Perofetaaga 6. Gahua Fakamatala he Lalolagi Katoa
“To fakamatala atu foki e tala mitaki nai he kautu ke he lalolagi oti.”—MATAIO 24:14.
● Ko Vaiatea ne nofo he aelani mamao i Tuamotu Archipelago he Pasifika. Pete ne teitei 80 e motu ikiiki i Tuamotu he matakavi ne molea e 310,000 sikuea maila (802,900 sikuea kilomita), ha ha i ai e puke tagata ne kavi ke he 16,000 ne nonofo ai. Ka ko Vaiatea mo e tau katofia haana ne feleveia atu ki ai e Tau Fakamoli a Iehova. Ko e ha? Ha kua manako e Tau Fakamoli ke tala age e tala mitaki hagaao ke he Kautu he Atua ke he tau tagata oti—pete ne matakavi kua nonofo ai a lautolu.
KO E HEIGOA NE FAKAKITE HE TAU MENA TUTUPU? Ko e ogo he Kautu kua hoko ke he tau kalakala oti he lalolagi. He 2010 hokoia, ne fakaaoga he Tau Fakamoli a Iehova molea e 1.6 e piliona tulā he fakapuloa e tala mitaki nei ke he 236 e motu. Ko e evalesi a ia he 30 e minuti he gahua fakamatala he Tau Fakamoli takitaha he tau aho oti. He hogofulu tau kua mole, ne taute mo e tufatufa e lautolu molea e 20 e piliona he tau tohi fakaako Tohi Tapu.
KO E HEIGOA E TOTOKOAGA FA MAHANI? Ko e ogo he Tohi Tapu kua fakamatala ke he afe he tau tau.
AOGA NAKAI E TOTOKOAGA IA? Mooli, tokologa kua fakamatala e taha mena ke he ogo he Tohi Tapu. Ka e, laulahi ne taute fakakū ni mo e ke he matakavi tote. Kehe ai, ko e Tau Fakamoli a Iehova kua fakatū e fakatokatokaaga, he matagahua fakamatala he lalolagi katoa kua hokotia ai ke he tau teau miliona tagata. Ne fakamanavalahi e Tau Fakamoli ke he gahua fakamatala ha lautolu pete ne totokoaga matematekelea mai he falu fakatokatokaaga ne mua atu e pule malolō mo e favale lahi ke he fakamauaga tala he tagata.a (Mareko 13:13) Lafi ai, nakai totogi e Tau Fakamoli a Iehova ke fakamatala. Ka e, foaki noa ha lautolu a magaaho, ti foaki ha lautolu a tau tohi nakai fai totogi. Kua lalago katoa e gahua ha lautolu he tau tupe foaki noa.
KO E HEIGOA E MANATU HAAU? Kua fakamatala kia e “tala mitaki nai he kautu” ke he lalolagi oti? Kakano kia e fakamooliaga he perofetaaga nei kua fai mena mitaki hane fakatoka mai i mua?
[Matahui Tala]
a Ma e falu vala tala foki, kitekite ke he tolu e tala vitiō “Faithful Under Trials,” “Purple Triangles,” mo e “Jehovah’s Witnesses Stand Firm Against Nazi Assault,” ne fakatoka mai he Tau Fakamoli a Iehova.
[Blurb he lau 9]
“He fakaatā agaia e Iehova, to fakatumau a tautolu ke fakamatala fakamakutu e tala mitaki he Kautu, he fakaaoga e tau puhala oti ke hokotia ke he tau tagata.”—2010 YEARBOOK OF JEHOVAH’S WITNESSES.