To Mui Atu Nakai a Koe ke he Takitakiaga Fakaalofa a Iehova?

“Kua vihiatia e au e tau mahani pikopiko oti.”—SALA. 119:128.

1, 2. (a) He kumi e takitakiaga ke hokotia ke he matakavi, ko e vahega hatakiaga fe ka loto fakaaue a koe ki ai, ti ko e ha? (e) Ko e vahega hatakiaga fe kua tuku age e Iehova ki a lautolu kua fekafekau ki a ia, ti ko e ha?

MANAMANATU ke he mena nei: Kua lata ia koe ke fenoga ke he matakavi pauaki. Ma e takitakiaga, fuluhi a koe ke he kapitiga mooli kua iloa e hala. He tala atu fakamatafeiga e ia e tau puhala, liga pehē a ia: “Mataala ke he aafe i mua. Na fakahehē e fakamailoga. Tokologa e tagata ne mumui ki ai ti fakahiku ke galo.” To loto fakaaue nakai a koe ke he manatu haana mo e muitua ke he hatakiaga? He falu puhala, kua tuga e kapitiga ia a Iehova. Kua tuku mai e ia ki a tautolu e tau takitakiaga ke mataala hagaao ke he puhala ke hokotia a tautolu ke he matakavi he moui tukulagi, ka e hataki foki e ia a tautolu ke he tau fakaohoohoaga kelea ka taute a tautolu ke o he puhala hepe.—Teu. 5:32; Isaia 30:21.

² He vala tala nei mo e vala tala ka mui mai, to fakatutala a tautolu ke he falu fakaohoohoaga hagaao ke he hatakiaga he ha tautolu a Kapitiga ko Iehova ko e Atua. Kia tokaloto e tautolu kua tuku mai e Iehova e tau hatakiaga pihia ha ko e manamanatu mo e fakaalofa. Manako a ia ki a tautolu ke hoko ke he matakavi ha tautolu. Kua hukia a ia ke kitia e tau tagata kua mahala ke he tau fakaohoohoaga kelea mo e galo e puhala ha lautolu. (Eseki. 33:11) He vala tala nei, to fakatutala a tautolu ke he tolu e fakaohoohoaga kelea. Fakamua, ko e fakaohoohoaga mai i fafo, ke uaaki ko e fakaohoohoaga mai i loto. Ke toluaki ne nakai mooli; ka kua hagahaga kelea lahi ai. Lata ia tautolu ke iloa e tau fakaohoohoaga nei mo e puhala kua fakaako he ha tautolu a Matua he lagi a tautolu ke totoko atu ki ai. Taha e salamo omoomoi ne pehē ki a Iehova: “Kua vihiatia e au e tau mahani pikopiko oti.” (Sala. 119:128) Pihia nakai e logonaaga haau? O mai la tautolu ke kitia e puhala ka fakahokulo e tau logonaaga pihia mo e fakagahua ai.

Ua ‘Mui Atu ke he Tokologa’

3. (a) Ko e ha kua liga hagahaga kelea ke mui ke he falu tagata o fenoga ka nakai iloa mooli e tautolu e puhala ke o ai? (e) Ko e heigoa e matapatu fakaakoaga aoga kua moua e tautolu ia Esoto 23:2?

³ He loa e fenoga, ko e heigoa haau ka taute ka fakauaua a koe ko e puhala fe ka fano ai? Liga logona hifo e koe e manako ke mui ke he falu tagata o fenoga—mahomo atu ka kitia e koe e malaga ne o he hala taha ia. Kua hagahaga kelea e puhala ia. Mua atu ka nakai gutu atu e tau tagata ia ke he matakavi haau, po ke liga galo foki e hala ha lautolu. Matutaki mo e mena nei, manamanatu ke he matapatu fakaakoaga kua fakavē ke he taha he tau matafakatufono ne age ki a Isaraela i tuai. Ko lautolu kua eke mo tau iki fakafili po ke tau fakamooli ke he tau poakiaga fakatufono ne hataki ke he hagahaga kelea he “mui atu . . . ke he tokologa.” (Totou Esoto 23:2.) Kua mukamuka mooli foki ma e tau tagata nakai mitaki katoatoa ke kaumahala ke he peehiaga he tau tagata tokologa, he fakakeukeu e fakafili tonu. Ka e hagaao ni kia e matapatu fakaakoaga ke nakai “mui atu . . . ke he tokologa” ke he tau poakiaga fakatufono? Nakai pihia.

4, 5. Peehi fēfē ki a Iosua mo Kalepa ke mumui ke he tokologa, ka ko e heigoa ne fakamalolō a laua ke totoko ai?

⁴ Moolioli ai, ko e peehiaga ke “mui atu . . . ke he tokologa” ka lauia a tautolu ke he ha magaaho. Liga tupu fakaofo ai, ti maeke ai ke uka lahi ke totoko. Ma e fakatai, manamanatu ke he peehiaga he tau tagata ne fehagai a Iosua mo Kalepa ki ai he taha magaaho. Ko laua he matakau he tau tagata taane 12 ne o atu ke toko e Motu he Maveheaga. He liliu mai ha lautolu, tokohogofulu he tau tagata taane ia ne hokotaki kelea mo e fakalolelole lahi. Talahau foki e lautolu ko e falu he tau tagata ne nonofo he motu ia ko e tau tagata makimaki ne tupu mai he tau Nifalima, ko e tau fanau he tau agelu totoko mo e tau fifine. (Kene. 6:4) Mogonei, ne goagoa e talahauaga ia. Ko e tau tama taane makimaki ia ne mahani kelea ne tamate he Fakapukeaga he tau senetenari loga fakamua, ti nakai fai fanau ne momoui. Ka e maeke foki he laulahi he tau manatu nakai fai fakavēaga ke fakaohooho a lautolu ne lolelole ke he tua. Ko e tau hokotaki kelea mai he tau toko ne hogofulu ia kua kaputia mafiti e matakutaku mo e vivivivi he tau tagata i ai. Nakai leva, laulahi ne mauokafua ko e hehē ke huhū atu ke he Motu he Maveheaga tuga ne takitaki mai e Iehova. He tuaga fakauaua ia, ko e heigoa ne taute e Iosua mo Kalepa?—Nume. 13:25-33.

⁵ Ne nakai mui atu a laua ke he tokologa. Pete he nakai manako e moto tagata ke logona ai, ne tala age he tau tagata taane tokoua ia e mena mooli mo e pipiki a laua ki ai—pihia foki he fakamatakutaku ke tamate he tauliti maka ki ai! Moua i fe e laua e loto malolō? Nakai fakauaua, ko e vala lahi kua moua mai ai he tua ha laua. Ko e tau tagata ne tua kua kitia maaliali e kehekehe he tau talahauaga nakai fai fakavēaga he tau tagata taane mo e tau maveheaga tapu ha Iehova ko e Atua. Ne talahau he tau tagata taane tokoua he magaaho fakamui e logonaaga ha laua ke he fakamauaga a Iehova he fakamooli e tau maveheaga takitaha haana. (Totou Iosua 14:6, 8; 23:2, 14.) Ne pipiki a Iosua mo Kalepa ke he Atua fakamooli ha laua, ti nakai manamanatu a laua ke fakahukia a Ia he mumui teao ke he tau tagata nakai tua. Ti tumauokafua a laua he fakatoka e fifitakiaga mitaki lahi mahaki ma tautolu he vahā nei.—Nume. 14:1-10.

6. Ko e heigoa e tau puhala kua liga logona hifo e tautolu e peehiaga ke mumui ke he tokologa?

⁶ Kua logona hifo nakai e koe e peehiaga ke mui atu ke he tokologa? Ko e tau tagata kua o kehe mai ia Iehova mo e vaiga haana a tau tuaga he mahani kua fakatū mooli e matakau lahi he vahā nei. Ka hoko ke he fakafiafiaaga mo e okiokiaga, kua fa fakatupu he toloaga ia e tau manatu nakai fai fakavēaga. Liga peehi e lautolu ko e mahani feuaki, favale, mo e taulatua nukua tupu lahi he tau polokalama televisoni, tau kifaga, mo e tau pelē vitiō kua nakai hagahaga kelea. (2 Timo. 3:1-5) Ka fifili e koe e fakafiafiaaga mo e okiokiaga ma haau mo e magafaoa haau, kua fakaatā kia e koe e tau loto manamanatu fakateaga he falu ke fakaohooho e tau fifiliaga haau mo e ke fakahakohako e loto manamanatu haau? Nakai kia kakano e mena ia kua mui atu ke he tokologa?

7, 8. (a) Fakamahani fēfē e tau loto manamanatu ha tautolu, ti ko e ha e fakamahaniaga ia kua aoga lahi he mui teao ke he loga he tau matafakatufono pāpā maō? (e) Ko e ha kua mafanatia a koe he fifitakiaga he tau fuata Kerisiano tokologa?

⁷ Kua foaki mai e Iehova ki a tautolu e mena fakaalofa uho ke lagomatai a tautolu ke taute e tau fifiliaga—ha tautolu a “mahani” po ke, loto manamanatu. Pete ia, kua lata e tau mahani nei ke fakamahani he “ako mua.” (Hepe. 5:14) Ko e mumui ke he tokologa ka nakai fakamahani e tau loto manamanatu ha tautolu; po ke taha faahi, ko e tau matafakatufono pāpā maō loga ke takitaki aki e loto manamanatu. Ko e mena haia, ma e fakatai, kua nakai tuku age ke he tau tagata a Iehova e tohi loagitu he tau kifaga, tau tohi mo e tau faahi Internet ke kalo kehe ai. Ha kua hiki mafiti lahi e tau mahani he lalolagi nei, ko e tohi loagitu ia to nakai leva ti fakafoou he mole e taute ai. (1 Kori. 7:31) Mua atu e kelea, to fofō a tautolu he gahua aoga he fokifoki fakamatafeiga mo e liogi hagaao ke he tau matapatu fakaakoaga he Tohi Tapu ti taute e tau fifiliaga kua fakavē ke he tau matapatu fakaakoaga ia.—Efeso 5:10.

⁸ Mooli, ko e ha tautolu a tau fifiliaga ne fakavē ke he Tohi Tapu kua taute a tautolu ke nakai mahuiga he falu magaaho. Ko e tau fuata Kerisiano he aoga ne liga fehagai mo e peehiaga malolō mai he tokologa ke kitia mo e taute e mena ne kitia mo e taute he falu tagata. (1 Pete. 4:4) Ko e mena ia, kua fulufuluola ke kitia e tau Kerisiano ikiiki mo e momotua hane fifitaki e tua ha Iosua mo Kalepa, he nakai mui atu ke he tokologa.

Ua Mumui Atu ke he “ha Mutolu a Tau Loto mo e ha Mutolu a Tau Mata”

9. (a) He fenoga, ko e ha kua liga hagahaga kelea ke mumui ni ke he tau manako mo e tau manatu ha tautolu? (e) Ko e ha e fakatufono ne moua ia Numera 15:37-39 kua aoga ke he tau tagata he Atua i tuai?

⁹ Ko e fakaohoohoaga hagahaga kelea ke uaaki ka fakatutala a tautolu ki ai ko e fakaohoohoaga mai i loto. Maeke ia tautolu ke fakatai ai ke he puhala nei: Ka fenoga a koe ke he matakavi pauaki, maeke nakai a koe ke manamanatu he fifili ke tuku kehe e mepe haau ti mui noa ni ke he tau manatu haau—liga he aafe ke he tau hala oti ne tuga kua fakakite e tau matakavi fulufuluola? Maaliali ai, ko e muitua ke he tau manatu ia to taofi a koe ke hokotia ke he foliaga haau. He manatu nei, manamanatu ke he taha he tau fakatufono a Iehova ki a Isaraela i tuai. Tokologa he vahā nei kua liga uka ke maama e fakatufono hagaao ke he tuku e afo lanu moana mo e fakahafehafe he tau tapulu ha lautolu. (Totou Numera 15:37-39.a) Ka e kitia nakai e koe e aoga? Ko e omaoma ke he fakatufono ia kua lagomatai e tau tagata he Atua ke fakatumau a lautolu ke kitia maali mo e vevehe kehe mai he tau motu pouliuli ne takatakai ia lautolu. Kua latatonu e mena ia ka manako a lautolu ke moua mo e fakatumau e taliaaga a Iehova. (Levi. 18:24, 25) Pete ia, kua fakakite foki he fakatufono ia e hagahaga kelea he fakaohoohoaga mai i loto ka takitaki kehe a tautolu mai he ha tautolu a matakavi he moui tukulagi. Pihia fēfē?

10. Fakakite fēfē e Iehova e iloaaga ke he aga he tagata?

¹⁰ Mailoga e kakano i tua he fakatufono nei ne age e Iehova ke he tau tagata haana: “Aua neke omaoma a mutolu ke he ha mutolu a tau loto mo e ha mutolu a tau mata ha ko e tau mena ia kua fa feuaki ai a mutolu.” Lahi e iloaaga a Iehova ke he aga he tagata. Iloa mitaki e ia kua mukamuka e tau loto ha tautolu ke fakahehē he tau mena ne kitia aki e tautolu e tau mata. Ti hataki he Tohi Tapu a tautolu: “Kua mua ke he tau mena oti e loto he fakavai, ti gagao lahi ni a ia; po ke maeke kia hai ke iloa a ia?” (Iere. 17:9) Kitia nakai e koe mogoia e latatonu he hatakiaga a Iehova ke he tau Isaraela? Na iloa mitaki e ia to hihiga a lautolu ke onoono ke he tau tagata pouliuli ne takatakai ia lautolu mo e fakahehē he tau mena ne kitia e lautolu. Liga kamatamata a lautolu ke onoono tuga a lautolu ne nakai tua ti manamanatu, logona hifo, mo e mahani tuga a lautolu.—Fakatai 13:20.

11. Ke he puhala fe kua liga fakataki a tautolu ke he ha tautolu a tau logonaaga he tino?

¹¹ He vahā ha tautolu, kua mukamuka lahi foki ke he tau loto fakavai ha tautolu ke fakahehē he tau logonaaga he tino ha tautolu. Kua nonofo a tautolu he lalolagi kua tauteute ke lata mo e onoonoaga ke he tau manako he tino. Ti fakagahua fēfē e tautolu e matapatu fakaakoaga i loto he Numera 15:39? Manamanatu: Ka lahi mahaki e fakataki he tau tauteuteaga he tau tagata ne viko takai ia koe he aoga, he gahuaaga, po ke he maaga, liga lauia nakai a koe? Liga kamatamata kia a koe ke ‘omaoma haau a loto mo e haau a tau mata’ mo e fakahehē ke he tau mena ne kitia e koe? Ti liga kamatamata kia a koe ke tuku ki lalo e tau tuaga haau ni he tauteute tuga a lautolu?—Roma 12:1, 2.

12, 13. (a) Ko e heigoa ha tautolu kua lata ke taute ka hihiga e tau mata ha tautolu ke neva fano ke he tau mena ne nakai lata? (e) Ko e heigoa ka omoi a tautolu ke kalo kehe he eke mo punaaga he kamatamata ke he falu?

¹² Kua lata mafiti a tautolu ke feaki e mahani fakalatalata. Ka neva fano e tau mata ha tautolu ke he tau mena kua nakai lata ki ai, kia manatu e tautolu e fifiliaga mauokafua ha Iopu ne mahani fakamooli, ne taute e maveheaga mooli mo e tau mata ni haana—ko e fifiliaga mauokafua ke nakai onoono he manako loto fakavihi ke he fifine ne nakai ko e hoana haana. (Iopu 31:1) Pihia foki, ne fifili e Patuiki ko Tavita: “Nakai tuku e au ki mua haku ha mena kelea.” (Sala. 101:3) Ko e tau mena ni ka moumou ha tautolu a loto manamanatu mo e ha tautolu a fakafetuiaga mo Iehova ko e “mena kelea” ki a tautolu. To putoia he mena ia e tau kamatamata oti ne futiaki e tau mata ha tautolu mo e fakamatakutaku ke fakataki e tau loto ha tautolu ke taute e mena hepe.

¹³ He taha faahi, to nakai manako mooli a tautolu ke eke ke tuga ko e “mena kelea” ke he falu, he kamatamata a lautolu ke manamanatu ke taute e mena hepe. Ko e mena ia kia uta fakahokulo e tautolu e fakatonuaga omoomoi he Tohi Tapu ke tui e tau mena tui kua lilifu mo e gali. (1 Timo. 2:9) Ko e mahani fakalatalata po ke, gali ne nakai ko e mena ka fakamaama e tautolu ke he puhala kua felauaki mo tautolu. Kua lata ke mailoga e tautolu e tau loto manamanatu mo e tau mena ne hukia mafiti a lautolu ne takai viko ia tautolu, he tuku e manamanatuaga mafola mo e tuaga ha lautolu ki mua he tau manako ni ha tautolu. (Roma 15:1, 2) Kua fakamonuina e fakapotopotoaga Kerisiano aki e tau fuata ikiiki totou afe nukua fakatoka e tau fifitakiaga mitaki lahi ke he mena nei. Kua fakamatalahi mooli e lautolu a tautolu he fakaheu e lautolu ke ‘omaoma ke he ha lautolu a tau loto mo e tau mata,’ he fifili hokoia ke fakafiafia a Iehova ke he tau mena oti kua taute e lautolu—pihia foki ke he puhala tauteute ha lautolu!

Ua Mui Atu ke he “Tau Mena Noa”

14. Ko e heigoa e hatakiaga hagaao ke he kumi ke he “tau mena noa” ne tala age e Samuela?

¹⁴ Manamanatu la ke he fenoga haau kua fano a koe ke he taha faahi he tutakale lahi mahaki. Ko e heigoa ka tupu kaeke ke fano kehe a koe he puhalatū ke kitekite e matakavi? Ko e kitekite ke he matakavi ia ka fakahagahaga kelea e moui haau! Iloa mitaki e Iehova e hagahaga kelea ia. Manamanatu ke he fakataiaga. Ne manako e tau Isaraela ke tuga e tau motu ne takai viko ia lautolu, ne pule ai he tau patuiki he tagata. Ko e manako ia mogoia ko e agahala mate, ha kua hokotia ke he tiaki a Iehova ko e ha lautolu a Patuiki. Pete kua fakaatā e Iehova a lautolu ke moua e patuiki he tagata, kua ha ha ia ia e perofeta ko Samuela ne tala age e hatakiaga fakatonu hagaao ke he kumi ke he “tau mena noa.”—Totou 1 Samuela 12:21.

15. Ke he tau puhala fe ne kumi he tau Isaraela e tau mena noa?

¹⁵ Manamanatu nakai e tau tagata ia to maeke he patuiki he tagata ke mooli lahi ti mauokafua lahi, ka e nakai pihia a Iehova? Ka pihia, kua kumi mooli e lautolu e tau mena noa! Ti kua hagahaga kelea a lautolu he kumi foki e tau mena loga fakasatani. To mukamuka e tau patuiki he tagata ke takitaki a lautolu ke he tapuaki tupua. Ko lautolu ne tapuaki tupua kua taute e hehē he manamanatu ke he tau mena he tino—ko e tau atua ne taute aki e akau po ke maka—kua tuga ke mooli lahi mo e mauokafua lahi ka e nakai ko e Atua ko Iehova ne nakai kitia, nukua tufuga e tau mena oti kana. Ka e talahau he aposetolo ko Paulo “ko e mena noa” e tau tupua. (1 Kori. 8:4) Kua nakai kitia, logona, vagahau, po ke gahua a lautolu. Kua liga maeke a koe ke kitia mo e aamo a lautolu, ka e ka tapuaki a koe ke he taha, to kumi mooli e koe e mena noa—ko e mena fakavai ka fakahiku ke he hagahaga kelea.—Sala. 115:4-8.

16. (a) Fakataki fēfē e Satani e tokologa he vahā nei ke kumi e tau mena noa? (e) Ko e ha ne pehē a tautolu ko e tau mena noa e tau koloa he tino, mua atu he fakatatai ki a Iehova ko e Atua?

¹⁶ Kua makaka agaia a Satani he omoomoi e tau tagata ke kumi e tau mena noa. Tuga anei, ne fakataki e ia e tau tagata tokologa ke onoono ke he tau koloa tino ke foaki e haohao mitaki. Ko e tupe, tau koloa, mo e tau gahua totogi lahi kua liga tamai e tau monuina. Ka ko e heigoa he tau koloa tino kua tamai ka kaumahala e malolō tino, tomo fakatupe, po ke lauia he tau matematekelea tutupu pauaki? Ko e heigoa kua tamai he tau mena ia ka gatigati e tau logonaaga he tau tagata, manako ke fai kakano, takitakiaga, mo e tau tali ke he tau hūhū hokulo ke he moui? Ko e heigoa e totokaaga ka tamai ai he fehagai mo e mate? Ka onoono atu a tautolu ke he tau mena fakatino ke fakapuke e tau manako fakaagaaga, to hogohogo manava a tautolu. Ko e tau koloa fakatino kua nakai tamai ha fakahaoaga; ko e tau mena noa a ia. He vahā loa, kua nakai foaki foki e haohao mitaki fakatino, ha kua nakai fai lauiaaga tukulagi ke he magaaho kū mogonei he moui he tagata, po ke tau mena ne tupu mai he gagao mo e mate. (Fakatai 23:4, 5) Mua atu fēfē mogoia e mooli lahi he ha tautolu a Atua ko Iehova! Ko e fakafetuiaga malolō hokoia mo ia ka moua e tautolu e haohao mitaki mooli. Ko e monuina uho mooli a ia! Kia nakai tiaki e tautolu a ia ha ko e kumi he tau mena noa.

17. Ko e heigoa e fifiliaga haau hagaao ke he tau fakaohoohoaga kelea ne fakatutala a tautolu ki ai?

¹⁷ Nakai kia monuina a tautolu ke eke a Iehova mo Kapitiga mo e Takitaki ha tautolu ke he fenoga ha tautolu he moui? Ka fakatumau a tautolu ke muitua e tau hatakiaga fakaalofa haana he totoko e tau fakaohoohoaga kelea ne tolu—ko e toloaga, ha tautolu a tau loto, mo e tau mena noa—to liga hohoko mooli atu a tautolu ke he matakavi ha tautolu he moui tukulagi. He vala tala ka mui mai, kia fakatutala a tautolu ke he tolu foki e hatakiaga kua foaki e Iehova ke lagomatai a tautolu ke vihiatia mo e kalo kehe he tau puhala fakavai kua takitaki atu e tokologa ke he fakahēhē.—Sala. 119:128.

[Matahui Tala]

Ko e Heigoa Haau a Manatu?

Maeke fēfē ia koe ke fakagahua fakatagata e tau matapatu fakaakoaga ne fakakite he tau tohiaga tapu nā?

• Esoto 23:2

• Numera 15:37-39

• 1 Samuela 12:21

• Salamo 119:128

[Fakatino he lau 11]

Kamatamata kia a koe ke mui ke he tokologa?

[Fakatino he lau 13]

Ko e ha kua hagahaga kelea ke mui ke he manako?

[Fakatino he lau 14]

Hane kumi kia a koe he tau mena noa?