To Fakaheke Tukulagi he Tau Tagata Tututonu e Atua
“Nakai nimo tukulagi e tagata tututonu . . . To tumau tukulagi hana tututonu.”—SALA. 112:6, 9.
1. (a) Ko e heigoa e vahā fiafia anoiha ne fakatali ki a lautolu oti ne mailoga he Atua ke tututonu? (e) Ko e heigoa e hūhū ne mafuta mai?
KO E homo ue atu ha ia anoiha ne fakatali ki ai e tau tagata oti ne mailoga he Atua ke tututonu! To fiafia tukulagi a lautolu ke ako fakalahi hagaao ke he tau mahani fulufuluola a Iehova. Ko e tau loto ha lautolu kua pukeina he fakahekeaga he ako fakalahi a lautolu hagaao ke he tau gahua tufuga he Atua. Ko e taha matapatuaga ke he vahā fulufuluola pihia anoiha ko e “tututonu,” ne peehi he Salamo 112. Ka e maeke fēfē e Atua tapu mo e tututonu, ko Iehova, ke mailoga e tau tagata agahala kua tututonu? Pete he lali fakamakamaka a tautolu ke taute e mena kua hako, ne taute e tautolu e tau mena hehē, falu magaaho ko e tau mena kelea lahi mahaki.—Roma 3:23; Iako. 3:2.
2. Ko e heigoa e ua e mana ne taute e Iehova ha ko e fakaalofa?
2 He fakaalofa ha Iehova, ne foaki mai e tali mitaki katoatoa. Puhala fe? Fakamua, he taute e mana he hiki mai e moui he Tama fakahele haana he lagi ke he manava he tamafine tote ke fanau mai a ia ko e tagata mitaki katoatoa. (Luka 1:30-35) He mole mogoia e tamate he tau fī ha Iesu a ia, ne taute e Iehova taha mana ofoofogia foki. Ne liu fakamoui he Atua a Iesu ke eke mo mena moui fakaagaaga ne lilifu ue atu.—1 Pete. 3:18.
3. Ko e ha ne fiafia e Atua ke palepale e Tama haana aki e moui i luga he lagi?
3 Ne palepale e Iehova a Iesu aki e taha mena ne nakai moua he Tama haana ato moui tino tagata a ia—ko e moui nakai fai fakaotiaga i luga he lagi. (Hepe. 7:15-17, 28) Kua fiafia a Iehova ke taute e mena nei ha kua fakatumau a Iesu ke fakamooli katoatoa i lalo he tau kamatamata velagia. Ati foaki e Iesu ke he Matua haana e tali mitaki lahi mahaki, ko e tali katoatoa, ke he pikopiko ha Satani nukua fekafekau e tau tagata ke he Atua ha ko e tau manako lotokai mo e nakai mai he fakaalofa mauokafua.—Fakatai 27:11.
4. (a) He liu hake a ia ke he lagi, ko e heigoa ne taute e Iesu ma tautolu, ti tali fēfē e Iehova? (e) Fēfē haau a logonaaga ke he mena ne taute e Iehova mo Iesu ma haau?
4 I luga he lagi, ne mua atu e mena ne taute e Iesu. Kua “fakakite ainei a ia ki mua he Atua ma tautolu” mo e uho he “hana toto ni.” Ko e Matua fakaalofa ha tautolu he lagi ne talia fiafia e poa uho ha Iesu “ko e lukutoto foki a ia mo e tau hala ha tautolu.” Ko e mena ia, fakalataha mo e ‘tau loto manamanatu kua mea,’ kua maeke ia tautolu ke ‘fekafekau ai ke he Atua moui.’ Ko e kakano mooli ke taogo e tau kupu hafagi he Salamo 112, [“Fakaheke a Iehova, ma tau tagata!” NW].—Hepe. 9:12-14, 24; 1 Ioa. 2:2.
5. (a) Ko e heigoa kua lata ia tautolu ke taute ke fakatumau e tuaga tututonu mo e Atua? (e) Puhala fe ne kamata e Salamo 111 mo e Salamo 112?
5 Ma tautolu ke fakatumau e tuaga tututonu mo e Atua, kua lata ia tautolu ke fakagahua tumau e tua ke he toto ha Iesu ne fakamaligi. Kua lata ia tautolu ke fakaaue tumau ki a Iehova he tau aho oti ha kua fakaalofa lahi mahaki ki a tautolu. (Ioane 3:16) Lata foki ia tautolu ke fakaako tumau e Kupu he Atua mo e taute e tau mena oti ke momoui fakatatau ke he fekau i ai. Ha ha i loto he Salamo 112 e fakatonuaga mitaki ma e tau tagata oti ne manako ke fakatumau e manamanatuaga meā ki mua he Atua. Kua matutaki e salamo nei mo e Salamo 111. Ne hafagi e tau Salamo ua nei aki e talahauaga “Haleluia” po ke “Fakaheke a Iehova, ma tau tagata!”a
Ko e Fakavēaga he Fiafia
6. Fakamonuina fēfē e “tagata” matakutaku Atua ne fakamaama he Salamo 112?
6 “Uhoaki [po ke, fiafia] e tagata kua matakutaku kia Iehova, kua fiafia lahi ke he hana tau poaki. To malolo lahi hana fanau ke he motu; to monuina e faoa he tau tagata tututonu.” (Sala. 112:1, 2) Mailoga ne totoku fakamua he salamo e “tagata” tokotaha ti hiki mogoia ke he tokologa he “tau tagata tututonu” he vala fakahiku he kupu 2. Fakakite he mena nei kua maeke he Salamo 112 nei ke hagaao ke he matakau ne tokologa e tagata. Fuluola ai, ne omoomoi e aposetolo ko Paulo ke fakaaoga e Salamo 112:9 ke hagaao ke he tau Kerisiano he senetenari fakamua. (Totou 2 Korinito 9:8, 9.) Kua fakakite mooli he salamo nei e puhala kua maeke e tau tutaki he Keriso he lalolagi he vahā nei ke fiafia!
7. Ko e ha kua lata e tau fekafekau he Atua ke moua e matakutaku mitaki ki a ia, ti kua lata ke fēfē e logonaaga haau ke he tau poaki he Atua?
7 Tuga ne fakakite he Salamo 112:1, kua fiafia e tau Kerisiano mooli nei he ō fano a lautolu mo e “matakutaku kia Iehova.” Ko e matakutaku mitaki nei he nakai fakaita a ia kua lagomatai a lautolu ke totoko e agaaga he lalolagi ha Satani. Kua “fiafia lahi” a lautolu he fakaako e Kupu he Atua mo e omaoma e tau poakiaga haana. Putoia ai e poaki ke fakamatala e tala mitaki he Kautu ke he lalolagi katoa. Kua eketaha a lautolu ke taute tutaki he tau tagata he tau motu oti mo e hataki e tau tagata mahani kelea ke he hoko mai he aho fakafili he Atua.—Eseki. 3:17, 18; Mata. 28:19, 20.
8. (a) Kua palepale fēfē e tau tagata fakamooli he Atua he vahā nei ma e makutu ha lautolu? (e) Ko e heigoa e tau monuina anoiha hane fakatali ki a lautolu ne moua e amaamanakiaga ke he lalolagi?
8 Ha kua omaoma ke he tau poaki pihia, ko e tau fekafekau he Atua he lalolagi he vahā nei kua kavi ke fitu e miliona mogonei. Ko hai ka fakatikai ko e tau tagata haana kua ‘malolo lahi ke he motu’? (Ioane 10:16; Fakakite. 7:9, 14) Ti “monuina” mooli a lautolu he magaaho ka fakahoko he Atua e finagalo haana! Ha ko e matakau, to hao a lautolu ne moua e amaamanakiaga ke he lalolagi mai he “matematekelea lahi” ke fakatū e “lalolagi fou” ka “nofo ai e tututonu.” Nakai leva, ko lautolu ne hao mai i Amaketo “to monuina” lahi foki. To mautali a lautolu ke fakafeleveia e tau miliona tagata ka fakaliu tu mai. Ko e amaamanakiaga homo ue atu ha ia! Fakahiku, ko lautolu ne “fiafia lahi” ke he tau poaki he Atua to hokotia ke he mitaki katoatoa he tagata mo e olioli tukulagi e “tokanoaaga ha ha he monuina he fanau he Atua.”—2 Pete. 3:13; Roma 8:21.
Fakaaoga Fakailoilo e Tau Koloa
9, 10. Fakaaoga fēfē he tau Kerisiano mooli e tau koloa fakaagaaga ha lautolu, ti to tumau tukulagi fēfē e tututonu ha lautolu?
9 “Ha he fale hana e koloa mo e tau mena loga; to tumau tukulagi foki hana tututonu. To hake ke he pouli e maama ma lautolu ne tututonu; ko lautolu ne fakaalofa noa, mo e fakaalofa hofihofi, mo e tututonu.” (Sala. 112:3, 4) He tau vahā Tohi Tapu, kua talahaua falu he tau fekafekau he Atua he maukoloa ha lautolu. Mo e taha kakano foki, ko lautolu ne talia mooli he Atua kua maukoloa, pete foki kua nakai maukoloa fakatino. Ko e mooli hanai, ko e laulahi ne fifili ke mahani fakatokolalo ki mua he Atua kua liga nofogati ti onoono hifo ki ai, tuga he vahā a Iesu. (Luka 4:18; 7:22; Ioane 7:49) Pete kua loga po ke nakai loga e koloa fakatino he tagata, kua maeke agaia ke maukoloa fakaagaaga.—Mata. 6:20; 1 Timo. 6:18, 19; totou Iakopo 2:5.
10 Ko e tau Kerisiano fakauku, fakalataha mo e tau hoa ha lautolu, ne nakai toka ne lautolu e tau koloa fakaagaaga ki a lautolu ni. Ka kua “hake” a lautolu mo ‘maama ki a lautolu ne tututonu’ he lalolagi pouli ha Satani. Kua taute pihia e lautolu he lagomatai falu ke aoga mai he tau tanakiaga koloa fakaagaaga he pulotu mo e iloilo he Atua. Kua lali e tau tagata totoko ke fakaoti e gahua fakamatala he Kautu ka e kaumahala. Ka ko e fua he gahua tututonu nei to “tumau tukulagi.” He fakauka ke he puhala tututonu, maeke he tau fekafekau he Atua ke moua e mafanatia he moui “tumau tukulagi.”
11, 12. Ko e heigoa falu puhala ne fakaaoga he tau tagata he Atua e tau koloa fakatino ha lautolu?
11 Ko e tau tagata he Atua, he vahega fekafekau fakauku mo lautolu he “moto tagata tokologa,” kua fakamokoi mooli hagaao ke he tau koloa fakatino. Ne talahau he Salamo 112:9: “Kua fakatafola e ia hana tau mena, kua āge e ia kia lautolu kua nonofogati.” Ko e tau Kerisiano mooli he vahā nei kua fa foaki noa e tau koloa fakatino ke he tau matakainaga Kerisiano mo e tau katofia foki ha lautolu ne manako lagomatai. Ne fakaaoga foki e lautolu e tau koloa fakatino ke lalago e tau matagahua lagomatai he tau magaaho matematekelea pauaki. Tuga he fakakite e Iesu to pihia e mena ka tupu, ko e punaaga foki a ia he fiafia.—Totou Gahua 20:35; 2 Korinito 9:7.
12 Lafi ki ai, manamanatu ke he tau tupe ne fakamole ke taute fakailoa e mekasini nei ke he 172 e vagahau, ne loga ai kua vagahau he tau tagata nonofogati. Manamanatu foki, ko e senolo nei kua moua ke he loga e tau vagahau matalima ka fakaaoga he tau tagata teliga tuli, pihia foki e tohi ma e matapouli.
Fakaalofa Noa mo e Tonu
13. Ko hai ne fakatoka e tau fakafifitakiaga mitaki lahi mahaki he foaki fakaalofa noa, ti fifitaki fēfē e tautolu e fakafifitakiaga ha laua?
13 “Kua monuina e tagata kua fakaalofa noa mo e tuku age hana tau mena kia lautolu kua ogo mai.” (Sala. 112:5) Liga kua kitia e koe e tau tagata ne foaki lagomatai ke he falu kua nakai fakaalofa noa tumau. Kua foaki fakatupua po ke ole fakafī e falu. Kua nakai mitaki ke moua e lagomatai mai he tagata ne fakateaga ki a koe po ke taute a koe ke logona hifo ko e fakatauhele po ke kavega. Taha faahi, kua hahau mooli ke moua e lagomatai mai he taha tagata ne fakaalofa noa. Ko Iehova ko e fakafifitakiaga mua ue atu he Foaki fakaalofa noa mo e fiafia. (1 Timo. 1:11, NW; Iako. 1:5, 17) Ne fakaata katoatoa e Iesu Keriso e fakafifitakiaga fakaalofa noa he Matua hana. (Mare. 1:40-42) Ti, ke mailoga he Atua kua tututonu a tautolu, kua foaki fiafia mo e fakaalofa noa a tautolu, mua atu he gahua he fonua ka foaki e lagomatai fakaagaaga ke he tau katofia ha tautolu.
14. Ko e heigoa falu puhala ka maeke ia tautolu ke ‘leveki ha tautolu a tau mena mo e fakafili tonu’?
14 “To leveki e ia hana tau mena mo e [fakafili] tonu.” (Sala. 112:5) He talahau tuai, ne leveki he vahega fekafekau pule kua fakamooli e tau mena he Iki he fakalagotatai mo e fakafili tonu ha Iehova. (Totou Luka 12:42-44.) Kua fakaata e mena nei he takitakiaga faka-Tohi Tapu ne foaki ke he tau motua, he falu magaaho ne fakatonu e tau lekua agahala lalahi i loto he fakapotopotoaga. Ko e puhala tonu ne fehagai mo e tau matakupu kua kitia mooli foki he takitakiaga ne fakavē ke he Tohi Tapu ne foaki he vahega fekafekau ke he puhala kua lata ke fakaholo aki e tau fakapotopotoaga, tau kaina misionare, mo e tau kaina Peteli oti. Nakai ni ko e tau motua hokoia kua lata ke fakafili tonu ka e lata foki he tau Kerisiano ke he tau fehagaiaga ha lautolu mo e falu mo lautolu ne nakai talitonu, putoia e tau mena fakapisinisi.—Totou Mika 6:8, 11.b
Tau Monuina ma Lautolu ne Tututonu
15, 16. (a) Ko e heigoa e lauiaaga he tau tala kelea he lalolagi ki a lautolu ne tututonu? (e) Ko e heigoa he tau fekafekau he Atua kua eketaha ke matutaki ke taute?
15 “Ko e moli, nakai fagahuatia a ia tukulagi; nakai nimo tukulagi e tagata tututonu. Ka logona e ia e ogo kelea, ti nakai matakutaku ai a ia, kua mau hana loto he tua kia Iehova. Kua mauokafua hana loto, nakai matakutaku a ia, ato kitia e ia e taui ha lautolu kua fai fi kia ia.” (Sala. 112:6-8) Nakaila pihia fakamua he fakamauaga tuai ne ha ha ai loga lahi e tau tala kelea, putoia e tau mena tuga e tau felakutaki, matakutakuina, tau gagao foou mo e falu gagao tuai kua liliu tutupu, holifono, mativa, mo e kiva ne fakatupu e moumouaga. Ko lautolu ne onoono e Atua kua tututonu ne nakai hao he tau lauiaaga he tau tala kelea nei, ka e nakai kaumahala a lautolu ke he matakutaku. Ka ko e tau loto ha lautolu kua “mau” mo e “mauokafua” he onoono atu a lautolu ke he vahā anoiha mo e tumauokafua, he iloa kua tata mai e lalolagi tututonu foou he Atua. Ka hoko e matematekelea, kua mautali a lautolu ke fakauka ke he tuaga ha kua falanaki a lautolu ke he lalagoaga ha Iehova. Ne nakai toka e ia e tau tagata tututonu haana ke “nakai fagahuatia”—ne foaki e ia e lagomatai mo e malolō ke fakauka.—Filipi 4:13, NW.
16 Kua fakauka foki e tau tagata tututonu he Atua ke he fakavihia mo e tau pikopiko ne fakaholofa he tau tagata totoko, ka kua kaumahala e mena nei ke fakanonono aki e tau Kerisiano mooli mo e to matutaki ke kaumahala. Ka kua matutaki e tau fekafekau he Atua ke tumau mo e nakai hikihikifano ke he gahua ne foaki e Iehova ki a lautolu—ke fakamatala e tala mitaki he Kautu mo e ke taute tutaki ia lautolu oti ne talia. Nakai fakauaua, to moua e lautolu ne tututonu e totokoaga lahi mahaki he tata lahi e fakaotiaga. To hoko e vihiatia pihia ke he tapunu he totoko a Satani ko e Tiapolo ke he lalolagi katoa he haana matagahua ko Koku ha Makoku. Fakahiku ai, to ‘kitia e tautolu e tau fi ha tautolu’ kua kaumahala lahi. Kua ofoofogia ha ia mogoia ke kitia kua fakatapu tuai e higoa ha Iehova!—Eseki. 38:18, 22, 23.
‘Fakatokoluga mo e Lilifu’
17. Maeke fēfē he tagata tututonu ke moua e ‘fakatokoluga mo e lilifu’?
17 To fiafia mooli ke fakaheke auloa ki a Iehova, mo e nakai totoko mai e Tiapolo mo e lalolagi haana! Ko e fiafia pihia to tukulagi ki a lautolu oti ne fakatumau e tuaga tututonu mo e Atua. To nakai kaumahala a lautolu he mā, ha kua mavehe foki a Iehova ko e “hoe” he tagata tututonu haana ‘to fakatokoluga mo e lilifu.’ (Sala. 112:9) Ko e tagata tututonu ha Iehova to kautū fiafia he kitia e kaumahala he tau fī oti he pule katoatoa ha Iehova.
18. To fakamooli fēfē e tau kupu fakahiku he Salamo 112?
18 “To kitia ai he tagata mahani kelea, ti ita ai a ia; to konoi hana tau nifo, ti faliu puke vai a ia; to fakaotioti e manako he tau tagata mahani kelea.” (Sala. 112:10) Ko lautolu oti ne matutaki ke totoko e tau tagata he Atua to nakai leva ti “faliu puke vai” ha ko e ha lautolu a mahekeheke mo e vihiatia. Ko e manako ha lautolu ke kitia e fakahikuaga he tau gahua ha tautolu to fakaotioti mo lautolu ka hoko mai e ‘matematekelea lahi.’—Mata. 24:21.
19. Ko e heigoa ka tumauokafua a tautolu ki ai?
19 Ko koe nakai taha mo lautolu ka hao fiafia atu ke he kautūaga mua ue atu ia? Po kua gagao po ke fuakau lahi a koe ti mate ato fakaotioti e lalolagi ha Satani, to fakalataha nakai a koe mo “lautolu ne tututonu” ka liliu tu mai? (Gahua 24:15) Maeke e tali ke ē, kaeke ke matutaki a koe ke fakagahua e tua ke he poa lukutoto ha Iesu mo e fifitaki a Iehova, ke tuga a lautolu ne hukui he “tagata” tututonu ne fakamaama he Salamo 112. (Totou Efeso 5:1, 2.) To matakaki a Iehova ki ai ke “nakai nimo” a lautolu ia, po ke nakai tiaki e tau gahua tututonu ha lautolu. To manatu mo e ofania tukulagi tukumuitea e Iehova a lautolu.—Sala. 112:3, 6, 9.
[Tau Matahui Tala]
a Ko e matutakiaga he tau salamo ua nei kua kitia ke he kakano he manatu. Ko e tau mahani he Atua ne fakaheke he Salamo 111 kua fifitaki he “tagata” matakutaku Atua he Salamo 112, kua maeke ke kitia he fakatatai e Salamo 111:3, 4 mo e Salamo 112:3, 4.
b Mika 6:8 (NW): “Ne tala atu a ia ki a koe, ma tagata he lalolagi na e, e mena mitaki. Ti ko e heigoa e mena ne ole mai e Iehova ia koe ka ko e fakagahuahua e fakafili tonu mo e ke fakaalofa totonu mo e kia mahani fakalatalata he fano mo e Atua haau?”
Tau Hūhū ke Manamanatu Ki Ai
• Ko e heigoa falu kakano ati talahau e tautolu “Haleluia”?
• Ko e heigoa e fakaholoaga he vahā foou nei ne taute e tau Kerisiano mooli ke fiafia lahi?
• Ko e tagata foaki fēfē ne ofania e Iehova?
[Fakatino he lau 25]
Ke fakatumau e tuaga tututonu mo e Atua, kua lata ia tautolu ke fakagahua e tua ke he toto ha Iesu ne fakamaligi
[Tau Fakatino he lau 26]
Tau mena foaki noa ne taute fakamakai ka lalago e matagahua lagomatai mo e folafola he tau tohi faka-Tohi Tapu