Fakaatā Nakai e Koe e Atua ke Vagahau ki a Koe he Tau Aho Takitaha?
LAGAFIHA e ono a koe ki a koe he fakaata? Laulahi ia tautolu ko e mena taute tumau anei he tau aho takitaha—liga ko e mena ne taute lagaloga e tautolu he aho. Ko e ha? Ha kua tupetupe a tautolu ke he foliga ha tautolu.
Ko e totou e Tohi Tapu ka fakatatai ke he ono ke he fakaata. (Iakopo 1:23-25) Ko e fekau ne fakamau he Kupu he Atua kua ha ha ai e malolō ke fakaatā a tautolu ke kitia mitaki e tautolu a loto ha tautolu. Kua “tuina foki ato vevehe tuai ai e loto mo e agaga.” (Heperu 4:12) He falu kupu, kua vevehe a tautolu ke he mena ne liga nakai tatai a tautolu he foliga ke he mena mooli i loto ha tautolu. Kua fakakite ki a tautolu e tau hikihikiaga kua lata, tuga ni ne taute he fakaata.
Ne nakai ni fakakite he Tohi Tapu e tau mena kua lata ke taute e tautolu e tau hikihikiaga ka e lagomatai foki a tautolu ke taute e tau hikihikiaga ia. Ne tohi he aposetolo ko Paulo: “Ko e tau Tohi Tapu oti kana mai he [a]gaga he Atua ia, kua aoga ni ke fakaako ai, ke fakatonu ai, ke akonaki ai, ke fakailoilo ai foki ke he tututonu.” (2 Timoteo 3:16, 17) Mailoga, ke he tau aogaaga fā nukua fakamaama mai, tolu la e mena—ko e fakatonu, akonaki, mo e fakailoilo—ne putoia e tau hikihikiaga he tau aga mo e tau gahua ha tautolu. Ka manako a tautolu ke ono tumau ke he fakaata ke kitia mooli kua hagahaga mitaki e tau foliga ha tautolu, kua mua atu mogoia e latatonu ha tautolu ke totou e Kupu he Atua, ko e Tohi Tapu he tau magaaho oti!
He fifili a Iosua ke takitaki e motu ko Isaraela, ne tala age a Iehova ko e Atua ki a ia: “Nakai uta kehe mo e gutu hau e tohi he fakatufono nai, ka kia manamanatu [po ke, totou] ai a koe ke he aho katoa mo e po, kia taofi e koe ke eke ai ke lata mo e tau mena oti kua tohi ai; ti monuina a koe ke he tau puhala oti ke fano ai a koe, ti monuina ai ni.” (Iosua 1:8) E, ke monuina po ke kautū ai, kua lata ia Iosua ke totou e Kupu he Atua “ke he aho katoa mo e po,” he tau magaaho oti.
Kua fakakite pihia foki he salamo fakamua e tau aoga he totou tumau e Tohi Tapu he pehē ai: “Uhoaki e tagata kua nakai fano ke he pulega he tau tagata mahani kelea, kua nakai tu foki a ia ke he puhala he tau tagata hala, kua nakai nofo foki ke he nofoaga he tau tagata fa va; ka koe fakatufono a Iehova kua fiafia ai a ia, ti manamanatu [po ke, totou] a ia ke he tau fakatufono hana ke he aho katoa mo e po. To lata a ia mo e akau kua to ke he tapa he tau vai lele, to fua mai ke he hana tau fua ke he tau ni hana; to nakai mokulu foki hana tau lau, to monuina foki a ia ke he tau mena oti kana ke eke e ia.” (Salamo 1:1-3) Kua manako mooli a tautolu ke tuga e tagata ia.
Tokologa e tagata ne totou tumau e Tohi Tapu he tau aho takitaha. Hūhū ai ko e ha ne totou e lautolu e Tohi Tapu he tau aho takitaha, taha e Kerisiano ne tali: “Ka liogi tumau au ke he Atua he aho mo e amanaki ki a ia ke logona au, ko e ha mogoia ne nakai fanogonogo foki au ke he Atua he totou e Kupu haana he tau aho takitaha? Ka manako a tautolu ke eke mo kapitiga mitaki he Atua, ko e ha mogoia kua tutala tumau a tautolu?” Hako e manatu haana. Ko e totou e Tohi Tapu kua tuga ni e fanogonogo ke he Atua ke maeke ia tautolu ke moua e manatu haana ke he tau tuaga.
Fakatumau ke he Matafekau
Liga kua fitā he lali a koe ke kamata e fakaholoaga totou Tohi Tapu. Kua totou nakai e koe e Tohi Tapu katoa he kamataaga ke he fakaotiaga? Ko e puhala mitaki lahi mahaki a ia ke fakamahani mo e tau tala i loto. Pete ia, lagaloga e kamata e falu ke totou e Tohi Tapu katoa, ka e oti noa ai. Kua feleveia nakai a koe mo e paleko nei? Ko e heigoa haau ka taute ke hokotia ke he foliaga haau he totou e Tohi Tapu katoa? He ha he fakaaoga e tau manatu ua nā.
Fakatoka e totou Tohi Tapu ke he fakaholoaga haau he tau aho takitaha. Fifili e magaaho he tau aho takitaha ka liga maeke ia koe ke totou e Tohi Tapu. Fakatoka foki taha pulega ke paletua e fakaholoaga haau. Ka nakai maeke ia koe ke totou e Tohi Tapu haau he magaaho ne fakatoka e koe, fifili taha magaaho kehe ke nakai fakatō e aho haau he totou e Kupu he Atua. He puhala nei, to muitua e koe e fifitakiaga he tau Perea i tuai. Ne tala mai ki a tautolu hagaao ki a lautolu: “Kua talia e lautolu e kupu mo e loto makutu, kua kumikumi [fakamitaki] ke he tau Tohi ke he taha aho mo e taha aho, po ke moli e tau mena ia.”—Gahua 17:11.
Tokaloto e foliaga pauaki. Ma e fakatai, ka totou e koe tolu ke he lima e veveheaga he Tohi Tapu he tau aho takitaha, maeke ia koe ke totou e Tohi Tapu katoa he taha e tau. Ko e fakafonua he tau lau tohi ne mumui mai kua fakakite e puhala ke taute aki. Ko e ha he fifili ke fakaaoga e fakaholoaga nei? I lalo he mataulu “Aho,” fakatoka e magaaho ke totou e tau veveheaga kua tū ai. Ti, i loto he puha ne foaki mai, tiki e tau faahi kupu ne kua totou e koe. Ko e taute pihia ka lagomatai a koe ke kitia e holo ki mua haau.
Ka oti he totou e koe e Tohi Tapu katoa, ko e fakamanou he ha he mena ia? Fakaaoga e koe e fakaholoaga taha ia ke totou e Tohi Tapu katoa he tau tau takitaha, liga kamata he tau magaaho takitaha ke he tau faahi kupu kehekehe. Po ke ka manako a koe ke totou e Tohi Tapu he puhala nakai mafiti, maeke ia koe ke ua po ke tolu e aho ke totou takitaha e tau veveheaga ne kua fakatoka mai.
He tau magaaho takitaha he totou e koe e Tohi Tapu, to moua e koe e tau mena foou ne aoga ke he moui haau—tau mena ne nakaila kitia ia e koe fakamua. Ko e ha? “Ko e mena mole atu e mahani he lalolagi nai,” ti hikihiki tumau foki e tau momoui mo e tau tuaga ha tautolu. (1 Korinito 7:31) Kia eke mo fifiliaga mauokafua haau mogoia ke onoono tumau ke he fakaata he Kupu he Atua, ko e Tohi Tapu. He puhala nei, maeke ia koe ke talitonu kua fakaatā e koe e Atua ke vagahau ki a koe he tau aho takitaha.—Salamo 16:8.