Fekafekau Fakamoli kia Iehova
“Kua mahani fakamoli a koe [Iehova] kia ia kua fakamoli.”—2 SAMUELA 22:26, NW.
1. Gahua fefe a Iehova mo lautolu ne fakamoli kia ia?
TO NAKAI maeke ke taui a Iehova ke he tau mena oti ne taute e ia ma e hana a tau tagata. (Salamo 116:12) Ko e fulufuluola ha a ia he tau mena fakaalofa fakaagaga mo e tino mo e fakaalofa noa! Ne iloa he Patuiki ko Tavita i Isaraela i tuai to gahua fakamoli e Atua mo lautolu ne fakamoli kia ia. Ne talahau e Tavita ke he lologo ne fati e ia ke he “aho ne laveaki ai e Iehova a ia mai he tau lima ha lautolu oti kana kua fai fi kia ia katoa mo e tau lima [he Patuiki ko] Saulo.”—2 Samuela 22:1.
2. Ko e heigoa e falu a kupu ne fakakite mai he lologo a Tavita ne fakamau he 2 Samuela veveheaga 22?
2 Ne kamata e Tavita hana a lologo (tatai mo Salamo 18) ke he fakahekeaga kia Iehova ko e “haku a fakamoui” ke he tali he liogi. (2 Samuela 22:2-7) Mai he hana a faituga he lagi, ne gahua e Atua ke fakahao hana a tau fekafekau fakamoli mai he tau fi malolo. (2 Samuela 22 Tau kupu 8-19) Ne taui ai a Tavita ke he hana a tutuli he puhala hako mo e tumau ke he tau puhala a Iehova. (2 Samuela 22 Tau kupu 20-27) Ne talahau takitaha ke he tau kupu nei e tau gahua ne taute ke he malolo ne foaki he Atua. (2 Samuela 22 Tau kupu 28-43) Ko e fakahikuaki, ne tokutoku mai e Tavita e tau fakahaoaga mai he tau tagata kumi lekua he hana a motu mo e mai he tau fi he tau motu kehe mo e fakaaue kia Iehova ko e “kolo ke moui a ia ke he hana patuiki; ti mahani totonu a ia kia ia kua fakauku e ia.” (2 Samuela 22 Tau kupu 44-51) Maeke foki ia Iehova ke fakahao a tautolu kaeke ke tutuli e tautolu e puhala hako mo e falanaki kia ia ke he malolo.
Ko e Kakano he Fakamoli
3. Mai he onoonoaga faka Tohiaga Tapu, ko e heigoa e kakano he mahani fakamoli?
3 Ne foaki mai he lologo he fakahaoaga ha Tavita kia tautolu e fakamaloloaga: “Kua mahani fakamoli a koe [Iehova] kia ia kua fakamoli.” (2 Samuela 22:26, NW) Ko e kupu Heperu cha·sidhʹ ne kakano ko e “taha ne fakamoli,” po ke “taha he fakaalofa-totonu.” (Salamo 18:25, NW, matahui tala) Ko e kupu cheʹsedh ne ha ha i ai e manamanatuaga ke he totonu ne fakapiki mo e fakaalofa ke he taha mena ato katoatoa ai e amaamanakiaga. Ne fakakite e Iehova e vahega totonu ia ke he hana a tau fekafekau, ti pihia foki ni he fakakite e lautolu kia ia. Ko e tututonu nei, fakamoliaga tapu ne fakakite mai e “fakaalofa-totonu” mo e “fakaalofa fakamoli.” (Kenese 20:13, NW; Kenese 21:23, NW) Ke he tau Tohiaga Tapu Heleni, ko e “fakamoli” ne ha ha i ai e manamanatuaga tapu mo e lilifu, ne fakakite mai he kupu ho·si·oʹtes mo e kupu hoʹsi·os. Ko e fakamoli pehe nei kua putoia ai e tua mo e tapuakiaga fakamoli mo e kakano ni ke fakamakutu e tapuakiaga mo e gahua fakamitaki e tau gahua ke he Atua. Ko e kakano he fakamoli kia Iehova ko e piki kia ia mo e tapuakiaga malolo ke tuga ni e malolo he pili.
4. Fakakite mai fefe e fakamoli a Iehova?
4 Ne fakakite mai ke he tau puhala loga e fakamoli a Iehova. Tuga a nei, ne fakafili e ia a lautolu ne mahani kelea kakano ni ha ko e fakaalofa fakamoli ma e hana a tau tagata mo e fakamoli ke he fakafiliaga tonu mo e tututonu. (Fakakiteaga 15:3, 4; 16:5) Ko e hana fakamoli ke he maveheaga mo Aperahamo ne fakalagalaga a ia ke fakamanavalahi ke he tau Isaraela. (2 Tau Patuiki 13:23) Ko lautolu ne fakamoli ke he Atua to mauokafua hana a lagomatai ke he fakaotiaga he ha lautolu a puhala fakamoli mo e maeke ke manatu moli e ia a lautolu. (Salamo 37:27, 28; 97:10) Ne fakamalolo a Iesu he iloa e ia ko ia ko e “tagata tapu” mua ue atu he Atua, ti nakai toka a ia i Seoli.—Salamo 16:10; Gahua 2:25, 27.
5. Ha kua fakamoli a Iehova, ko e heigoa hana ne manako ke he hana a tau fekafekau, mo e ko e heigoa e tau huhu kua lata ke manamanatu a tautolu ki ai?
5 Ha kua fakamoli e Atua ko Iehova, ti manako foki a ia ke fakamoli pihia hana a tau fekafekau. (Efeso 4:24) Tuga a nei, kua lata ke fakamoli e tau tagata tane ke lata a lautolu mo e tau kotofaaga ko e tau matakainaga momotua he fakapotopotoaga. (Tito 1:8) Ko e heigoa e tau mena ke fakalagalaga aki e tau tagata a Iehova ke fekafekau fakamoli kia ia?
Fakaaue ke he Tau Mena ne Fakaako
6. Ko e heigoa ha tautolu a logonaaga hagaao ke he tau mena he Tohiaga tapu ne kua fakaako e tautolu, mo e ko e heigoa ha tautolu kua lata ke manatu mai he lotomatala ia?
6 Ko e fakaaue ke he tau mena he Tohiaga Tapu ne fakaako e tautolu ke fakalagalaga aki a tautolu ke fekafekau fakamoli kia Iehova. Ne fakamalolo he aposetolo ko Paulo a Timoteo: “Ka ko koe, kia tumau a koe ke he tau mena kua ako ai e koe, mo e iloa tonuhia e koe, ha kua iloa e koe a ia ne fakaako atu ai kia koe, Tali mai foki he vaha tote kua iloa e koe e tau Tohi Tapu, kua maeke ke fakailoilo a koe ke moua ai e moui ke he tua ha ha ia Keriso Iesu.” (2 Timoteo 3:14, 15) Manatu ko e lotomatala nei mai he Atua ne puhala mai ia he “tupa fakamoli mo e lotomatala.”—Mataio 24:45-47, NW.
7. Fefe e logonaaga he tau matakainaga momotua ke he tau mena kai fakaagaga ne puhala mai he Atua ke he fekafekau fakamoli?
7 Kua lata pauaki he tau matakainaga momotua ne kotofa ke fakaaue ke he tau mena kai mitaki fakaagaga mai he Atua kua puhala mai he tupa fakamoli. Ke he tau tau kua mole ne fai matakainaga momotua ne nakai ha ha ia lautolu e fakaaue nei. Taha e tagata kitekite ne mailoga e ia e tau tagata tane nei ne “lahi e fakafili ke he tau tala he Kolo Toko, mo e nakai manako ke talia e mena ia ko e . . . puhala he kupu moli he Atua, mo e lali tumau ke fakapikitia e falu ke he ha lautolu a tau puhala manamanatu.” Ka e taha e mena, ko e tau momotua fakamoli ne nakai lali ke fakapikitia falu ke tiaki e tau mena kai fakaagaga mai he Atua kua puhala mai he fekafekau fakamoli.
8. Ko e heigoa ka taute e tautolu kaeke ke nakai maama katoatoa e falu matakupu mai he Tohiaga Tapu ne puhala mai he fekafekau fakamoli mo e lotomatala?
8 Ha ko e Tau Fakamoli a Iehova kua tukulele, kua lata ia tautolu oti ke tumau e fakamoli kia ia mo e ke he hana a fakatokatokaaga. Kua nakai lata ia tautolu ke manamanatu ke o kehe mai he maama mitaki he Atua mo e tutuli e puhala totoko ke maeke ke takitaki ke he mate fakaagaga he mogonei ti fakahiku ni ke he fakaotiaga. (Ieremia 17:13) Ka e kua ka uka ia tautolu ke talia po ke katoatoa e fakaaue ke he falu manatu he Tohiaga Tapu ne tuku mai he fekafekau fakamoli? Ti o mai a tautolu ke mailoga mo e fakatokolalo e mouaaga ha tautolu he kupu moli mo e liogi ke he pulotu ke taute aki e kamatamata nei ato hoko ke he fakaotiaga ke tohi mo e fakatonutonu mai e tau mena ia.—Iakopo 1:5-8.
Fakaaue ke he Fakafetuiaga Kerisiano
9. Fefe he fakakite he 1 Ioane 1:3-6 ke lata mo e mahani fefakalatahaaki he tau Kerisiano?
9 Ko e fakaaue mai he loto ke he agaga he fefakalatahaaki ki loto he tau matakainaga Kerisiano e taha fakamaloloaga ke fekafekau fakamoli kia Iehova. Ko e moli, ko e ha tautolu a fakafetuiaga mo e Atua mo Keriso to nakai maeke ke mitaki ka noa mo e agaga nei. Ne tala age he aposetolo ko Ioane ke he tau Kerisiano fakauku: “Ko e mena ne kitekite ki ai a mautolu, mo e fanogonogo ki ai, kua talahau atu ai e mautolu kia mutolu, kia fakafetui [“fefakalatahaaki,” Diaglott] a mutolu mo mautolu; ko mautolu foki kua fakafetui a mautolu mo e Matua, katoa mo e hana Tama ko Iesu Keriso. . . . Kaeke ke tala age a tautolu, kua fakafetui a tautolu fakalataha mo ia, ka e eke e tautolu e tau mahani he pouli, kua pikopiko ai a tautolu, kua nakai eke foki e tautolu e mahani he kupu moli.” (1 Ioane 1:3-6) Hagaao e tuaga he mahani nei ke he tau Kerisiano oti, pete ni ko e lagi po ke lalolagi ha lautolu a amaamanakiaga.
10. Pete ne fai vahaloto vihi a Evotia mo Sunetuke ti uka ke fakamafola, ka e fefe e onoonoaga ha Paulo ke he tau fifine nei?
10 Lahi e gahua kua lata ke maeke ke tumau e agaga fefakalatahaaki. Tuga a nei, ko e tau fifine Kerisiano ko Evotia mo Sunetuke ne uka ia laua ke fakamafola e vihi he vahaloto ha laua. Ne tomatoma e Paulo a laua “kia manamanatu a laua ke he mena taha ke he Iki.” Ne talahau foki a ia: “Kua ole atu foki au kia koe ko e haku a lagomatai fakamoli, kia lagomatai a koe kia laua ha ko laua ne fakamakamaka fakalataha mo au ke he tala mitaki, katoa foki mo Kelemene, mo lautolu oti ne gahua fakalataha mo au, kua tohia ha lautolu a tau higoa ke he tohi he moui.” (Filipi 4:2, 3) Ko e tau fifine mahani Atua nei ne gahua fakamakamaka fakalataha mo Paulo mo e falu foki “ke he tala mitaki,” mo e fakamoli a ia ko e ‘tau higoa ha laua ha ha i ai he tohi he moui.’
11. Kaeke ke ha ha he Kerisiano e vihi fakaagaga, ko e heigoa e mena kua lata ke tokamau he manatu?
11 Ne nakai tau he tau Kerisiano ha pine ke fakakite aki ha lautolu a tau kotofaaga ne taute i loto he fakatokatokaaga a Iehova mo e fekafekau fakamoli fefe a lautolu kia ia. Kaeke ke fai vihi fakaagaga a lautolu, ko e nakai fai fakaalofa ke tiaki noa ha lautolu a tau tau loga ne fekafekau fakamoli kia Iehova! Liga ko ia ko e “lagomatai fakamoli” ko e matakainaga mauokafua e tua ne fiafia ke lagomatai ke he falu. Kaeke ko koe ko e taha motua, ko koe nakai ko e “lagomatai fakamoli,” ne mautali ke foaki e lagomatai ke he puhala fakaalofa hohofi? Kua lata ke manamanatu a tautolu oti ke he tau mitaki ne taute he ha tautolu a tau matakainaga he tua, tuga ni ne taute he Atua, mo e fakaalofa ke lagomatai a lautolu ke hahamo ha lautolu a tau kavega.—Kalatia 6:2; Heperu 6:10.
Nakai Fai Mena ke O ki Ai
12. Ne fakalagalaga he tau talahauaga ha Iesu e ‘tokologa he tau tutaki ke liliu ke he tau mena tuai,’ ka ko e heigoa e tuaga ne tu ai e Peteru?
12 To fakaohooho mai kia tautolu ke fekafekau fakamoli kia Iehova mo e hana a fakatokatokaaga kaeke ke manatu e tautolu e nakai fai mena foki ke o ki ai ke moua e moui tukulagi. Ko e tau talahauaga ha Iesu ati ‘liliu atu ai e falu he hana tau tutaki tokologa,’ ne huhu a ia ke he hana a tau aposetolo: “Po ke fia o kehe foki a mutolu?” Ne tali a Peteru: “Ko e Iki na e, ke o kia a mautolu kia hai? Ha ha ia koe e tau kupu he moui tukulagi. Kua talia e mautolu, mo e iloa tuai e mautolu ko koe ko e Keriso, ko e Tama he Atua moui.”—Ioane 6:66-69.
13, 14. (a) Ko e ha e lotu Iutaia i tuai ne nakai fiafia e Atua ki ai? (e) Ko e heigoa e talahauaga he taha Fakamoli a Iehova ne kua leva lahi e gahua ke he fakapotopotoaga kitia he Atua?
13 Ko e “tau kupu he moui tukulagi” ne nakai ha ha he lotu Iutaia he senetenari fakamua he V.N. Ko e hala lahi hana ko e tiaki a Iesu ko e Mesia. Ke he tau vahega kehekehe he lotu Iutaia ne fakave ni ke he tau Tohiaga Tapu Heperu. Ne fakatikai he tau Satukaio ko e mena ha ha i ai e tau agelu mo e nakai talia foki e liliu tutu mai. Pete ne nakai fetataiaki e tau Farasaio mo lautolu ke he tau mena nei, ne hala a lautolu ke talahau fakavai e Kupu he Atua ha ko e ha lautolu a aga fakamotu ne nakai fai fakaveaga mai he Tohiaga Tapu. (Mataio 15:1-11; Gahua 23:6-9) Ne lili he tau aga fakamotu nei e tau Iutaia mo e uka lahi ke he tokologa ke talia a Iesu Keriso. (Kolose 2:8) Ko e fakamakutu ke he tau ‘kupu toka tuai he hana a tau matua tane’ ne fakamalolo aki a Saulo (Paulo) ha ko e hana goagoa he lahi e favale ke he tau tutaki ha Keriso.—Kalatia 1:13, 14, 23.
14 Ne nakai fiafia e Atua ke he lotu Iutaia, ka e fakamonuina he Atua e fakatokatokaaga he tau tutaki he hana Tama—‘ko e tau tagata kua fakamakutu ke he tau gahua mitaki.’ (Tito 2:14) Ne ha ha agaia ni hinei e fakatokatokaaga ia, ne pehe e Fakamoli kua leva a Iehova. “Kaeke ko e taha e mena ne mua atu e aoga kia au, ko e fakatata tumau ke he fakatokatokaaga a Iehova haia. Kua fakaako mai he tau mena ne tutupu fakamua kia au e nakai tonu ke falanaki ke he fakakakanoaga fakatagata. Ko e magaaho ni ne tumau haku manatu ke he mena ia, ne fakamakamaka a au ke nofo he fakatokatokaaga fakamoli ia. Ka e moua fefe foki he tagata e fiafia mo e fakamonuinaaga he Atua?” Ne nakai fai mena foki ke o ki ai ke moua e fiafia mai he lagi mo e moui tukulagi.
15. Ko e ha ne gahua fakalataha ai mo e fakatokatokaaga kitia a Iehova mo lautolu foki ia ne lago kotofaaga?
15 Kua lata he tau loto ha tautolu ke fakamalolo a tautolu ke gahua fakalataha mo e fakatokatokaaga a Iehova ha ko e mena iloa e tautolu ko ia tokotaha ne takitaki he hana agaga mo e fakapuloa hana higoa mo e amaamanakiaga. Ko e moli, ko lautolu ne hahamo e tau kotofaaga ia ne nakai mitaki katoatoa. (Roma 5:12) “Ti tupu ai e ita a Iehova” kia Arona mo Miriama he kumi kelea ki a Mose mo e nimo ko ia, ka e nakai ko lautolu, ne foaki ki ai e kotofaaga mai he Atua. (Numera 12:7-9) Ko e vaha nei, ne gahua fakalataha e tau Kerisiano fakamoli mo e “tau takitaki” ha ko e mena haia ne manako a Iehova ki ai. (Heperu 13:7, 17) Ko e fakakiteaga he ha tautolu a fakamoli kua putoia ai e o atu tumau ke he aoga faka-Kerisiano mo e tali ke ‘fakalagalaga ai e falu ke he fakaalofa mo e tau gahua mitaki.’—Heperu 10:24, 25.
Feati Hake
16. Ko e manako ke taute e heigoa ma e falu ne fakamalolo aki a tautolu ke fekafekau fakamoli ki a Iehova?
16 Ko e manako ke feati hake ke he falu ke fakalagalaga aki a tautolu ke fekafekau fakamoli kia Iehova. Ne tohi e Paulo: “Kua fakaikaluga e maama, ka kua fakamafana e fakaalofa.” (1 Korinito 8:1) Ha kua fakaikaluga e tau tagata ne ha ha i ai e taha vahega lotomatala, liga ko e kakano pehe a Paulo ko e fakaalofa foki ke ati hake a lautolu ne fakakite e mahani ia. Ko e tohi he tau Perofesa ko Weiss mo English ne pehe: “Ko e tagata ne ha ha i ai e fakaalofa ne fa mahani ke fakakite foki e fakaalofa ki ai. Ko e malolo ke fakakite atu e mitaki mo e fai manamanatuaga ke he tau fahi oti he moui . . . ne mailoga e lauiaaga ati hake ki a ia e tagata ne fakakite e tau manatu ia ti pihia foki ke he tagata ne talia ti moua tokoua e fiafia.” Ka fakakite e fakaalofa, ne ati hake e tautolu e falu mo tautolu foki ni, ke tuga e hagaaoaga he tau kupu ha Iesu: “Kua mua e monuina hana ke foaki atu, ke he monuina hana ke talia mai.”—Gahua 20:35.
17. Ati hake fefe e fakaalofa mo e ko e heigoa hana ka puipui a tautolu ke nakai taute?
17 Ke he 1 Korinito 8:1 ne fakaaoga e Paulo e kupu Heleni a·gaʹpe, kakano ko e tuaga he mahani he fakaalofa. Ne ati hake, ha ko e mena ha ha i ai e fakamanavalahi mo e totonu, kua fakauka ke he tau mena oti, mo e nakai kaumahala. Ne utakehe he fakaalofa nei e tau logonaaga he loto moumou, tuga e fakatokoluga mo e mahekeheke. (1 Korinito 13:4-8) Ko e fakaalofa pihia ke taofi aki a tautolu ke nakai kumi kelea ke he ha tautolu a tau matakainaga, ne nakai mitaki katoatoa tuga ni a tautolu. To puipui a tautolu ke nakai tuga e tau ‘tagata nakai mahani atua’ ne “huhu mai fufu” ke he tau Kerisiano fakamoli he senetenari fakamua. Ko e tau tagata nei ne “fakalialia foki ke he tau iki, mo e vagahau kelea kia lautolu ne lilifu,” ko e moli e eke fakakelea a lautolu ia ko e tau momotua Kerisiano kua fakatapu ne kotofa pauaki e lilifu ke tuku age kia lautolu. (Iuta 3, 4, 8) Ha ko e ha tautolu a fakamoli kia Iehova, o mai a tautolu ke nakai fakaata e tau kamatamata taha ia ke fakakaumahala aki a tautolu.
Totoko ke he Tiapolo!
18. Ko e heigoa ha Satani ne manako ke taute ke he tau tagata a Iehova, ka ko e ha ne nakai maeke ai a ia?
18 Ko e lotomatala kua iloa ha kua iloa e tautolu e manako ha Satani he utakehe e maopoopo ha tautolu ko e tau tagata he Atua kua lata ni ke fakatolomaki ki mua ha tautolu a fakamakamaka ke fekafekau fakamoli kia Iehova. Kua manako lahi a Satani ke utakehe oti e tau tagata he Atua, ti ko e tau fekafekau he Tiapolo he lalolagi ke he falu a magaaho ne kelipopo a lautolu ne tapuaki fakamoli. Ka e nakai fakaata he Atua a Satani ke utakehe oti a lautolu. Ne mate a Iesu ke “fakaoti ai e ia ke he hana matulei a ia ne toka ai e kautu ke mate ai, ko e tiapolo haia.” (Heperu 2:14) Kua fakakaupa e lalolagi ha Satani ke fakagahua ki ai hana malolo tali mai he hana vega hifo mai he lagi he mole atu e Patuiki ha Keriso he 1914. Ke he magaaho tonu a Iehova, to utakehe e Iesu a Satani mo e hana a fakatokatokaaga.
19. (a) Ko e heigoa e poakiaga ne fakakite tuai mai he senolo nei ke he tau tau kua mole ke he tau gahua he Tiapolo? (e) Ke kalo kehe mo e tau hele ha Satani, ko e heigoa ke fakaeneene a tautolu ke he fakafehagaiaga mo e tau matakainaga he tua?
19 Ne poaki mai he senolo nei: “Kaeke ke fakamavehevehe e Satani ko e Tiapolo e tau tagata he Atua, maeke ia ia ke fetoko a lautolu mo e tau na lautolu ni, po ke fakakite mo e fakatupu e tuaga lotokai ke takitaki atu ke he moumouaga he fakaalofa ke he fakapotopotoaga, ti kautu a ia ke kai a lautolu.” (Ko e Kolo Toko, Peritania, Me 1, 1921, lau tohi 134) Kia nakai fakaata e tautolu e Tiapolo ke utakehe e maopoopo ha tautolu, liga ha ko e fakaohooho a tautolu ke eke fakakelea po ke tau na tautolu mo tautolu ni. (Levitika 19:16) Kia nakai toka a Satani ke fakavai a tautolu ke he taha puhala ke fakapakia ne tautolu a lautolu ne fekafekau fakamoli kia Iehova po ke taute ke uka atu ha lautolu a tau momoui. (Fakatatai 2 Korinito 2:10, 11.) Ka e fakagahua e tautolu e tau kupu ha Peteru: “Kia nonofo fakalatalata a mutolu, kia mataala a mutolu ha ko ia kua eke a mutolu mo tau fi hana, ko e tiapolo ia, kua faifano a ia tuga ne leona tagi, kua kumi kia falu ke faiola ai e ia; Kia totoko atu a mutolu kia ia, mo e mauokafua a mutolu ke he tua.” (1 Peteru 5:8, 9) Ka mauokafua ke totoko kia Satani, to maeke ia tautolu ke tumau ha tautolu a monuina ke taha ko e tau tagata a Iehova.—Salamo 133:1-3.
Liogi ke Falanaki ke he Atua
20, 21. Matutaki fefe e liogi mo e falanaki kia Iehova mo e fekafekau fakamoli ki a ia?
20 Ko e liogi mo e falanaki ke he Atua ke lagomatai aki a tautolu ke matutaki tumau e fekafekau fakamoli kia Iehova. Ka mailoga e tautolu kua tali e ia ha tautolu a tau liogi, ti une atu ki mua e tata atu ha tautolu kia ia. Ne fakamalolo mai ke liogi mo e falanaki ke he Atua ko Iehova ke he magaaho ne tohi he aposetolo ko Paulo: “Hanai, kua manako au kia liogi e tau tane ke he tau mena oti, kua nikiti ki luga e tau lima kua nakai hala, kia nakai ita foki ti nakai mahalohalo noa.” (1 Timoteo 2:8) Tuga a nei, e aoga lahi ke he tau matakainaga momotua ke falanaki mo e liogi ke he Atua! Ko e fakakiteaga ni a ia he fakamoli kia Iehova ka fakapotopoto ke fakatutala ke he tau mena ke lata mo e fakapotopotoaga ke lagomatai ke taofi aki e tau fetoko ne nakai fai fakaotiaga mo e tau vale he ita.
21 Ko e liogi mo e falanaki ke he Atua ko Iehova ke lagomatai aki a tautolu ke leveki e tau fakamonuinaaga ke he hana a fekafekauaga. Ne maeke he tagata ne kua fekafekau fakamoli kia Iehova ke talahau pehe: “Ko e ha tautolu a talia fiafia ke he tau kotofaaga oti ne foaki mai ki a tautolu ke he fakatokatokaaga he Atua he lalolagi, mo e ha tautolu a tumau ke he kotofaaga, nakai maueue, ke moua e mamali fiafia he Atua he talia ha tautolu a fakamakamaka. Pete ni ko e liga fakateaga e kotofaaga, ka e tuga ni ne fa mahani ai, ko e gahua fakamoli ke he falu a fekafekauaga ne mua atu e aoga ne nakai maeke ia ke taute, ka nakai ha ha i ai e tau fekau fakateaga. Ti ko e hanai, kaeke ke mahani fakatokolalo mo e fiafia ke tuku lima ke he fakalilifuaga he higoa a Iehova ka e nakai ko e ha tautolu, ti maeke ke fakamoli to tumau a tautolu ke ‘nakai fagahuatia, kia fakamakai nakai noa mo e fua ha mutolu a fakafita ke he gahua ha Iehova.’ ”—1 Korinito 15:58.
22. Lauia fefe ha tautolu a fakamoli ha ko e tau fakamonuiaga loga mai ia Iehova?
22 Ko e moli, ko e tau gahua oti ne fekafekau a tautolu ki a Iehova, ne nakai maeke ia ke taui e tautolu a Iehova ke he hana a fekafekau mai kia tautolu. Ne hagahaga mitaki lahi a tautolu ke he fakatokatokaaga he Atua, ne agaagai e lautolu ko e hana a tau kapitiga! (Iakopo 2:23) Ne fakamonuina e Iehova a tautolu aki e taha, ne moua mai he fakaalofa fakamatakainaga ne hokulo e tau vaka, ti nakai maeke ia Satani ke huo kehe. Ti ko e mena haia ke o mai la ke tumau ha tautolu a fakamoli ke he Matua he lagi mo e gahua fakalataha ko e hana a tau tagata. Ko e mogonei mo e tukulagi, o mai a tautolu ke fekafekau fakamoli kia Iehova.
To Tali Fefe e Koe?
◻ Ko e heigoa e kakano he fakamoli?
◻ Ko e heigoa e falu mena moli ke fakamalolo aki a tautolu ke fekafekau fakamoli ki a Iehova?
◻ Ko e ha kua lata ia tautolu ke totoko e Tiapolo?
◻ Maeke fefe he liogi ke lagomatai a tautolu ke eke ia mo tau fekafekau fakamoli ha Iehova?
[Fakatino he lau 20]
Ne nakai fakaata he tau fekafekau fakamoli a Iehova e ha lautolu a fi tuga e leona ko e Tiapolo ke moumou ha lautolu a taha