Ō Oti Kia e Tau Tagata Mitaki ke he Lagi?
HE MOLE e kaiaga fakahiku ha Iesu mo e tau aposetolo haana he afiafi to tamate a ia, ne mavehe e Iesu to moua e lautolu e palepale ke nonofo he lagi. Ne pehē a ia: “Ne loga e tau mena ke nonofo ai ke he fale he haku a Matua; ane nakai, po kua tala atu e au kia mutolu; ke fano au ke taute taha mena ke nonofo ai a mutolu.” (Ioane 14:2) To foaki he ha e Iesu ki a lautolu taha mena ke nonofo he lagi? Ko e heigoa ha lautolu ka taute i ai?
Ne tokaloto e Iesu e kotofaaga uho ma e tau tutaki haana. He afiafi taha ia ni, ne pehē a ia: “Ko mutolu nā, ne tumau a mutolu kia au ke he tau mena ne kamatamata ai au. Tuga ne kotofa mai he haku a Matua e kautu kia au, ke pihia foki he kotofa e au kia mutolu.” (Luka 22:28, 29) Ne mavehe he Atua ki a Iesu to eke a ia mo Patuiki ka foaki e taha he tau mena ne manako lahi mahaki e tau tagata ki ai—ko e fakatufono mitaki. To fakahao e Iesu e tau tagata mai he tau matematekelea mo e to moumou e tau tagata ne matahavala ki a lautolu. Pete to ha ha i lalo he pule ha Iesu e tau tagata ke “hoko ke he tau kala he lalolagi,” to haia he lagi e nofoaiki haana.—Salamo 72:4, 8; Tanielu 7:13, 14.
Pete ia, to nakai pule tokotaha a Iesu. Ti mavehe e ia ke he tau aposetolo haana e nofoaga i luga he lagi. Ko lautolu fakamua haia ne fifili “mo tau patuiki ke he lalolagi.”—Fakakiteaga 5:10.
Tokofiha ka ō ke he lagi? Tuga ni e tau fakatufono, kua gahoa a lautolu ka pule he Kautu he Atua he lagi ka fakatatai mo e tau tagata oti ne nonofo i lalo he pule ia. Ki a lautolu ka pule mo Iesu, ne pehē a ia: “Ua matakutaku a koe e fuifui mamoe gahoa na e; ha ko e mena finagalo ha mutolu a Matua ke foaki mai e kautu kia mutolu.” (Luka 12:32) Ko e “fuifui mamoe gahoa” ia to katoatoa ke 144,000. (Fakakiteaga 14:1) Kua tote e numera ia ka fakatatai ke he tau miliona ka olioli e moui tukulagi he lalolagi ko e tau tagata fakamooli he Kautu.—Fakakiteaga 21:4.
Ti nakai ō oti e tau tagata mitaki ke he lagi. Hagaao ke he patuiki mitaki ko Tavita, ne talahau fakamahino he aposetolo ko Peteru: “Ko e mena nakai hake a Tavita ke he lagi.” (Gahua 2:34) Ko e tagata mitaki a Ioane ko e Papatiso. Ka e fakakite e Iesu to nakai hake a Ioane ke eke mo pule ko e patuiki i luga he lagi. Ne pehē a Iesu: “Nakai tu mai taha ia lautolu ne fanau mai he tau fifine ke mua kia Ioane e [P]apatiso; ka ko ia ne tote ue atu ke he kautu he lagi, kua mua a ia kia ia.”—Mataio 11:11.
To Moua Nakai e Koe e Palepale he Tau Tagata Mitaki?
Ke moua e palepale he moui tukulagi he lalolagi, ko e heigoa kua lata he tagata ke taute? Ne pehē a Iesu: “Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.” (Ioane 3:16) Mailoga ko e fakaalofa he Atua ma e lalolagi ati takitaki a ia ke fakaatā e moui tukulagi ke he tau tagata oti, ka ko lautolu ni ne fakagahua e tua ka moua mooli e palepale ia.
Kua lata e tua ke fakavē ke he iloa po ke, iloilo tonu. (Ioane 17:3) Maeke ia koe ke fakakite ko e tagata mitaki a koe he fakaako fakalahi hagaao ke he finagalo ha Iehova ma e tagata. Talia mo e tua ke he tau mena ne fakaako e koe. Ti mauokafua ke he fifiliaga he moui tukulagi kua hafagi mooli ki a koe.
[Puha he lau 7]
Ko e Heigoa ne Talahau he Tohi Tapu?
Hūhū:
Ko e heigoa ka tupu ke he tau tagata mitaki he mamate a lautolu?
Tali:
“Ko lautolu ne mamate nakai iloa e lautolu ha mena.”—FAKAMATALAAGA 9:5.
Hūhū:
Ko e heigoa e amaamanakiaga he tau tagata mitaki ma e anoiha?
Tali:
“Mena hoko ke he [maga]aho ke logona ai ke he hana [Iesu] leo a lautolu katoa ha he tau tukuaga [“tuagamau fakamanatu,” NW], mo e o mai ai.”—IOANE 5:28, 29.
Hūhū:
To nonofo i fe e laulahi he tau tagata mitaki?
Tali:
“To eke ni e motu ma e tau tagata tututonu, to nonofo muatua ai a lautolu.”—SALAMO 37:29.