Tala Tuai 3: Ō Oti e Tau Tagata Mitaki ke he Lagi

Ko e heigoa e kamataaga he tala tuai?

He mole e mamate he tau aposetolo a Iesu, ke he kamataaga he senetenari ke uaaki V.N., ne moua he tau Matua he Lotu fakamua atu e tuaga talahaua. He fakamaama e tau fakaakoaga ha lautolu, ko e New Catholic Encyclopedia (2003), Volume 6, lau 687, ne pehē: “Ko e manatu mahani mau he fakaakoaga ko e fiafia ke he lagi kua tuku age agataha ke he agaaga ka oti e fakameā kua lata he mole e mate.”

Ko e heigoa ne talahau he Tohi Tapu?

“Uhoaki a lautolu ne mahani molu; ha ko e mena to eke ma lautolu e motu [po ke lalolagi].”—Mataio 5:5.

Pete ne mavehe a Iesu ke he tau tutaki haana to fano a ia ke “taute taha mena” ma lautolu he lagi, ne fakakite e ia kua nakai ō hake noa ni e tau tagata tututonu ke he lagi. (Ioane 3:13; 14:2, 3) Nakai kia liogi a ia to eke e finagalo he Atua “ke he lalolagi, tuga ne eke ke he lagi”? (Mataio 6:9, 10) Mooli ai, taha he tau matakavi ua kua tatali ki a lautolu ne tututonu. Tokogahoa ka pule he lagi mo Keriso, ka ko e laulahi to momoui tukulagi he lalolagi.—Fakakiteaga 5:10.

Fai magaaho ai, ne hiki he lotu fakamua atu ha lautolu a onoonoaga he matagahua ke he lalolagi. Ko e heigoa e fua? “Ne holo ki mua e fakatokaaga he lotu ke hukui e Kautu he Atua ne amanaki ki ai,” he talahau he The New Encyclopædia Britannica. Ne kamata e lotu ke malolō lahi e pule haana he fio mo e tau politika, he tiaki e talahauaga mahino a Iesu “nakai ko e tau tagata he lalolagi” e tau tutaki haana. (Ioane 15:19; 17:14-16; 18:36) He fakaohooho he Pule Atu Motu Roma ko Constantine, ne fakahui he lotu e falu taofiaga haana, taha ne putoia e tuaga mooli he Atua.

Fakatatai e tau kupu Tohi Tapu nei: Salamo 37:10, 11, 29; Ioane 17:3; 2 Timoteo 2:11, 12