To Moumou Nakai e Lalolagi?

▪ Ne talitonu falu to moumou e lalolagi ia Oketopa 21, 2011. Ne nakai moumou ai. Ti ko e perofetaaga he tagata fakapuloa leo he letiō U.S. ko Harold Camping ne nakai fakamooli ai. Ne fuafua e ia ko e Aho Fakafili to hoko mai ia Me 21, 2011—to tō e mafuike lahi mahaki toili ke he lalolagi katoa, ti lima e mahina ka mole, ia Oketopa 21, to fakaotioti e lalolagi.

Ka ko e fua lalolagi to nakai moumou. To nakai fakaatā ai he Tufuga he lalolagi. Pehē e Kupu haana: “Ne fakamau e koe e lalolagi, ti tumau ai ni.”—Salamo 119:90.

To liga totoko e falu tagata totou Tohi Tapu, ko e fua lalolagi nei to moumou ai ke he afi. Ne tuhi a lautolu ke he 2 Peteru 3:7, 10 ke lalago aki e manatu ia: “Ka ko e lagi a enei mo e fonua kua fakatoka ha ko e kupu ia ni, kia taofi ma e afi ke he aho ke fakafili ai mo e mahakava ai e tau tagata matahavala. . . . Ka to hau e aho he Iki [Iehova] tuga ne kaiha ke he po, to mole atu e lagi mo e go lahi, ti fak[a]otioti ai foki e tau mena kua eke aki he vela; ko e lalolagi foki mo e tau gahua ha ha i ai to huhunu ni.” Lata kia ke uta fakatino e tau kupu he aposetolo ko Peteru?

Nakai, ai lata. Ai lata he ha? Ha ko e fakakakanoaga he tau kupu nei kua lata ni ke lautatai mo e kakano he tohi ha Peteru mo e Tohi Tapu katoa. Ko e onoonoaga fakatino ke he tau kupu ia kua kakano ko e lagi, po ke lagi mo e lalolagi katoatoa—kua totou piliona mo piliona he tau fetū mo e falu mena foki—to huhunu ke he afi ha ko e tama vala tote itikuhila he mena mahaki foili kua nonofo ai e tau tagata mahani kelea. To moumou kia e koe e mataafaga loa gitu ne ha ha e tau oneone ha kua taha e vala oneone ne ai fia loto a koe ki ai? To nakai fai kakano e mena ia! Ti to nakai moumou foki e Iehova e tau tufugatia oti kana haana he lagi mo e lalolagi katoatoa ha kua mafuta hake e totokoaga he taha he tau gahua tufugatia haana.

Lafi ki ai, ko e onoonoaga pihia kua nakai lautatau mooli mo e tau kupu ha Iesu Keriso, ne pehē: “Uhoaki a lautolu ne mahani molu; ha ko e mena to eke ma lautolu e motu.” (Mataio 5:5; Salamo 37:29) To talaga kia he matua taane fakaalofa e fale hagahaga mitaki ma e magafaoa haana ka mole ia ti tugi ai? (Salamo 115:16) To mamao ligo e mena ia! Kua nakai ni ko e Tufuga a Iehova ka ko e Matua fakaalofa foki.—Salamo 103:13; 1 Ioane 4:8.

Ne fakaaoga e Peteru e kupu “lalolagi” ke he puhala fakatai, he hagaao ke he tau tagata—he tuaga nei ko e tau tagata mahani kelea. Mailoga na fakatatai e Peteru ke he Fakapukeaga he vahā ha Noa. (2 Peteru 3:5, 6) He magaaho ia, ko e tau tagata mahani kelea ni ne moumou; ko e fua lalolagi mo e tagata tututonu ko Noa mo e magafaoa haana ne hao ai. Ke he puhala taha ia, ne fakaaoga e Peteru e “lagi” ke he puhala fakatai foki. He mena nei, ko e “lagi” kua hagaao ke he pule he tagata ke he tau tagata matahavala. Ti ko e tau tagata mahani kelea to galo tukulagi ai, ti pihia foki mo e tau fakatufono, to huhunu ai mo e hukui he pule he Atua mai he lagi, po ke Kautu.—Tanielu 2:44.

Ti to moumou nakai e fua lalolagi? Nakai. Ko e mena ka moumou ko e lalolagi fakatai, po ke tau tagata kelea. Ko e fua lalolagi mo e tau tagata mahani Atua to tumau tukulagi.—Tau Fakatai 2:21, 22.