Perofetaaga 3. Tatalu
“Ko e tau tagata to . . . matematekelea lahi mahaki he tau tatalu.”—LUKA 21:11, Contemporary English Version.
● Ko Bonzali, ko e tagata gahua he faahi malolō tino he motu Aferika ne lauia lahi he tau latau fakamotu, ne tote e mena ne maeke a ia ke tului aki e tau tagata gahua keli kolu he taone haana hane mamate he moko gagao Marburg.a Ko e tau olelalo haana ma e lagomatai mai he tau takitaki gahua he taone lahi ne nakai fai tali. Fā e mahina he mole, ne hoko mai e lagomatai ka kua mate tuai a Bonzali. Ne pikitia a ia he gagao Marburg he tau tagata gahua keli kolu ne lali a ia ke fakamomoui.
KO E HEIGOA NE FAKAKITE HE TAU MENA TUTUPU? Ko e tau lekua he hala fafagu (tuga e nimonia), tau gagao hihī, HIV/AIDS, māmā pala, mo e malaria ko e falu he tau gagao kelea makimaki ne lauia e tau tagata. He tau kua mole, lima e veveheaga gagao nei ne tamate kavi ke he 10.7 e miliona tagata. He tuku he taha puhala, ko e tau gagao ne tamate kavi ke he taha e tagata he tolu e sekone he tau katoa.
KO E HEIGOA E TOTOKOAGA FA MAHANI? Kua matutaki e puke tagata he lalolagi ke tupu, ti loga mooli e tau vahega gagao. Tokologa foki e tagata ka pikitia ai.
AOGA NAKAI E TOTOKOAGA IA? Ko e puke tagata kua tupu lahi mahaki. Ka e pihia foki ke he lotomatala he tagata ke tului, tautaofi, mo e fakamaulu e gagao. Maama ai mogoia, nakai kia lata e gagao ke matutū hifo e lauiaaga ke he magafaoa tagata? Ka kua nakai pihia e mena hane tupu.
KO E HEIGOA E MANATU HAAU? Matematekelea kia e tau tagata he tau tatalu kelea tuga ne talahau tuai he Tohi Tapu?
Ko e tau mafuike, tau hoge, mo e tau tatalu ko e tau mena tutupu hagahaga kelea ne tamate e tau miliona tagata. Totou miliona foki kua matematekelea he falu tagata—tokologa ne lauia noa he tau tagata kua lata ke puipui a lautolu. Mailoga e mena ne talahau he perofetaaga he Tohi Tapu ka tupu.
[Matahui Tala]
a Ko e gagao Marburg Hemorrhagic Fever kua fakatupu he moko kua tatai ke he Ebola.
[Blurb he lau 6]
“Ko e mena matakutakuina ka kai he leona po ke taha mena, ka e tatai ni e matakutakuina ke kai mai hala loto he moko kelea, ti kitia hane tupu viko e mena na ia koe.”—EPIDEMIOLOGIST MICHAEL OSTERHOLM.
[Fakatino Credit Line he lau 6]
© William Daniels/Panos Pictures