Veveheaga 130

Ha ha he Tahi i Kalilaia

KO E tau aposetolo he magaaho nei kua liliu ki Kalilaia, tuga ni he tala age e Iesu fakamua ki a lautolu ke taute. Ka e fakauaua a lautolu ke he mena ke taute e lautolu i ai. Ka e nakai leva, ti tala age a Peteru ki a Toma, Natanielu, Iakopo mo e hana matakainaga ko Ioane, mo e tokoua foki he tau aposetolo: “Ko e fano ne fai au ke takafaga.”

“Ke o foki a tautolu mo koe,” he tali age he tokoono.

Ko e po katoa ia, ne kaumahala a lautolu ke moua ha mena. Ka e taha e mena, ko e magaho ne teitei ke aho, ne kitia a Iesu he mataafaga, ka e nakai iloa he tau aposetolo ko Iesu a ia. Ne hea a ia: “Ma fanau na e, fai kina nakai a mutolu?”

“Nakai,” he tauhea mai e lautolu he vai.

“Ati liti a e kupega ke he fahi katā he vaka, to moua ai e mutolu,” he hea e ia. Ko e magaaho ne taute e lautolu pihia, ne nakai maeke ia lautolu ke toho hake e kupega ha ko e tau ika kua loga lahi.

“Ko e Iki haia,” he ui e Ioane.

He logona e mena nei, ti tui ai e Peteru hana tapulu luga, ha ko e mena kua aki hana tapulu, mo e hopo ni ki tahi. Ne kakau a ia liga ke he 90 e mita ki uta. Ne mumui e falu aposetolo he vaka tote, mo e toho e kupega kua puke he tau ika.

Ko e magaaho ne hohoko a lautolu ki uta, kua ha ha i ai e afi malala ne fakatoka ai e ika, mo e areto. “Ta mai a e falu a ika ne moua mai nai e mutolu,” he talahau e Iesu. Ne liu a Peteru ke he vaka mo e toho mai e kupega ki uta. Ne ha ha i ai 153 e tau ika lalahi!

“O mai a, ke kai mena,” he uiina e Iesu.

Ne nakai fai ia lautolu ne malolo ke huhu, “Ko hai kia a koe?” ha ko e mena iloa oti e lautolu ko Iesu. Ko e fakakite mai ke laga fituaki a nei hana he mole e liu tu mai, ka e lagatolu aki ke he tau aposetolo, ko e matakau. Ne taute e ia e kai pogipogi, mo e tufa ki a lautolu takitokotaha e falu areto mo e ika.

Ko e magaaho ne oti e kai ha lautolu, ne liga ono a Iesu ke he tau ika loga ne moua, mo e huhu ki a Peteru: “Ma Simona na e, ko e tama a Iona, kua mua nakai hau a fakaalofa kia au kia lautolu nei?” Ne nakai fakauaua hana kakano, Kua piki lahi kia a koe ke he feua takafaga ika ka e nakai ke he gahua ne tauteute e au a koe ke gahua ki ai?

“Kua fioia e koe, kua fakaalofa au kia koe,” he tali e Peteru.

“Kia fagai e koe haku a tau punua mamoe,” he tali e Iesu.

Ne liu foki huhu ke lagaua aki: “Ma Simona na e, ko e tama a Iona, kua fakaalofa mai nakai a koe kia au?”

“E, ma Iki na e, kua fioia e koe kua fakaalofa au kia koe,” he tali fakamakamaka atu e Peteru.

“Kia leveki e koe haku a tau mamoe,” he poaki foki e Iesu.

Ne liu foki ke lagatolu aki he huhu a ia: “Simona na e, ko e tama a Iona, kua fakaalofa mai nakai a koe kia au?”

Ka ko e magaaho nei kua momoko a Peteru. Liga kua manamanatu a ia kua fakauaua kia a Iesu ke he hana a mahani fakamoli. Ha ko e mena fakatikai lagatolu e Peteru a ia he magaaho ne fakafili a ia ke he hana moui. Ati pehe ai a Peteru: “Ma Iki na e, kua fioia e koe e tau mena oti kana, kua fioia e koe kua fakaalofa ni au kia koe.”

“Kia fagai e koe haku a tau mamoe,” he poaki e Iesu ke lagatolu aki.

Ne fakaaoga e Iesu a Peteru mo fakaakoaga ke he falu ke peehi fakalahi e gahua ne finagalo a ia ke taute e lautolu. To nakai leva ti toka e ia e lalolagi, mo e manako a ia ke takitaki e lautolu e gahua fakamatala ki a lautolu ka futiaki mai ke he fuifui mamoe he Atua.

Tuga ni a Iesu ne lili mo e kelipopo he taute e ia e gahua ne kotofa he Atua ke taute e ia, ti ko e mena haia ne fakakite e ia he magaaho nei, to matematekelea a Peteru ke he mena taha pihia foki. “Ke he hau a fuata,” he tala age e Iesu, “kua pipi ni e koe a koe, mo e faifano ke he tau mena ne loto a koe ki ai; ka fuakau a koe, to fakaolo atu e koe hau a tau lima, to lili foki a koe he taha tagata, mo e uta a koe ke he mena nakai manako a koe ki ai.” Pete ni kua fakatali mai e mate fakamaturo ki a Peteru, ne fakamalolo e Iesu a ia: “Kia mui mai a a koe kia au.”

Ne fuluhi viko, ti kitia e Peteru a Ioane mo e huhu: “Ko e Iki na e, po ke eke fefe a ia nai?”

“Kaeke ke loto au ke tumau a ia ato hau au,” he tali e Iesu, “to ku e mena ia kia koe? kia mui mai a koe kia au.” Ko e tau kupu nei ha Iesu ne maama he tokologa he tau tutaki ke pehe, to nakai mate e aposetolo ko Ioane. Ka e taha e mena, tuga ni he fakamaama mai he aposetolo ko Ioane he magaaho fakamui, ne nakai talahau e Iesu ke pehe to nakai mate a ia, ka e pehe a Iesu: “Kaeke ke loto au kia tumau a ia ato hau au, to ku e mena ia kia koe?”

Ne mailoga foki e Ioane he magaaho fakamui: “Ko e falu a mena loga foki ne eke e Iesu; kaeke ke tohi kia oti kana, kua manatu au nakai maeke he toka ai ke he lalolagi e tau tohi ia ka tohi.” Ioane 21:​1-25; Mataio 26:32; 28:​7, 10.

▪ Ko e heigoa ne kitia ai ko e fakauaua e tau aposetolo ke he mena ha lautolu kua lata ke taute i Kalilaia?

▪ Iloa fefe he tau aposetolo ko Iesu he Tahi i Kalilaia?

▪ Ko e lagafiha ia he fakakite a Iesu tali mai he hana liu tu mai?

▪ Peehi fefe e Iesu e manako hana ke taute he tau aposetolo?

▪ Fakakite fefe e Iesu e puhala ka mate ai a Peteru?

▪ Ko e heigoa e talahauaga ha Iesu hagaao ki a Ioane ne nakai maama he tokologa he tau tutaki?