Tau Magaaho Mitaki Hane Tata Mai!

“Toe tote, ti nakai ha i ai e tagata mahani kelea . . . Ka ko e tau tagata mahani molu, to eke ma lautolu e motu; ti fakafiafia foki e lautolu a lautolu ha ko e monuina kua lahi.”​—SALAMO 37:10, 11.

MANAKO la nakai a koe ke kitia kua fakamooli e perofetaaga ne talahau i luga? To manako mooli a koe. Ha ha i ai e tau kakano mauokafua he talitonu to tupu mafiti ai.

Ko e tau vala tala fakamua ne fakatutala ke he falu perofetaaga he Tohi Tapu ne fakakite fakamaali kua nonofo a tautolu he “tau aho fakamui.” (2 Timoteo 3:1-5) Omoomoi he Atua e tau tagata tohia he Tohi Tapu ke talahau tuai e tau mena tutupu ia ke maeke a tautolu ke moua e amaamanakiaga. (Roma 15:4) Ko e fakamooliaga he tau perofetaaga ia kua kakano to nakai leva ti fakaoti e tau lekua hane fehagai mo tautolu mogonei.

Ko e heigoa ka mui mai he tau aho fakamui? To pule e Kautu he Atua ke he tau tagata oti kana. (Mataio 6:9) Manamanatu ke he talahauaga he Tohi Tapu ke he tau tuaga he lalolagi he magaaho ia:

● To nakai liu hoge. “To ha i ai e puke aloalolima he tau saito ke he motu, ki luga he fuga mouga; ti gatiti ai hana tau fua.”​—Salamo 72:16.

● To nakai liu tatalu. “To nakai pehe mai foki taha kua nofo ai, Kua gagao au.”​—Isaia 33:24.

● To fakafoou e lalolagi. “To fiafia ha ko lautolu e tutakale, mo e motu nakai fai vai; to olioli e motu taluē, mo e fiti mai tuga ne kaute.”​—Isaia 35:1.

Ko e falu ni anei he tau perofetaaga mafanatia he Tohi Tapu ka nakai leva ti fakamooli. Ko e ha he nakai hūhū ke he Tau Fakamoli a Iehova ke fakakite atu e kakano kua mauokafua lahi a lautolu ke he tau magaaho mitaki hane tata mai?