Manatu Nakai e Koe?

Kua loto fakaaue nakai a koe he totou ke he tau fufuta foou he Ko e Kolo Toko? Lali la mogoia ke kitia ko e maeke nakai a koe ke tali e tau hūhū i lalo:

• Ko e heigoa e fakaakoaga ne ako e tautolu he fakahao e Iesu a Peteru he kamata a ia ke tomo i tahi? (Mata. 14:28-31)

Ka mailoga e tautolu e matakainaga ne tote e tua, maeke ia tautolu ke fakaolo atu fakatai e tau lima ha tautolu mo e lagomatai a ia ke fakalahi e tua.—9/15, lau 8.

• Ko e heigoa ne lauia a Iehova he laveaki a tautolu?

Ne fakauka a Iehova he fakamamahi mo e ekefakakelea e Tama haana. Ti tuga he fakaata mai he makai ha Aperahamo ke poa haana tama, ne fakauka a Iehova he tamate e Tama haana ko e tagata holifono.—9/15, lau 28-29.

• Puhala fe kua maeke e Atua ke fakamaukoloa a koe?

He vahā kua mole, ne fakamonuina e Iehova e falu, tuga a Aperahamo mo Solomona aki e muhukoloa fakatino. Ka ko e muhukoloa ne manako lahi e tau Kerisiano ki ai mo e maeke e Atua ke lagomatai ke moua ai kua putoia e tua, mafola, loto fakaaue, mo e fiafia.—10/1, lau 3-7.

• Ko e ha ne ko e paleko ke fakaholahola e tupe i loto he fakamauaga, ti ko e heigoa ka lagomatai e tau hoa ke kautū?

Ko e taufetoko ke he tupe kua fa hagaao ke he falanaki po ke matakutaku, ti liga kehekehe e tau feakiaga he tau hoa mau. Fā e kei ke he kautūaga ko e: Lali ke tutala fakatotoka hagaao ke he tupe, talia tokoua e onoonoaga ke he totogi, tohi hifo e fatifatiaga tupe he magafaoa, ti talia ko hai ka taute ai.—10/1, lau 10-12.

• Ko e heigoa e fakaakoaga ne foaki he Tau Fakatai 24:27 hagaao ke he ‘ta ai e fale’?

Ko e tagata taane kua manako ke faihoana kua lata ia ia ke mautauteute ma e matagahua ia. Putoia he mena nei e mautauteute ke foaki fakatino ma e magafaoa mo e takitaki e magafaoa ke he tau mena fakaagaaga.—10/15, lau 12.

• Ko e heigoa e tolu e matapatu aoga lahi ke taute e fakaakoaga Tohi Tapu he magafaoa haau ke kautū?

Fakamua, kia fakatumau. Fakatoka e aho mo e tulā pauaki ma e afiafi Tapuakiaga he Magafaoa haau, ti fakatumau ki ai. Kia nakai feaki e aga ke nakai taute tumau ai. Uaaki, taute ke aoga mitaki. Fifili e tau matakupu ke felauaki mo e tau mena ka fehagai mo e tama haau he tau aho po ke tau faahi tapu i mua. Toluaki, taute ai ke fiafia. Maeke a koe he falu magaaho ke fanogonogo ke he taha he tau audio drama po ke kitekite ti fakatutala ke he taha he tau vitiō ne taute he Tau Fakamoli a Iehova. Po ke taute e koe ke totou auloa e vala he Tohi Tapu, he tofi e tau vala ke he tau tagata takitaha he magafaoa.—10/15, lau 29-31.

• Fakatoka fēfē e Iehova mo Iesu e fakafifitakiaga mitaki ma tautolu hagaao ke he tau mahani mitaki?

Pete kua tokoluga e tuaga ha Iehova, ne fehagai totonu mo e lilifu a ia ke he tau tagata. Ne tutala a Ia ki a Aperahamo mo Mose he fakaaoga e kupu Heperu ne fa fakaliliu e poaki ke eke mo ole totonu. (Kene. 13:14; Esoto 4:6) Ne fanogonogo foki e Atua ke he tau tagata. (Kene. 18:23-32) Ne taute pihia foki e Iesu, ti mautali mo e makai a ia ke lagomatai a lautolu ne takatakai ia ia, ti fa fakaaoga e tau higoa ha lautolu.—11/15, lau 25.

• Ka fakaako e vagahau matalima, maeke fēfē ia koe ke au atu e makutu he vagahau matalima ti maama ai?

Pete kua liga fai tagata fakailoa foki he fakapotopotoaga ha mutolu ne maeke ke logona, ko e ha he ua tutala? To lagomatai he mena nei a koe ke manamanatu he puhala kitia ke he vagahau matalima. He falu magaaho, liga lali a koe ke fakamukamuka he tutala. Tuga ni he fakaako ha vagahau kehe, kua lata a koe ke fakauka ke he tau paleko ke maeke ke mahifi ki ai.—11/15, lau 31.