Manatu Nakai e Koe?

Kua loto fakaaue nakai a koe he totou ke he tau fufuta foou he Ko e Kolo Toko? Lali la ke kitia ko e maeke nakai a koe ke tali e tau hūhū i lalo:

• Ko e ha ne lata e Mesia ke mate?

Ne fakakite fakamooli he mate ha Iesu nukua maeke e tagata mitaki katoatoa ke fakatumau e mahani Atua pete ko e tau kamatamata velagia. Ti totogi foki e ia e fakahala he agahala ne moua he tau hologa ha Atamu, ati hafagi e puhala ke moui tukulagi.—12/15, lau 22-23.

• Ō oti kia e tau tagata mitaki ke he lagi?

Pete ne mavehe a Iesu ke he tau tutaki haana to fano a ia ke “taute taha mena” ma lautolu he lagi, ne fakakite e ia kua nakai ō hake noa ni e tau tagata tututonu ke he lagi. (Ioane 3:13; 14:2, 3) Nakai kia liogi a ia to eke e finagalo he Atua “ke he lalolagi, tuga ne eke ke he lagi”? (Mata. 6:9, 10) Mooli ai, taha he tau matakavi ua kua tatali ki a lautolu ne tututonu. Tokogahoa ka pule he lagi mo Keriso, ka ko e laulahi to momoui tukulagi he lalolagi.—Fakakite. 5:10.—1/1, lau 6.

• Ko e heigoa ne putoia ke he matutakiaga fai kakano mo e tau fanau?

Kua nakai koenaia ke tutala ki a lautolu, kua putoia e talahau e tau hūhū mo e fanogonogo fakatekiteki ke he tau tali ha lautolu. Tokologa ne moua e tau magaaho kai ko e tau magaaho mitaki ma e matutakiaga.—1/15, lau 18-19.

• Ko e tau tuaga fe ka manamanatu ke liu papatiso?

Liga pihia e mena ka tupu kaeke ko e magaaho ne papatiso ai, ne nofo fufū e tagata ke he taha tuaga po ke taute e mahani ka fakahiku a ia ke tuku ki tua kaeke kua fitā a ia he papatiso.—2/15, lau 22.

• Ko Iesu Kia ko Mekaeli, ko e Agelu ne Mua?

He tali mukamuka, ē. Ne totoku ia Iuta kupu 9 ko Mekaeli “ko e agelu ne mua.” Ko e talahauaga “ne mua” kua kakano ko e “takitaki” po ke “iki,” ti ko e tau kupu “agelu ne mua” kua nakai fakaaoga ke hagaao ke he tokologa he Tohi Tapu. Ko e 1 Tesalonia 4:16 e taha kupu foki ne totoku e agelu ne mua, ne fakamaama e Paulo a Iesu ne liu tu mai, he pehē: “Ko e mena haele hifo e Iki [Iesu] ni mai he lagi, mo e kalaga, mo e leo he agelu ne mua, mo e pu he Atua.” Ti ko Iesu Keriso ne fakakite he mena nei ko e agelu ne mua, po ke iki agelu.—4/1, lau 19.

• He fakataiaga ha Iesu he saito mo e tau titania, ko e heigoa ne hukui he gana, po ke tō, he tega mitaki?

Ne tauteute he Tama he tagata, ko Iesu, e fonua he fekafekauaga haana he lalolagi. Tali mai he Penetekoso 33 V.N., ko e tega mitaki ne gana he magaaho ne fakauku e tau Kerisiano mo fanau he Atua, ko e fanau haia he Kautu.—3/15, lau 20.

• Tamai fēfē e saito fakatai he fakataiaga ha Iesu ke he fale saito ha Iehova? (Mata. 13:30)

Ko e fakamooliaga nukua fakalaulahi atu ke fai magaaho he magahala he fakaotiaga he lalolagi. Ko e fanau he Kautu ne fakauku, ko e saito fakatai, ne tamai ke he fale saito ha Iehova he magaaho ne tamai a lautolu ke he fakapotopotoaga Kerisiano ne fakatū po ke magaaho ne moua e lautolu e palepale he lagi.—3/15, lau 22.

• Ko hai ne fifili e tanakiaga he tau tohi he Tau Tohiaga Tapu Heleni Kerisiano?

Nakai ko e falu matakau lotu po ke takitaki lotu. Ka ko e tau Kerisiano mooli, ne takitaki he agaaga tapu he Atua, kua mailoga ko e tau tohi kua omoomoi mooli. Kua lautatai e mena nei mo e manatu ko e taha he tau mena fakaalofa fakamana he agaaga ne foaki he tau hogofulu tau fakamua atu he fakapotopotoaga Kerisiano ko e “mailoga [e tau kupu he] agaga.” (1 Kori. 12:4, 10)—4/1, lau 28.