Tau Magafaoa Kerisiano—“Kia Nonofo Tauteute”

“Kia nonofo tauteute a mutolu; ha ko e magaaho nakai manatu ai e mutolu, ke hau ai e Tama he tagata.”—LUKA 12:40.

1, 2. Ko e ha kua lata ke tokaloto e tautolu e tomatomaaga a Iesu “kia nonofo tauteute”?

“KA HAU e Tama he tagata mo e hana lilifu,” mo e vevehe kehekehe “a lautolu,” ko e heigoa ka tupu ki a koe mo e magafaoa haau? (Mata. 25:31, 32) Ha ko e mena to tupu e mena nei he tulā ne nakai manatu a tautolu ki ai, kua aoga mooli ki a tautolu ke tokaloto e tomatomaaga ha Iesu “kia nonofo tauteute”!—Luka 12:40.

² Ko e vala tala fakamua ne fakatutala ke he puhala ka lagomatai he tau tagata takitaha e magafaoa katoa ke mataala fakaagaaga tumau he taute fakahokulo e matagahua haana. Kia fakatutala a tautolu ke he falu puhala ka lafi e tautolu ke he mitaki he tuaga fakaagaaga he magafaoa ha tautolu.

Kia “Mitaki” e Mata Haau

3, 4. (a) Kua lata e tau magafaoa Kerisiano ke leveki mai he heigoa? (e) Ko e heigoa e kakano kia tumau e “mitaki” he tau mata ha tautolu?

³ He tuaga ke mautali ma e hauaga he Keriso, kua lata e tau magafaoa ke fakaeneene ke nakai tauhele mai he tau mena ne putoia e tapuakiaga mooli. Kua latatonu a lautolu ke kalo mai he fuluhi kehe ha ko e tau fakalavelave. Ha ko e velevelemena ko e matahele ne nakai tokogahoa ni e magafaoa ne putoia ai, manamanatu ke he mena ne talahau e Iesu kia tumau e “mitaki” he tau mata ha tautolu. (Totou Mataio 6:22, 23.) Tuga ni e molī ka hulu e puhala ha tautolu mo e fakaatā a tautolu ke o mo e nakai veveli, ko e tau mena ne uta e tautolu ke he “tau mata he tau loto” ha tautolu ka fakamaamatia a tautolu he lagomatai ke o fano mo e nakai tupetupe.—Efeso 1:18.

⁴ Ke kitia mitaki e mata he tino, kua latatonu ke gahuahua mitaki mo e maeke ke mailoga e mena ne onoono ki ai. Nakai kehe mo e tau mata he loto. He moua e mata he loto ne mitaki kua kakano kua taha ni e mena ne hagaaki a tautolu ki ai. He nakai matapatu e moui ke he tau koloa tino mo e kapaletū ke he tau levekiaga fakatino hokoia he magafaoa, kua tokamata tumau a tautolu ke he tau mena fakaagaaga. (Mata. 6:33) Kua kakano e mena nei ke fakatumau a tautolu ke fiafia ke he tau foakiaga fakatino mo e tuku fakamua e fekafekauaga he Atua he tau momoui ha tautolu.—Hepe. 13:5.

5. Fakakite fēfē he tama fifine fuata mui ko e “mata” haana kua hagaaki ke fekafekau ke he Atua?

⁵ Ko e heigoa e tau fua mitaki i ai ka fakaako e tau fanau ke fakatumau e mitaki po ke, fakamukamuka e tau mata! Manamanatu ke he fifitakiaga he tama fifine fuata mui he motu ha Ethiopia. Ne iloilo lahi a ia he tau gahua aoga haana ti hoko ke he fakaotiaga he fakaakoaga haana, ne foaki ki a ia e sikolasipi ke fakalaulahi e fakaakoaga haana. He tokamata a ia ke fekafekau ki a Iehova, ne nakai talia e ia e sikolasipi. Nakai leva he mole, ne foaki ki a ia e gahua ka totogi ai 3,000 euros ($5,589 N.Z.) he mahina—ko e numera lahi he fakatatai mo e evalesi he tau totogi he motu haana. Ka ko e “mata” he tama fifine kua hagaaki ke he gahua paionia. Nakai lata a ia ke fakakia ke he tau matua haana ke nakai talia e gahua. Fēfē e logonaaga he tau matua haana he iloa e mena ne taute he tama fifine ha laua? Ne fiafia lahi a laua ke he tama fifine mo e tala age ki a ia kua matalahi a laua ha ko ia!

6, 7. Ko e heigoa e hagahaga kelea ati lata ia tautolu ‘kia hafagi e tau mata ha tautolu’?

⁶ He maama e tau kupu ha Iesu ne tohi ia Mataio 6:22, 23 ko e hatakiaga ke he velevelemena. Kua fakaaoga he Tohi Tapu e tau kupu ‘mata mitaki’ mo e ‘mata kelea.’ Ko e ‘mata kelea’ ko e velevelemena. (Mata. 6:23) Fēfē e logonaaga a Iehova ke he velevelemena? “Ko e feuaki, mo e tau mena kelea oti, mo e velevelemena, aua neke talahau e tau mena ia ki mua ha mutolu,” he fakakite he Tohi Tapu.—Efeso 5:3.

⁷ He liga mukamuka ke kitia e velevelemena he falu, nakai mukamuka tumau ke mailoga ia tautolu ni. Ti kua pulotu ki a tautolu ke muitua e fakatonuaga a Iesu: “A mutolu [“kia hafagi e tau mata,” NW], kia leveki e mutolu a mutolu neke velevelemena.” (Luka 12:15) Ko e taute pihia kua lata ke kumikumi hifo ki a tautolu ke kitia e tau mena ne hagaaki e tau loto ha tautolu ki ai. Kua lata he tau magafaoa Kerisiano ke manamanatu fakahokulo ke he magaaho mo e tau tupe ne fakamole e lautolu ke he fakafiafiaaga, fakahauhauaga, mo e mouaaga he tau mena fakatino.

8. Ka taute e tau fakatau, maeke fēfē ia tautolu ‘kia hafagi e tau mata ha tautolu’?

⁸ He taute e fakatau kua nakai ni putoia e fifiliaga kua fahia po ke nakai fahia ke fakatau e koloa. Manamanatu ke he tau puhala tuga anei: ‘To fai magaaho nakai au ke fakaaoga tumau e koloa mo e maeke ke leveki tumau ai? Fiha e leva he fakaako ke fakagahua fakamitaki ai?’ Ko mutolu ne ikiiki, ua talitonu ke he tau fakainaina he lalolagi ke fakatau e tau koloa ti manako fakagoagoa ke he tau vahega mena tui po ke falu a koloa ne tauuka. Fakagahua e mahani fakalatalata. Manamanatu foki ke he mouaaga he taha mena ka lauia e mautauteute he magafaoa haau ma e hauaga he Tama he tagata. Kia tua ke he maveheaga a Iehova: “Nakai tuai toka ni e au a koe, nakai tuai tiaki ni e au a koe.”—Hepe. 13:5.

Eketaha ke Moua e Tau Foliaga Fakaagaaga

9. Ko e heigoa he foli ke he tau foliaga fakaagaaga ka taute ma e magafaoa?

⁹ Taha puhala foki ma e tau tagata he magafaoa ke fakamalolō e tua ha lautolu mo e lafi ke he mitaki he tuaga fakaagaaga he magafaoa katoa ko e fakatoka e lautolu e tau foliaga fakaagaaga mo e foli ki ai. Ko e taute pihia ka lagomatai e tau magafaoa ke fuafua e holo ki mua ha lautolu he eketaha ke fakafiafia a Iehova ti maeke ai ke filifilia e tau matagahua kua mua e aoga po ke, mailoga e tau mena kehekehe.—Totou Filipi 1:10.

10, 11. Ko e magafaoa, ko e heigoa e tau foliaga fakaagaaga hane foli a mutolu ki ai, ti ko e heigoa e tau foliaga ka manako a mutolu ke fakatoka ma e anoiha?

¹⁰ Ko e fakatoka foki he tau foliaga ikiiki mooli kua maeke ke moua he laulahi he tau tagata he magafaoa ka tamai e tau fua mitaki. Tuga e fakatai nei, ko e foliaga he fakatutala e lauga he tau aho takitaha. Ko e tau manatu ne talahau he tau tagata he magafaoa ka lagomatai e ulu he magafaoa ke iloa e tuaga fakaagaaga ha lautolu. Ko e foliaga he totou auloa tumau e Tohi Tapu ko e magafaoa kua foaki e magaaho mitaki lahi mahaki ma e tau fanau ke holo ki mua e tau puhala totou ha lautolu pihia mo e maamaaga ke he fekau he Tohi Tapu. (Sala. 1:1, 2) Ti kua nakai kia manako a tautolu ke eke ai mo foliaga ke holo ki mua e aoga he tau liogi ha tautolu? He feaki fakalahi e tau vala he fua he agaaga ka eke foki mo foliaga mitaki lahi mahaki ke foli ki ai. (Kala. 5:22, 23) Ka e kua he kumi e tau puhala ke fakakite e logonaaga fakaalofa ma e tau tagata ne feleveia mo tautolu he fonua? He eketaha e magafaoa ke taute e mena ia ka lagomatai e tau fanau ke iloa ke fakaalofa hofihofi noa, to liga feaki fakalahi e lautolu e manako ke eke mo tau paionia tumau po ke tau misionare.

¹¹ Ko e ha he nakai fakatutala ke he falu foliaga ka foli e koe mo e magafaoa haau? Maeke nakai he magafaoa haau ke fakatoka e foliaga ke lahi e magaaho ke he gahua he fonua? Maeke nakai ia koe ke lali ke fahia ke he tupetupe he fakamatala he telefoni, he puhalatū, po ke tau matakavi pisinisi? Ka e kua e gahua he matakavi ne manako lahi ma e tau tagata fakailoa he Kautu? Maeke nakai he tagata he magafaoa ke fakaako e vagahau foou ke maeke ke talahau e tala mitaki ki a lautolu he falu motu?

12. Ko e heigoa he tau ulu magafaoa ka taute ke lagomatai e tau magafaoa ha lautolu ke tupu fakaagaaga?

¹² Ko e ulu he magafaoa, mailoga e tau vala kua lata ke tupu fakaagaaga e magafaoa haau. Ti fakatoka e tau foliaga pauaki ke hokotia ke he manako ia. Ko e tau foliaga ne fakatoka e mutolu ko e magafaoa kua lata ke mooli mo e ke hokotia ke felauaki mo e tau tuaga mo e tau iloaaga ha mutolu. (Fakatai 13:12) Mooli, ko e gahua ke moua e foliaga uho lahi kua lata ke fai magaaho. Ti fakatau e tau magaaho mai he kitekite televisoni mo e fakaaoga ai ke lata mo e tau mena fakaagaaga. (Efeso 5:15, 16) Gahua fakalahi ke hokotia ke he tau foliaga haau ne fakatoka ma e magafaoa haau. (Kala. 6:9) Ko e magafaoa ne foli ke he tau foliaga fakaagaaga to “kitia ai he tau tagata oti” e mafiti.—1 Timo. 4:15.

Fakatumau e Tapuakiaga he Magafaoa he Afiafi

13. Ko e heigoa e hikiaga ne kamata he fakaholoaga faahitapu he tau feleveiaaga fakapotopotoaga, ti ko e heigoa e tau hūhū kua lata ia tautolu ke manamanatu ki ai?

¹³ Ko e puhala mitaki lahi mahaki he lagomatai e tau magafaoa “kia nonofo tauteute” ke lata mo e hauaga he Tama he tagata ko e hikiaga uho lahi he tau fakaholoaga he feleveiaaga he faahitapu ne kamata ia Ianuari 1, 2009. Ko e latatonu ke fakapotopoto auloa he taha aho kehe ne fakahigoa ko e Fakaakoaga Tohi he Fakapotopotoaga, kua fakaoti ha kua lafi fakalataha e feleveiaaga ia mo e Aoga Fekafekau Fakateokarasi mo e Feleveiaaga Fekafekau. Ko e hikiaga nei ne taute ke foaki ke he tau magafaoa Kerisiano e magaaho ke fakamalolō e tuaga fakaagaaga ha lautolu he fakatoka e afiafi pauaki he tau faahitapu takitaha ma e tapuakiaga he magafaoa. Fai magaaho tuai he mole e hikiaga ia ne fakatoka, ti maeke ia tautolu ke hūhū hifo: ‘Fakaaoga nakai e au e magaaho ne fakaatā ke taute e Tapuakiaga he Magafaoa he afiafi po ke taute e fakaakoaga fakatagata? Kua kautū nakai au ke moua e foliaga he fakaholoaga ia?’

14. (a) Ko e heigoa e matapatu manako he fakatumau e Tapuakiaga he Magafaoa he afiafi po ke fakaako fakatagata? (e) Ko e ha e tuku kehe e afiafi ma e fakaakoaga kua latatonu?

¹⁴ Ko e matapatu kakano he fakatumau e Tapuakiaga he Magafaoa he afiafi po ke magaaho ma e fakaako fakatagata ko e fakatata fakalahi ke he Atua. (Iako. 4:8) Ka fakaaoga e tautolu e magaaho ke fakaako tumau e Tohi Tapu mo e tupu e iloilo hagaao ke he Tufuga, to fakamalolō e fakafetuiaga ha tautolu mo ia. Ko e fakatata lahi atu ha tautolu ki a Iehova, kua lahi atu e fakaohooho ha tautolu ke fakaalofa ki a ia ‘mo e ha tautolu a loto katoa, ha tautolu a agaga katoa, mo e ha tautolu a manatu katoa, mo e ha tautolu a malolo katoa.’ (Mare. 12:30) Mooli, kua makai a tautolu ke omaoma ke he Atua mo e fifitaki a ia. (Efeso 5:1) He tumau e Tapuakiaga he Magafaoa he afiafi mogoia, ko e matapatu vala ke lagomatai e tau tagata oti he magafaoa “kia nonofo tauteute” fakaagaaga he fakatali a tautolu ke he ‘matematekelea lahi’ ne talahau tuai. (Mata. 24:21) Kua aoga lahi ai ke he fakamouiaga.

15. Ko e heigoa he Tapuakiaga he Magafaoa he afiafi ne lauia e felogonaaki he tau tagata he magafaoa?

¹⁵ Ko e fakaholoaga he Tapuakiaga he Magafaoa kua fai foliaga foki—ko e lagomatai he tau tagata he magafaoa ke femataaki lahi. He fakalataha auloa he fakatutala ke he tau mena fakaagaaga he tau faahitapu takitaha ko e lauiaaga lahi ke he puhala ne felogonaaki e tau tagata he magafaoa. Kua femafanaaki e hoa mau ka logona e hoa kua fiafia ke he tau mena uho fakaagaaga ne fakaako tokoua e laua! (Totou Fakamatalaaga 4:12.) Ko e tau matua mo e tau fanau kua tapuaki auloa kua liga fakalataha ke he fakaalofa, ko e “pipi haia ke fakamaopoopo ai.”—Kolo. 3:14.

16. Fakamaama e puhala kua aoga e tau matakainaga fifine tokotolu mai he tuku kehe e afiafi ma e fakaakoaga Tohi Tapu.

¹⁶ Manamanatu ke he tolu e matakainaga fifine fakaagaaga ne aoga mai he fakatokaaga he tuku kehe e afiafi ma e fakaakoaga Tohi Tapu. Pete he nakai ko e magafaoa, ko e tau takape fuakau tokotolu nei ne taha e taone ne nonofo ai ti kua kapitiga mitaki ke he tau tau loga. He manako lahi ke fakalataha auloa mo e he magaaho taha manako ai ke aoga fakaagaaga ka e nakai ni ke he puhala fakafiafia, ne fifili a lautolu ke tuku kehe e afiafi ke feleveia mo e fakaako e Tohi Tapu. Ne kamata a lautolu ke taute e mena nei he fakaaoga e tohi “Bearing Thorough Witness” About God’s Kingdom. “Ne olioli lahi mahaki e mautolu e magaaho ia ti fa molea e tulā he fakaakoaga ha mautolu,” he talahau he taha ia lautolu. “Lali a mautolu ke kitia e tuaga ne lauia e tau matakainaga ha tautolu he senetenari fakamua mo e fakatutala ke he mena ka taute e mautolu i lalo he tau tuaga pihia. Ti lali a mautolu ke fakaaoga ke he gahua he fonua e tau manatu ne fakaako e mautolu he fakatutalaaga. Taute he mena nei ha mautolu a gahua fakamatala he Kautu mo e taute tutaki ke mua atu e fiafia mo e fua mitaki lahi.” Lafi ke he fakamalolō fakaagaaga ha lautolu, kua tamai he fakaholoaga ia ke he tau kapitiga mitaki tokotolu nei e fetataaki lahi foki. “Ne tokiofa e mautolu e fakaholoaga nei,” he talahau e lautolu.

17. Ko e heigoa e tau puhala kua lafi ke he kautūaga he Tapuakiaga he Magafaoa he afiafi?

¹⁷ Ka e kua a koe? Aoga fēfē ki a koe e afiafi ne tuku kehe ma e tapuakiaga he magafaoa po ke fakaako fakatagata? Ka nakai taute tumau, to nakai moua he fakaholoaga e tau foliaga ne fakatoka. Igatia e tagata he magafaoa mo e lata ke mautauteute ke fakaako he magaaho kotofa. Kua nakai lata e tau mena ikiiki ke fakaatā ke fakatauhele e afiafi. Lafi ki ai, ko e tohi fakaako kua lata ke fifili ke he puhala kua aoga ke he fakaakoaga he magafaoa haau. Ko e heigoa ka taute e koe ke eke e tau magaaho fakaako pehēnei ke fiafia? Fakaaoga e tau puhala fakaako lauia mitaki, mo e fakatumau e takatakaiaga ke lilifu mo e mafola.—Iako. 3:18.a

“Kia Mataala” mo e “Kia Nonofo Tauteute”

18, 19. Lata fēfē he iloa kua tata e hauaga he Tama he tagata ke lauia a koe mo e magafaoa haau?

¹⁸ Ko e tau tuaga kelea ue atu he lalolagi kua fakamailoga e vahā ha tautolu kua fakamooli na tali mai he 1914, kua hokotia e lalolagi kelea a Satani ke he tau aho fakamui. Kua tata lahi mahaki mai a Amaketo. Nakai leva to hoko e mogo ke hau e Tama he tagata ke taute e fakafiliaga a Iehova ke he tau tagata mahani kelea. (Sala. 37:10; Fakatai 2:21, 22) Nakai kia lata e mataala ia ke lauia a koe mo e magafaoa haau?

¹⁹ Kua omaoma kia a koe ke he fakatonuaga a Iesu ke tumau e mata haau ke “mitaki”? He foli atu e tau tagata he lalolagi nei ke he tau monuina, talahaua, po ke pule, kua foli nakai e magafaoa haau ma e tau mena fakaagaaga? Gahuahua nakai e fakaholoaga ma e Tapuakiaga he Magafaoa he afiafi po ke magaaho ma e fakaako fakatagata ki a koe? Kua moua kia e koe e tau foliaga ne fakatoka? He fakatutala he vala tala fakamua, kua hahamo nakai e koe e matagahua faka-Tohi Tapu haau ko e taane, hoana, po ke tama, he lagomatai e magafaoa katoa “kia mataala”? (1 Tesa. 5:6) Ka pihia, to “nonofo tauteute” a mutolu ke lata mo e hauaga he Tama he tagata.

[Matahui Tala]

Ko e Heigoa ne Ako e Koe?

• Fakamaama e puhala he tau magafaoa Kerisiano “kia nonofo tauteute” . . .

he “mitaki” e mata.

he fakatoka mo e foli ke he tau foliaga fakaagaaga.

he fakatumau e Tapuakiaga he Magafaoa he afiafi.

[Fakatino he lau 13]

Ko e mata “mitaki” ka fakalagalaga a tautolu ke totoko e tau tauhele fakalalolagi