Tau Hūhū he Tau Tagata Totou

Fēfē e mamate he tau tagata fakamooli he Atua kua “lahi ni ke he manatu a Iehova”?

▪ Ko e salamo ne omoomoi he agaaga ne lologo: “Ko e mena lahi ni ke he manatu a Iehova ka mate hana tau tagata tapu.” (Sala. 116:15) Ko e moui he tau tagata tapuaki mooli oti ha Iehova kua aoga lahi ki a ia. Ka e, mua atu e mate he taha e tagata ko e kakano he tau kupu ne fatiaki laia he Salamo 116.

Ka taute e lauga mauku ma e Kerisiano, kua nakai lata ke fakahagaao e Salamo 116:15 ke he tagata ne mate, pete ni he mate a ia ko e fekafekau fakamooli ha Iehova. Ko e ha? Ha ko e talahauaga he salamo kua lahi atu e kakano. Ha kua uho ke he Atua e mamate he matakau katoa he tau tagata fakamooli haana ti nakai fakaatā e ia e mena ia ke tupu.—Kikite Salamo 72:14; 116:8.

Kua fakamafana he Salamo 116:15 ki a tautolu to nakai fakaatā e Iehova e matakau he tau fekafekau fakamooli haana ke utakehe katoa mai he lalolagi. Kua fakakite mai he fakamauaga he ha tautolu a vahā foou nei e fakauka ha tautolu ke he tau kamatamata matematekelea lahi mo e favale, ti foaki mai e fakamooliaga maaliali to nakai fakaai e Atua ke fakaatā a tautolu ke utakehe katoatoa.

Ha ko e malolō mua ue atu ha Iehova mo e finagalo katoatoa haana, to nakai fakaatā e ia a tautolu ke tatafi kehe katoatoa ko e matakau. Ka fakaatā he Atua e mena ia, to tuga kua mahomo hake e malolō he tau fī haana ki a ia—kua nakai fakaai ke pihia! Ko e finagalo ha Iehova ma e fua lalolagi nei ke nonofo ai e tau tagata kua mahani fakamooli ki a ia to nakai fakakatoatoa ai—ti nakai fakaai foki ke pihia. (Isaia 45:18; 55:10, 11) Ko e fekafekauaga tapu foki ki a Iehova to liga nakai fai foki ke he lalolagi kaeke kua nakai fai tagata ka toe hifo he lalolagi ke tapuaki ki a ia he lotopā he lalolagi he faituga fakaagaaga lahi haana! To nakai fai fakavēaga ma e “lalolagi fou”—ko e tau tagata tututonu ka nonofo he fua lalolagi i lalo hifo he “lagi fou.” (Fakakite. 21:1) To pihia foki e Pule Afe Tau he Keriso, to nakai mooli ka nakai fai tagata he lalolagi ke pule ki ai.—Fakakite. 20:4, 5.

Ko e tuaga mo e higoa he Atua to tuahā ki ai ka fakaatā e ia e tau fī haana ke tatafi kehe e matakau katoa he tau tagata haana he lalolagi. Ka tupu e mena pihia to ilaila e tuaga ha Iehova ko e Pule Katoatoa he Lagi mo e Lalolagi. Lafi ki ai, ha ko e fakalilifu ha Iehova ki a ia mo e haana higoa tapu, to nakai fakaatā e ia ke mamate e tau tagata fakamooli haana ko e matakau. Ti manamanatu ke he mena nei: Ha ko e ‘nakai mahani kelea’ e Atua, to puipui tumau e ia e matakau he tau tagata ne fekafekau fakamooli ki a ia. (Teu. 32:4; Kene. 18:25) Pihia foki, ko e fakaatā ke holoholo kehe e tau fekafekau haana ko e matakau to nakai felauaki mo e Kupu he Atua: “Nakai tiaki e Iehova hana motu [tau tagata] ha ko e hana higoa lilifu.” (1 Samu. 12:22) Mooli ai, “ko e mena nakai toka e Iehova hana motu, ti nakai tiaki e ia hana fonua.”—Sala. 94:14.

Ko e mafanatia ha ia ke iloa ko e tau tagata ha Iehova to nakai utakehe tukulagi mai he lalolagi! Ko e mena ia mogoia, ki a fakatumau a tautolu ke fakamooli ke he Atua, he falanaki ke he maveheaga haana: “Ko e tau kanavaakau oti kua taute ke tau kia koe, nakai monuina ia; ko e tau alelo oti ke taufetoko mo koe ke he fakafiliaga to fakahala ai e koe; ko e tufaaga hanā he tau fekafekau a Iehova, ko e ha lautolu a tututonu foki mai ia au haia, kua talahau mai ai e Iehova.”—Isaia 54:17.

[Blurb he lau 22]

To nakai fakaai e Atua ke fakaatā e tau tagata haana ke utakehe