Hoko Mai A Fe e Tauaga ha Amaketo?

“Ti kitia ai e au, kitiala, ko e moto tagata tokologa, kua nakai maeke ia taha ke totou, mai he tau motu oti, mo e tau faoa, mo e tau tagata kehekehe, mo e tau vagahau kehekehe . . . kua o mai mai he matematekelea lahi.”—FAKAKITEAGA 7:9, 14.

KUA mau tuai e fakaholoaga ma e tauaga i Amaketo. Puhala fe?

Kua fitā e ha ha i ai e fakalatahaaga he tau tagata kua fekafekau ki a Iehova mo e momoui fakatatau ke he tau mahani mitaki lahi he Tohi Tapu. He lagomatai he Atua, kua totou miliona mai he tau motu oti, tau magafaoa, mo e tau vagahau kehekehe kua fakapotopoto ke moua e kaufakalatahaaga tagata kua gahua auloa mo e fakaalofa. Ko e kaufakalatahaaga tagata ia kua ha ha he Tau Fakamoli a Iehova.—Ioane 13:35.

To nakai leva ti fakapotopoto mai e Satani e tau kau haana ti totoko fakamalolō lahi atu ke he tau tagata mafola nei ne tuga e tau tagata lolelole. (Esekielu 38:8-12; Fakakiteaga 16:13, 14, 16) Maeke fēfē a koe ke iloa mooli to tupu e mena ia? Kua fakamaama he Tohi Tapu e tau mena tutupu pauaki ka lagomatai a tautolu ke iloa e magaaho ka hoko mai e tauaga i Amaketo. Loga e tau mena tutupu ne fakakite mai i ai kua fitā he fakamooli.

Tau Mena Tutupu ne Kitia e Koe kua Fakamooli

Ne hūhū e tau tutaki ha Iesu ki a ia ko e iloa fēfē he tau tagata e mogo ka tata mai e “fakaotiaga he lalolagi.” (Mataio 24:3) Ne tali e Iesu he tuhi atu ke he magaaho i mua he pehē, “ko e mena to laga e taha motu ke he taha motu, ko e taha kautu ke he taha kautu; to ha ha i ai e tau hoge, mo e tau tatalu, mo e tau mafuike ke he taha mena mo e taha mena.” Ti pehē foki a ia: “Ko e tau mena oti ia ko e kamataaga ia he tau mena matematekelea.” (Mataio 24:7, 8) Ne fakamaama he aposetolo ko Paulo e magaaho nei foki ko e “tau aho fakamui,” he pehē ko e tau aho ia to “hohoko mai ai e tau aho uka.” (2 Timoteo 3:1) Liga mailoga nakai e koe kua fakamaama he tau perofetaaga ia e tau mena kua tutupu he mogonei?

Ko e ha e magahala nei kua uka lahi? Kua foaki he aposetolo ko Ioane e kakano. Ne talahau tuai e ia to ‘tote e vaha’ he tau gahua ha Satani mo e tau temoni haana ka taute ke he lalolagi. Kua fakamaama ai kua “ita lahi” a Satani he magahala nei. (Fakakiteaga 12:7-12) Mailoga nakai e koe e aga ita mo e favale he tau tagata he vahā nei, nakai ni he taha e matakavi ka e he lalolagi katoa?

Ne pehē foki a Iesu he magaaho uka lahi nei, kua lata ai ke taute e gahua kehe ue atu. “[Ko e ] tala mitaki nai he kautu [he Atua],” he talahau e ia, “to fakamatala atu foki . . . ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” (Mataio 24:14) He magahala nei, kua molea e 235 e motu ne fakamatala e Tau Fakamoli a Iehova i ai hagaao ke he tala mitaki ke he Kautu he Atua ke molea e 500 e vagahau. Kua ua e senolo ne fakavē ke he Tohi Tapu ne taute e lautolu, Ko e Kolo Toko mo e Awake!, ko e tau mekasini kua mua atu e loga ne tufatufa atu ke he lalolagi katoa. Kua fakaliliu foki he Tau Fakamoli a Iehova e Tohi Tapu ke he kavi 100 e vagahau. Ko e gahua ha lautolu kua taute he tau tagata gahua foaki noa mo e fakatupe katoatoa ai he tau mena foaki fakaalofa. Ko e matagahua mua atu nei ko e fakamooliaga kia he perofetaaga ha Iesu?

Kua tohi mai foki he Tohi Tapu e tau mena tutupu ka takitaki fakahako atu ke he latauaga ha Iehova ko e Atua mo lautolu kua totoko ki a ia. Fakatutala ke he tolu e perofetaaga ia ka kitia e koe ka fakamooli.

Tau Mena Tutupu ka Nakai Leva ti Kitia Mooli e Koe

Perofetaaga 1. Pehē e Tohi Tapu to foaki he tau motu e fakailoaaga aoga “kua mafola, kua nakai haofia.” Liga kua manamanatu a lautolu kua teitei fakamafola e lautolu e tau lekua lalahi. Ka ko e tau mena tutupu he mole e talahauaga nei to nakai fai mena mafola pihia.—1 Tesalonia 5:1-3.

Perofetaaga 2. Matutaki atu, to fifili e tau fakatufono kehekehe ke totoko ke he tau fakatokatokaaga fakalotu he lalolagi. I loto he Tohi Tapu, ko e tau fakatufono nei kua fakatino he manu favale; mo e tau lotu fakavai he lalolagi, kua fakamailoga he fifine kua heke he tua he manu favale. (Fakakiteaga 17:3, 15-18) Ko e manu favale fakatai to taute tuli e manako he Atua he moumou e tau lotu fakavai ne totoku pikopiko ke hukui e Atua.

Ke he tau fakamailoga, ne fakamaama he aposetolo ko Ioane e mena ne tupu ke he puhala nei: “Ko e tau hoe foki ne hogofulu ne kitia e koe ke he manu favale, to fakavihia e lautolu e fifine fakataka mo e moumou a ia, mo e uta kehe hana tau tapulu, to kai foki e lautolu hana tino, mo e huhunu a ia ke he afi. Ha kua tuku atu he Atua ke he tau loto ha lautolu ke eke hana finagalo.”—Fakakiteaga 17:16, 17.

Perofetaaga 3. Ka mole e totokoaga nei kua kautū ke he lotu fakavai, to fakaaoga e Satani e tau motu ke kelipopo a lautolu kua tapuaki ki a Iehova ko e Atua.—Fakakiteaga 7:14; Mataio 24:21.

To Lauia Fēfē a Koe?

Ka nakaila fai magaaho a koe ke fakaako fakamakutu e Tohi Tapu, to uka a koe ke talitonu kua fitā e tutupu e tau mena ne fakakite i luga. Ka kua fai kakano mitaki ke falanaki ko e tau vala tala matafeiga oti to fakamooli mo e to hohoko e tau mena nei he magaaho kū i mua. Ko e tau fakamauaga loga lahi he tau perofetaaga he Tohi Tapu ne fitā he fakamooli kua fakamafanatia.a

He ha he toka kehe taha magaaho ke kumikumi e kakano kua mauokafua e Tau Fakamoli a Iehova ko e “aho lahi he Atua mana” kua tata lahi mai ti ko e ha kua nakai lata ia koe ke nakai matakutaku ki ai? Fakatutala ai mo lautolu e mena ne talahau he Tohi Tapu kua lata ia koe ke taute ke fakalataha mo lautolu kua puipui e Iehova ko e Atua. (Fakakiteaga 16:14) Ko e tau mena ka fakaako e koe to liga hiki e onoonoaga haau ke he vahā anoiha.

[Matahui Tala]

[Blurb he lau 8]

Fakamooli kia he gahua he Tau Fakamoli a Iehova e perofetaaga he Tohi Tapu?