“Ua Matakutaku a Koe Ko Au Ni Kua Lagomatai Kia Koe”

NE HATAKI tuai e Iesu e tau tutaki haana: “Ko e tuku ne fai he tiapolo e falu a mutolu ke he fale puipui, kia kamatamata ai a mutolu.” Ato hoko e hatakiaga ia, ne pehē a Iesu: “Ua matakutaku a koe ke he tau mena ko e mamahi ai ha ne fai a koe.” Ha kua matutaki a Satani ke fakaaoga e fakamatakutaku he fale puipui mo puhala ke fakaoti aki e gahua fakamatala he Kautu, liga ko e falu fakatufono kua hokotia ni e favale ke he tau Kerisiano mooli. (Fakakite. 2:10; 12:17) Ti ko e heigoa ka lagomatai a tautolu ke mautauteute ke he tau lagatau ha Satani mo e “ua matakutaku,” tuga he fakatonu e Iesu?

Mooli, laulahi ia tautolu he tau magaaho kua lauia he falu logonaaga matakutaku. Kua fakamafana agaia e Kupu he Atua a tautolu, ha ko e lagomatai a Iehova kua maeke ia tautolu ke kalo mai neke mokulu ke he matakutaku. Puhala fe? Taha puhala kua lagomatai e Iehova a tautolu ke mautauteute ke fehagai ke he totokoaga ko e kitia e tau lagatau ne fakaaoga e Satani mo e tau matakau haana. (2 Kori. 2:11) Ke fakamaama e mena nei, manamanatu la tautolu ke he mena ne tupu he tau vahā Tohi Tapu. To onoono foki a tautolu ke he falu fakafifitakiaga he vahā nei he tau matakainaga tua fakamooli ne ‘totoko atu ke he tau lagatau he Tiapolo.’—Efeso 6:11-13.

Patuiki Matakutaku Atua ne Fehagai ke he Pule Kelea Lahi Mahaki

He senetenari ke valu aki F.V.N., ko e patuiki kelea lahi mahaki ha Asuria ko Sanerivi ne kautū lagaloga ke he tau motu kehekehe. He pukeina he mauokafua, ne eketaha a ia ke kautū ke he tau tagata ha Iehova mo e maaga lahi ha lautolu ko Ierusalema, ne patuiki ai e tagata matakutaku Atua ko Hesekia. (2 Patu. 18:1-3, 13) Nakai fakauaua, ne fakaaoga e Satani e tuaga ke fakaohooho a Sanerivi ke fakahoko e tau pulega haana ke fakaotioti e tapuakiaga mooli mai he lalolagi.—Kene. 3:15.

Ne fakafano e Sanerivi e tau hukui ki Ierusalema ke poaki ke he maaga ia ke fakahui. Putoia ke he tau hukui ko Ravesake, ne eke mo gutuvagahau ne mua he patuiki.a (2 Patu. 18:17) Ko e foliaga ha Ravesake ke fakalolelole e tau Iutaia mo e taute a lautolu ke mahala ka e nakai latau. Ko e heigoa e tau puhala ne fakaaoga e Ravesake he tau laliaga haana ke fakamatakutaku e tau loto he tau Iutaia?

Mahani Fakamooli Pete he Vevehe Kehe

Ne tala age a Ravesake ke he tau hukui ha Hesekia: “Kua vagahau mai pehe he patuiki lahi, ko e patuiki a Asuria, Ko e heigoa kia e mena nai ke tua ki ai kua tua ai a koe. . . . Kitiala, kua tua a koe ke he tokotoko na ko e kaho kua maihiihi ko Aikupito, ka tokotoko ai e tagata ti tuina ai hana lima ti ati ni.” (2 Patu. 18:19, 21) Ne fakavai e tau tukumale ha Ravesake ha kua nakai kau a Hesekia mo Aikupito. Kua fakaohooho agaia he tukumale e mena ne manako a Ravesake ke manatu mooli he tau Iutaia: ‘To nakai fai tagata ka lagomatai ki a mutolu. Ko mutolu ni hoko mutolu.’

He tau vahā foou nei, ko e tau tagata totoko he tapuakiaga mooli ne fakaaoga foki e tau fakamatakutaku he vevehe kehe hoko lautolu ni he lali ke tuku e matakutaku ke he tau loto he tau Kerisiano mooli. Taha e matakainaga fifine Kerisiano ne tuku he fale puipui ha ko e tua haana mo e vevehe kehe mai he tau matakainaga haana ke he loga e tau tau, ne liu manatu he magaaho fakamui e mena ne lagomatai a ia ke nakai kaumahala ke he matakutaku. Pehē a ia: “Lagomatai he liogi au ke fakatata ki a Iehova . . . ti manatu e au e fakamafanaaga ia Isaia 66:2, kua ono e Atua ‘ki a ia kua matematekelea mo e loto mamahi.’ Ko e punaaga tumau anei he malolō mo e mafanatia lahi ki a au.” Pihia foki e matakainaga taane ne loga e tau ne nofo tokotaha he poko puipui ne pehē: “Mailoga e au na maeke e poko pakafā tote ke tuga foki e lagi mo e lalolagi katoatoa ka moua he tagata e fakafetuiaga tata lahi mo e Atua.” E, ko e fakafetuiaga tata mo Iehova ne foaki ke he tau Kerisiano tokoua nei e malolō kua lata ke fahia ke he vevehe kehe. (Sala. 9:9, 10) Ko e tau tagata favale kua maeke ke vevehe kehe a laua mai he magafaoa, tau kapitiga, mo e tau matakainaga, ka kua iloa he Tau Fakamoli ne tuku he fale puipui kua nakai fakaai e tau tagata totoko ha laua ke vevehe kehe a laua ia Iehova.—Roma 8:35-39.

Kua aoga mooli mogoia ke fakaaoga e tautolu e tau magaaho oti ke fakamalolō e fakafetuiaga ha tautolu mo Iehova! (Iako. 4:8) Kua lata ia tautolu ke hūhū hifo tumau: ‘Mooli fēfē a Iehova ki a au? Omoomoi lahi nakai he tau kupu haana au he taute e au e tau fifiliaga ikiiki mo e lalahi ke he moui he tau aho takitaha?’ (Luka 16:10) Ka gahua fakamalolō a tautolu ke fakatumau e fakafetuiaga tata ha tautolu mo e Atua, kua nakai fai kakano a tautolu ke matakutaku. Ko e perofeta ko Ieremia ne hukui he vagahau ma e tau Iutaia ne matematekelea, ne talahau: “Iehova na e ne ui atu ke he hau a higoa mai he luo ke he tau mena hokulo . . . Ne fakatata mai a koe ke he aho ne ui atu ai au kia koe; ne pehe mai a koe, Ua matakutaku a koe.”—Aue 3:55-57.

Nakai Kautū e Fakatupu he Tau Tuahā

Ne fakaaoga e Ravesake e tau manatu fakavaia he lali ke fakatupu e tau tuahā. Ne pehē a ia: “Nakai kia ko [Iehova] ne uta kehe ai e Hesekia hana tau mena tokoluga mo e hana tau fatapoa. . . . Ne pehe mai a Iehova kia au, Hake a a koe ke he motu na mo e fakaoti ai e koe a ia.” (2 Patu. 18:22, 25) Ati totoko e Ravesake to nakai tau a Iehova ma e tau tagata Haana ha kua nakai fiafia a Ia ki a lautolu. Ka e nakai mooli e mena ia. Ne fiafia a Iehova ki a Hesekia mo e tau Iutaia ne liliu ke he tapuakiaga mooli.—2 Patu. 18:3-7.

He vahā nei, ko e tau tagata favale taute lagatau ne liga talahau falu he tau vala tala mooli he lali a lautolu ke fakatū e femahaniaki, ka kua fakakeukeu halahū e lautolu e tala mooli ia aki e tau pikopiko he foli ke fakatupu e tau tuahā. Ma e fakatai, ne tala age he falu magaaho ke he tau matakainaga ne tuku he fale puipui ko e matakainaga taane ne taki ke he motu ha lautolu kua fakahui tuai e tua haana ti liga mitaki foki ke taute pihia e lautolu ti tiaki e tau mahani fakamooli ha lautolu. Ka kua kaumahala e tau manatu pihia ke fakatupu e tau tuahā ke he tau Kerisiano kua loto manamanatu.

Manamanatu ke he mena ne tupu ke he matakainaga fifine Kerisiano he Felakutaki II he Lalolagi. He haia he fale puipui, ne fakakite ki a ia e tau fakamauaga ne tohia kua tiaki tuai he matakainaga taane ne malolō fakaagaaga e tua haana. Ne hūhū e tagata kumi tala po kua talitonu e matakainaga fifine ke he Fakamoli ia. Tali he matakainaga fifine, “Ko e [matakainaga taane] ko e tagata nakai mitaki katoatoa ni a ia.” Ne lafi he matakainaga fifine kaeke ke tumau a ia nā ke muitua e tau matapatu fakaakoaga he Tohi Tapu, kua fakaaoga he Atua a ia. “Ka ko e tau talahauaga haana kua fano kehe mai he Tohi Tapu ti kua nakai tuai eke a ia mo matakainaga haaku.” Ne muitua fakailoilo he matakainaga fifine fakamooli ia e tomatomaaga he Tohi Tapu: “Aua neke tua a mutolu ke he tau iki, po ke fanau he tau tagata, nakai ha i ai ha fakamouiaga.”—Sala. 146:3.

He moua e iloilo tonu he Kupu he Atua mo e fakagahua e fakatonuaga i loto ka puipui a tautolu mai he tau manatu fakahehē ka fakalolelole e mauokafua ha tautolu ke fakauka. (Efeso 4:13, 14; Hepe. 6:19) Ti ko e mautauteute ha tautolu ke maeke ke manamanatu fakamitaki he magaaho ka tupetupe, kua lata ia tautolu ke tuku fakamua e totou he Tohi Tapu mo e taute e fakaakoaga fakatagata he tau aho takitaha. (Hepe. 4:12) E, ko e magaaho anei ke fakahokulo e iloilo ha tautolu mo e fakamalolō e tua ha tautolu. Taha e matakainaga taane ne fakauka ke he loga e tau tau he nofo tokotaha ke he poko puipui ne pehē: “Kua manako au ke fakamalolō e tau tagata oti ke fakakite e loto fakaaue kua latatonu ke he tau mena kai fakaagaaga oti ne foaki ki a tautolu, ha kua nakai iloa e tautolu e aoga lahi ki a tautolu he taha magaaho.” Mooli, ka fakaako fakamatafeiga e tautolu e Kupu he Atua mo e tau tohi ne foaki he vahega fekafekau he vahā nei, ka hoko ke he tau magaaho vihi lahi he moui, to maeke e agaga tapu ke ‘fakamanatu foki ki a tautolu’ e tau mena ne ako e tautolu.—Ioane 14:26.

Puipui Mai he Fakahopoate

Ne lali a Ravesake ke fakahopoate e tau Iutaia. “Kia ta mai ā e koe falu a mena ke fakamau aki e fakafua ke he haku a iki ko e patuiki a Asuria,” he talahau e ia, “ti ta atu ai e au kia koe ua e afe e solofanua, kaeke kua maeke kia koe ke ta mai e tau tagata kua lata ke heke ai. Ti maeke fefe kia koe ke vega taha takitaki kau ne muikau kiliku he tau fekafekau he haku iki?” (2 Patu. 18:23, 24) Mai he tuaga he tagata, to nakai fakaai a Hesekia mo e tau tagata haana ke kautū ke he matakautau malolō lahi ha Asuria.

Maeke foki e tau tagata favale he vahā nei ke tuga na malolō lahi mahaki, mua atu ka lalago katoatoa he Fakatufono a lautolu. Pihia mooli e mena ne tupu ke he tau tagata favale ha Nasi he Felakutaki II he Lalolagi. Lali a lautolu ke fakahopoate e tokologa he tau fekafekau he Atua. Taha he tau matakainaga taane ha tautolu ne leva e tuku he fale puipui, ne fakamaama he mogo fakamui e puhala ne fakamatakutaku a ia. He taha magaaho, ne hūhū age e pule ki ai: “Kitia nakai e koe e puhala ne fana e matakainaga taane haau? Ko e heigoa e fakaakoaga ne ako mai e koe he mena ia?” Ko e tali haana: “Ko e fakamoli au ma Iehova mo e to tumau pihia ni au.” “Ti ko koe mogonei ka fana,” he fakamatakutaku he pule. Pete ia, ne tumauokafua ni e matakainaga ha tautolu, ti oti e fakamatakutaku he fī. Ko e heigoa ne fakamalolō a ia ke fehagai ke he fakamatakutaku pihia? Ne tali e ia: “Ne falanaki au ke he higoa a Iehova.”—Fakatai 18:10.

He tua katoatoa ki a Iehova, kua totō e tautolu e akau punuti lahi mahaki ke puipui a tautolu he tau mena oti ne taute e Satani ke fakahagahaga kelea fakaagaaga aki a tautolu. (Efeso 6:16) Ti kua lata ia tautolu ke ole ki a Iehova he liogi ke lagomatai a tautolu ke fakamalolō e tua ha tautolu. (Luka 17:5) Kua lata foki ia tautolu ke fakaaoga fakamitaki e tau fakaholoaga ke fakamalolō e tua ne foaki he vahega fekafekau fakamoli. Ka fehagai mo e tau fakamatakutaku, to fakamalolō a tautolu he liu manatu e fakamafanaaga ne age e Iehova ke he perofeta ko Esekielu ne fehagai mo e tau tagata loto uka. Ne tala age a Iehova ki a ia: “Kua eke e au ke maō e mata hau, ke fehagai ai mo e tau mata ha lautolu, mo e hau a matalē ke maō, ke fehagai ai mo e tau matalē ha lautolu. Kua eke e au hau a matalē ke tuga e samira kua mua hana maō ke he kaumaka uli.” (Eseki. 3:8, 9) Ka latatonu, kua maeke ia Iehova ke lagomatai a tautolu ke maō tuga e samira tuga ne taute ki a Esekielu.

Totoko e Tau Kamatamata

Kua iloa he tau tagata totoko ka kaumahala e tau mena oti, ko e tau palepale fakaohooho kua maeke he falu magaaho ke moumou e mahani fakamooli he tagata. Fakaaoga foki e Ravesake e puhala nei. Pehē a ia ki a lautolu i Ierusalema: “Kua vagahau mai pehe e patuiki a Asuria, Kia eke e tautolu ke mafola a tautolu mo au, ti o mai a a mutolu kia au. . . . Ato fina atu ai au mo e uta a mutolu ke he motu tuga ne motu ha mutolu, ko e motu ne toka ai e saito mo e uaina, ko e motu ne toka ai e areto mo e tau uluvine, ko e motu ne ha i ai e puke lolo olive mo e meli; kia momoui a mutolu ka e aua neke mamate.” (2 Patu. 18:31, 32) Ko e amanaki ke kai he areto foou mo e inu he uaina foou ne liga mitaki lahi mahaki ki a lautolu ne nonofo i loto he tau kaupā he maaga!

Ko e amanakiaga pihia ne lagataha e fakatū he lali ke fakalolelole e fifiliaga he misionare ne tuku he fale puipui. Ne tala age ki a ia to uta a ia ke he “kaina mitaki” he “katene fulufuluola” ke ono e mahina ke maeke a ia ke manamanatu. Pete ia, ne fakatumau e matakainaga taane ke mataala fakaagaaga ti nakai fakahui e tau matapatu fakaakoaga Kerisiano haana. Ko e heigoa ne lagomatai a ia? Fakamaama e ia he magaaho fakamui, “ne fa mahani au ke manamanatu ke he Kautu ko e amaamanakiaga mooli. . . . Ha kua fakamalolō he iloa e kautu he Atua, talia mooli ai, nakai lagataha e tuahā ki ai, ne nakai maueue au.”

Mooli fēfē e Kautu he Atua ki a tautolu? Ko e tupuna ko Aperahamo, ko e aposetolo ko Paulo, mo Iesu ne maeke oti ke fakauka ke he tau kamatamata vihi lahi ha kua moolioli e Kautu ki a lautolu. (Filipi 3:13, 14; Hepe. 11:8-10; 12:2) Ka fakatumau a tautolu ke tuku fakamua e Kautu he tau momoui ha tautolu mo e tokaloto e tau monuina tukulagi i ai, to maeke foki ia tautolu ke totoko e kamatamata ke talia e tau foakiaga he totokaaga fakakū mai he tau kamatamata.—2 Kori. 4:16-18.

To Nakai Tiaki e Iehova a Tautolu

Pete e tau laliaga oti ha Ravesake ke fakamatakutaku e tau Iutaia, ne falanaki katoatoa a Hesekia mo e tau tagata haana ki a Iehova. (2 Patu. 19:15, 19; Isaia 37:5-7) Ati tali e Iehova e tau liogi ha lautolu ma e lagomatai he fakafano atu e agelu ke kelipopo e tau kautau toko 185,000 he heaga api he tau Asuria he taha ni e pō. He aho hake, ne liu atu mafiti a Sanerivi ke he haana maaga lahi ko Nineva, mo e tau kautau haana ne toe.—2 Patu. 19:35, 36.

Maaliali ai, nakai tiaki e Iehova a lautolu ne falanaki ki a ia. Ko e tau fakafifitakiaga he tau matakainaga ha tautolu he vahā nei ne tumauokafua ke he tau kamatamata ne fakakite kua pihia agaia a Iehova he vahā nei. Ko e kakano mitaki mogoia kua fakamafana he ha tautolu a Matua he lagi a tautolu: “Ko au ko Iehova ko e Atua hau, ko ia kua taofi hau a lima matau; ko ia kua pehe atu kia koe, Ua matakutaku a koe ko au ni kua lagomatai kia koe.”—Isaia 41:13.

[Matahui Tala]

[Blurb he lau 13]

Molea e laga 30 he Kupu a Iehova, ne fakamafana e ia e tau fekafekau haana: “Ua matakutaku”

[Fakatino he lau 12]

Tatai fēfē e tau lagatau ha Ravesake mo e tau fī he tau tagata he Atua he vahā nei?

[Tau Fakatino he lau 15]

Ko e fakafetuiaga tata mo Iehova ka maeke ia tautolu ke fakatumau e fakamooli ke he kamatamata