Tau Hūhū he Tau Tagata Totou
Ko e ha ne maeke a Iesu ke tala age ke he fifine ne talahaua he agahala kua fakamagalo tuai haana tau hala?—Luka 7:37, 48.
He takoto a Iesu ke kai mena ke he fale he Farasaio ne higoa ko Simona, ne ‘tu e fifine ki tua he tau hui ha Iesu.’ Ne fakahihina hifo e ia e tau hihina mata haana ke he tau ve ha Iesu ti holoholo aki e tau lauulu haana. Ti figita he fifine e tau ve haana mo e fakatākai aki e magalolo manogi. Ko ia “ko e fifine he māga, ko e fifine hala,” he talahau he tala he Evagelia. Mooli, na agahala oti e tau tagata nakai mitaki katoatoa, ka e fa fakaaoga he tau Tohiaga Tapu e kupu nei ke fakamaama e tagata ne kelea muitui e tau agahala po ke talahaua he mahani agahala. Liga ko e fifine fakataka a ia. Ne pehē a Iesu ke he tagata pihia: “Kua fakamagalo tuai hau a tau hala.” (Luka 7:36-38, 48) Ko e heigoa e kakano he tau kupu ia ha Iesu? Ha kua nakaila foaki ia e poa lukutoto, maeke fēfē e fakamagaloaga nei?
He mole e holoholo mo e fakatākai he fifine e tau hui ha Iesu ka e ato fakamagalo e Iesu a ia, ne fakaaoga e Iesu e fakataiaga ke fakamaama e manatu aoga ke he tagata he kaina, ko Simona. He fakatatai e agahala ke he kaitalofa lahi mahaki ne nakai maeke ke totogi, ne pehē a Iesu ki a Simona: “Ko e tokoua [e] tagata ne ogo tupe [po ke, kaitalofa] mai a laua he taha tagata; ne ogo taha lima geau a tenari, ka e limagofulu he taha. Ti kua nakai fai tupe a laua ke liuaki, ti fakamagalo noa atu ai a ia kia laua tokoua. Tala mai a koe, po ko hai taha ia laua ne lahi hana fakaalofa kia ia?” He tali ne pehē a Simona: “Na ko ia ni ne fakamagalo atu ki ai e tau mena loga.” Ne tali e Iesu: “Ko e moli a koe.” (Luka 7:41-43) Kua lata ia tautolu oti ke omaoma ke he Atua, ti ka nakai omaoma a tautolu ki a ia mo e agahala foki, kua kaumahala a tautolu ke totogi ke he Atua e tau mena kua lata mo ia. Ati lahi fakahaga e kaitalofa ha tautolu. Ka kua tuga e tagata foaki tupe a Iehova ne makai ke fakamagalo e tau kaitalofa. Kakano haia ati fakamafana e Iesu e tau tutaki haana ke liogi ke he Atua mo e ole: “Kia fakamagalo e koe kia mautolu ha mautolu a tau hala, tuga a mautolu ne fakamagalo atu kia lautolu ne eke fakakelea mai kia mautolu.”—Mata. 6:12.
Ko e tau tuaga fe ne fakamagalo e Iehova e tau agahala he vahā fakamua? Ne poaki he fakafili tonu mitaki katoatoa haana, kua lata ke fakahala mate ka agahala. Ti totogi e Atamu e agahala haana aki e moui haana ni. Ka e i lalo he Fakatufono ne age he Atua ke he motu ko Isaraela, ne maeke e tau agahala he tagata holifono ke fakamagalo he poa e manu ki a Iehova. Ne talahau he aposetolo ko Paulo: “Toe tote foki e tau mena oti kana kua fakamea ai ke he toto kua lata mo e fakatufono; kaeke foki kua nakai fakamaligi mai e toto, ti nakai fai fakamagaloaga.” (Hepe. 9:22) Ne nakai iloa he tau Iutaia ha puhala foki ke moua e fakamagaloaga mai he Atua. Ti nakai ofo mogoia he totoko he tau tagata kitekite he vahā ha Iesu e mena ne tala age e ia ke he fifine. Ko lautolu ne tatakoto ke kai mena mo Iesu ne pehē hifo ke he tau loto ha lautolu: “Ko hai foki hanai kua fakamagalo e tau hala?” (Luka 7:49) Ti fakavē ke he heigoa e fakamagalo he tau holifono he fifine agahala lahi nei?
Ne tutala e perofetaaga fakamua he mole e totoko he hoa fakamua ke he finagalo ha Iehova ke fakatū hake e “tega” ka tatuki e Satani mo e haana “tega” e muihui. (Kene. 3:15, NW) Ne fakahoko e tatuki nei he magaaho ne kelipopo he tau fī he Atua a Iesu. (Kala. 3:13, 16) Ko e toto ha Iesu ne liligi ne eke mo lukutoto ka fakatokanoa e tau tagata mai he agahala mo e mate. Ha kua nakai fai mena ke taofi a Iehova he fakamooli e mena ne finagalo a ia ke taute, ti nakai leva e talahau e tau kupu ne fakamau he Kenese 3:15, tuga kua fitā e lukutoto he totogi ke he onoonoaga he Atua. Kua maeke a ia mogonei ke fakamagalo a lautolu ne fakagahua e tua ke he tau maveheaga haana.
He tau vahā ato faka-Kerisiano, ne talahaua e tokologa ki a Iehova ke tututonu. Falu ia lautolu ia ko Enoka, Noa, Aperahamo, Raava, mo Iopu. Ha ko e tua, ne amaamanaki a lautolu ke fakamooli e tau maveheaga he Atua. “Ne tua [a] Aperahamo ke he Atua, ti talahaua [ai] kia ia mo tututonu,” he tohia he tutaki ko Iakopo. Hagaao ki a Raava, ne pehē a Iakopo: “Kua pihia foki a Raava ko e fifine fakataka, kua nakai kia talahaua tututonu a ia ha ko e tau gahua?”—Iako. 2:21-25.
Ko e Patuiki ko Tavita i Isaraela i tuai ne loga e agahala ne taute, ka kua malolō e tua haana ke he Atua mooli ti fakakite e fakatokihala moolioli he tau magaaho takitaha. Lafi ki ai, ne pehē e tau Tohiaga Tapu: “Ko [Iesu] ne tuku mai i mua he Atua mo poa ke fakalotomafola ai ke he tua, ke he hana toto; kia fakakite mai ai hana tututonu he nakai taui atu e ia e tau hala kua mole atu, ha ko e fakauka he Atua. Kia fakakite mai foki e tututonu hana ke he vaha nai, kia iloa ai a ia ko e tututonu, mo e talahaua tututonu e ia e tagata kua tua kia Iesu.” (Roma 3:25, 26) He fakavē ke he poa lukutoto ha Iesu ka foaki he vahā i mua, kua maeke a Iehova ke fakamagalo e tau holifono ha Tavita ka e nakai fakahui e tau tuaga Haana ma e fakafili tonu.
Maaliali ai, kua pihia foki e tuaga he fifine ne fakatākai e tau hui ha Iesu. Ne moui mahani feuaki a ia, ka kua fakatokihala tuai a ia. Kua mailoga e ia e latatonu haana ke laveaki mai he agahala ti fakakite ke he tau gahua haana kua loto fakaaue mooli a ia ke he tagata ne puhala mai e Iehova e laveakiaga ia. Pete he nakaila taute, ko e poa ia kua mooli lahi ati maeke ai ke fakagahua ke he tau tagata tuga e fifine nei. Ko e mena ia, ne tala age a Iesu ke he fifine: “Kua fakamagalo tuai hau a tau hala.”
Kua fakakite fakamaaliali he tala nei, ne nakai tiaki e Iesu e tau tagata agahala. Ne taute e ia e mitaki ma lautolu. Lafi ki ai, kua makai a Iehova ke fakamagalo e tau tagata agahala kua fakatokihala. Ko e fakamafanaaga homo ue atu mo e fakamalolō ha ia ma tautolu ko e tau tagata nakai mitaki katoatoa!
[Fakatino he lau 7]
Ne talahaua ai ki a lautolu mo tututonu