Lekua kua Takitaki ke he Amaamanakiaga

“Ko e tau aho fakamui to hohoko mai ai e tau aho uka.”​—2 TIMOTEO 3:1.

KUA logona​—po ke kitia—​nakai e koe ha mena tutupu momoko pehenā?

● Ko e tatalu hagahaga kelea ne tamate e tau tagata tokologa.

● Ko e hoge ne tamate e tokoteau.

● Ko e mafuike ne mahakava e tokoafe ti tokologa foki kua nakai fai kaina.

He tau lau tohi kua mumui mai, to liu a koe ke manamanatu hokulo ke he falu he tau mena tutupu tuga anei. To kitia foki e koe kua fakakite tuai he Tohi Tapu e tau tuaga pihia ma e magahala ne fakahigoa ko e “tau aho fakamui.”

Ko e kakano he tau vala tala nei mogoia, kua nakai taute a koe ke talitonu na nonofo a tautolu he lalolagi lekua. Liga kitia mata e koe e lekua nei. Ka kua talaga ai ke foaki ki a koe e amaamanakiaga. To fakakite ai ko e kakano he fakamooliaga ke he tau perofetaaga ono nei to nakai leva ti fakaotioti e “tau aho fakamui.” To fakatutala foki e tau fufuta nei ke he tau totokoaga fa mahani ke he fakamooliaga nei mo e to foaki e kakano mitaki ke talitonu kua fai mena mitaki kua tata mai i mua.