Fakaaoga e “Hafagiaga ke he Kupu he Atua”—Ke Kamata e Fakatutalaaga
1. Ko e heigoa e puhala foou kua moua e tautolu ma e gahua he fonua?
1 Ko e fufuta fakafoou he New World Translation ne ha ha ai e faahi he kamataaga ne fakahigoa “Hafagiaga ke he Kupu he Atua.” Fakaaoga fēfē e tautolu e puhala foou nei ka tauteute e tau fakatātāaga ma e gahua he fonua? He tuku auloa e faahi nei he tau kupu tohi i lalo he tau matakupu kehekehe he Tohi Tapu, pihia foki e puhala ne taute e tohi Reasoning, to aoga lahi ai ke kamata e tau fakatutalaaga.
2. To fakaaoga fēfē e tautolu e “Hafagiaga ke he Kupu he Atua” he gahua he fonua?
2 Liga fakaaoga e koe e hūhū 8 ti pehē: “Kua ahiahi kū mai a maua ke he tau tuutakaina ha kua tokologa e tagata ne manamanatu, ‘Matematekelea kia e tau tagata ha ko e Atua?’ [He falu matakavi, kua lauia mitaki ke fakakite e hūhū ke he tagata he kaina.] Ko e heigoa e manatu haau? [Fakaatā ma e tali.] Foaki he Tohi Tapu e tali makona ke he hūhū ia.” Totou fakahako ti fakatutala taha po ke loga e kupu tohi mai he Tohi Tapu. Ka fiafia e tagata he kaina, maeke ia koe ke fakakite ki a ia 20 e hūhū ne haia he hafagiaga ti tala age ki a ia ke fifili taha ke fakatutala ka liu ke ahiahi atu. Po ke maeke a koe ke foaki taha he tau tohi fakaako ha tautolu ne loga e vala tala ke he matakupu ne fakatutala laia mua ki ai.
3. Maeke fēfē a tautolu ke fakaaoga e “Hafagiaga ke he Kupu he Atua” ke kamata e tau tutalaaga he tau matakavi ne ha ha i ai e tau tagata ne fakalataha ke he lotu nakai Kerisiano?
3 Liga aoga pauaki e tau hūhū 4 mo e 13 ke hoko ke he 17 ka fakamatala ke he tau matakavi ne ha ha i ai e tau tagata ne fakalataha ke he lotu nakai Kerisiano. Ma e fakatai, liga fakaaoga e koe e vala tala mai he hūhū 17 ti pehē: “Ahiahi fakakū mai a mautolu ha ko e gahua ke lata mo e tau magafaoa. Talia nakai e koe kua loga lahi mahaki e tau lekua kua fehagai e tau magafaoa ki ai he vahā nei? [Fakaatā ma e tali.] Tokologa e hoa ne moua e aoga he tau kupu iloilo nei: “Ko e fifine kia fakalilifu a ia ke he hana tane.” [Nakai lata a koe ke talahau na moua mai e manatu nei he Efeso 5:33. Ka tutala a koe ke he fifine, liga talahau e koe e tau kupu ia Efeso 5:28.] Manatu nakai a koe ko e fakagahua he fakatonuaga ia to aoga ke he fakamauaga?”
4. Liga ko e heigoa haau ka taute he matahiku he tutalaaga haau mo e tagata ne ha ha i ai ke he lotu nakai Kerisiano?
4 He matahiku he tutalaaga ha mua, taute e tau fakatokaaga ke matutaki e fakatutalaaga he taha magaaho foki. Liga pulega a mua ke tutala hagaao ke he taha kupu tohi foki mai he hūhū ne fakaaoga e koe. He mogo kua latatonu, tala age ke he tagata he kaina ko e tau kupu iloilo ne kua talahau e koe ki a ia na mai he Tohi Tapu. Fakavē ke he tau tutalaaga fakamua ha mua mo e onoonoaga he tagata ke he Tohi Tapu, foaki e tohi kua manatu a koe to manako a ia ki ai.—Kikite uho he Ha Tautolu a Fekafekauaga he Kautu ia Tesemo 2013.