he lalolagi i lalo hifo he Kautu.

Ne matutaki e fakatai, ne tuhi a Iesu ke he liga nakai fakamoli oti a lautolu e vahega fekafekau pule, po ke tupa, he fakamaama: “Kaeke foki ke pehe hifo e fekafekau ia ke he hana loto, To fakamule mai hoku iki; ti kamata ai a ia ke fahi e tau fekafekau tane mo e tau fekafekau fifine, ti kai, mo e inu, mo e konahia. To hau ni e iki he fekafekau ia ke he aho nakai tatali atu ai a ia . . . ; ti fakahala lahi ai e ia a ia.”

Ne mailoga e Iesu ko e hana a hau ne ta mai e magaaho vela kaka ma e tau Iutaia, ha kua talia he falu ka e totoko he falu hana tau fakaakoaga. Ne molea e tolu tau fakamua, he papatiso a ia ke he vai, ka ko e mogonei ko e hana papatiso ke he mate kua tata lahi mahaki ke he fakahikuaga, mo e pehe hana a talahauaga: “Kua mamahi lahi ni au ato fakahiku ai.”

Ha kua mole he vagahau e tau kupu nei ke he hana tau tutaki, ne liu a Iesu vagahau ke he moto tagata. Ne tagi aue a ia ke he ha lautolu a ulu kafilo ke nakai talia e tau fakamoliaga mahino ke he hana a puna maiaga mo e hana kakano. “Ka kitia e mutolu e aolagi ha ne hake mai i luluga,” he kitia e ia, “ti tala age agataha e mutolu, Ko e uha ha ne hau; ti fakamoli ai foki. Ka agi mai e matagi toga, ti tala age a mutolu, Ko e la ha ne fai; ti fakamoli ai foki. Ko e tau tagata fakavai na e, kua iloa e mutolu ke mailoga e mahani he lagi, mo e lalolagi; ka ko e ha kua nakai mailoga ai e mutolu e kakano he vaha nai?” Luka 12:​32-59.

▪ Toko fiha a lautolu ko e “fuifui mamoe gahoa,” mo e ko e heigoa ha lautolu ka moua?

▪ Peehi fefe e Iesu e lata he hana tau fekafekau ke nonofo tauteute?

▪ He fakatai ha Iesu, ko hai e “iki,” ko e “fekafekau pule,” ko e “tau fekafekau,” mo e “tau mena oti”?