Veveheaga 113

Mahani Fakatokolalo ke he Paseka Fakahiku

KO PETERU mo Ioane, ha kua fakaako e Iesu, kua fita he hohoko ki Ierusalema ke tauteute e tau mena ke lata mo e Paseka. Ka ko Iesu, fakalataha mo e tokohogofulu foki e falu aposetolo, ne hohoko fakamui la ia he pale la. Kua to e la he mapualagi he magaaho ne o hifo mai a Iesu mo e hana matakau he Mouga ko Olive. Ko e kitia fakahiku a ia ha Iesu he maga he aho ia he ono hifo mai he mouga ato mole hana liu tu mai.

Ne nakai leva ti hohoko a Iesu mo e hana matakau ke he maga mo e o atu ke he kaina ka fakamanatu ai e Paseka. Ne toli hake a lautolu he tau sitepe ke he poko lahi tapa ki luga, ke he mena kua tauteute katoatoa ke lata mo e fakamanatuaga he Paseka hoko lautolu ni. Ne amaamanaki lahi a Iesu ke he magaaho nei, he pehe a ia: “Ko e haku a manako, ti lahi ni haku manako ke kai fakamua e paseka nai mo mutolu, ka e nakala hoko ke he haku a matematekelea.”

Ko e aga mo e mahani, ko e fa e kapiniu uaina ka inu e lautolu ka fakalataha ke he Paseka. He oti e kapiniu ke toluaki, ne fakaaue a Iesu mo e pehe: “Kia toto a e mutolu e mena nai, mo e tufatufa age kia mutolu; ha ko e mena tala atu e au kia mutolu, nakai tuai inu ni au ke he fua vine, ato hoko mai e kautu he Atua.”

Ko e taha magaaho ke he ha lautolu a kai, ne matike a Iesu, kua tuku kehe hana tau tapulu, kua toto e tauela, mo e fakapuke e pa holoholo aki e vai. Ko e mena fa mahani ai ke holoholo e ia he kaina e tau hui ha lautolu ne uiina. Ka ko e magaaho nei, ne nakai ha ha i ai a ia he kaina, ne taute ni e Iesu e matagahua nei. Ko e taha mai ni he tau aposetolo kua lata ke taute e gahua nei; ka e taha e mena, kua maali e kakano ha kua ha ha agaia ni e taufetoko ia lautolu, ti nakai fai ne taute. Kua fuafuakelea a lautolu he magaaho nei he kamata a Iesu ke holoholo ha lautolu a tau hui.

Ko e magaaho ne hoko a Iesu ki a ia, ne totoko a Peteru: “Nakai holoholo e koe haku a tau hui tukulagi.”

“Kaeke ke nakai holoholo e au a koe ti nakai fai mena a koe fakalataha mo au,” he talahau e Iesu.

“Ko e Iki na e,” he tali e Peteru, “aua neke kuenaia ko e tau hui haku, ka ko e tau lima foki haku, katoa mo e hoku ulu.”

“Ko ia kua koukou,” he tali e Iesu, “nakai aoga kia ia ke holoholo ka koe tau hui hokoia, ti kua mea oti a ia; kua mea foki a mutolu, ka e nakai ko mutolu oti kana.” Ne talahau e ia e mena nei he iloa e ia ko e tauteute a Iuta Isakariota ke afo a ia.

Ko e magaaho ne holoholo oti e Iesu e tau hui he toko 12, fakalataha foki mo e tau hui he hana tagata ka afo a ia, ko Iuta, ne toto e ia hana tau tapulu mo e liu foki takoto ke he laulau. Ko e magaaho ia ne huhu e ia: “Kua iloa nakai e mutolu e mena kua eke e au kia mutolu? Kua tokutoku mai e mutolu au, ko e Akoako mo e Iki; ti kua mitaki ha mutolu ne talahau mai, ha ko au ni haia. Hanai, kaeke foki ko e Iki au, mo e Akoako, ti holoholo ni e au e tau hui ha mutolu; kua lata ia mutolu ke feholoholoaki ha mutolu a tau hui. Ha kua ta atu e au e fakafifitaki kia mutolu, kia tuga he eke e au kia mutolu, kia eke pihia ni e mutolu. Ko e moli, ko e moli, ke tala atu e au kia mutolu, nakai mua e fekafekau ke he hana iki; ti nakai ni mua e fekau kia ia ne fakafano a ia. Kaeke kua iloa e mutolu e tau mena nai, uhoaki a mutolu kaeke kua eke e mutolu.”

Ko e fakaakoaga fulufuluola ha a ia he fekafekauaga fakatokolalo! Kua nakai lata he tau aposetolo ke kumi tuaga tokoluga, mo e manamanatu kua aoga lahi a lautolu ke fekafekau tumau e falu ki a lautolu. Kua lata ia lautolu ke mumui tua ke he fakafifitakiaga ne fakatoka e Iesu. Nakai ko e holoholo e tau hui a nei ko e aga mo e mahani. Nakai, ka ko e fiafia ke fekafekau ke he falu mo e nakai fai mahalohaloaga, pete ni he liga tokolalo po ke kelea e gahua. Mataio 26:​20, 21; Mareko 14:​17, 18; Luka 22:​14-18; 7:44; Ioane 13:​1-17.

▪ Ko e heigoa e mena ne kehe lahi hagaao ke he kitiaaga ha Iesu ki a Ierusalema he hu atu a ia ke he maga ke fakamanatu e Paseka?

▪ Ke he Paseka, ko e kapiniu ha ne age e Iesu ke he tau aposetolo toko 12 he oti e fakaaue hana?

▪ Ko e heigoa e mena ne fa mahani mo e aga ki ai ka taute age ki a lautolu ne uiina he vaha ne moui a Iesu ke he lalolagi, mo e ko e ha ne nakai fai mena pihia ne taute ke he Paseka ne fakamanatu e Iesu mo e tau aposetolo?

▪ Ko e heigoa e kakano he taute e Iesu e gahua tokolalo ke holoholo e tau hui he hana tau aposetolo?