Fekafekau Fakamoli Fakalataha mo e Fakatokatokaaga a Iehova

“Kua mahani fakamoli a koe kia ia kua fakamoli.”—2 SAMUELA 22:26, NW.

1, 2. Ko e heigoa falu he tau fakafifitakiaga he mahani fakamoli kua kitia e tautolu oti he fakapotopotoaga?

HE TAHA afiafi pouli kua tauteute he motua e lauga ma e feleveiaaga Kerisiano. Kua manako a ia ke oti mo e okioki; ka e, kua fakatumau ni a ia ke gahua he kumi e tau fakafifitakiaga mo e tau fakataitaiaga faka-Tohiaga Tapu ka hokotia ai ke he tau loto mo e fakamalolo e fuifui mamoe. Ke he po he feleveiaaga, ko e tau matua mategugu tokoua he fakapotopotoaga taha ia kua fiafia ke nonofo i kaina; ka e, kua tauteute e laua e fanau ha laua mo e o atu ke he feleveiaaga. He oti e feleveiaaga, kua fakatutala ai e matakau he tau Kerisiano ke he lauga he motua. Kua kamatamata lahi e taha matakainaga fifine ke talahau ko e lagataha ne fakamamahi he matakainaga tane ia hana tau logonaaga; ka e, kua vagahau mo e nava ni a ia ke he taha he tau manatu ne talahau he motua. Kitia nakai e koe e matutakiaga ia ne ha ha ai he tau tutalaaga nei?

² Ko e matutakiaga ia ko e fakamoli. Kua gahua fakamoli e motua ke lagomatai e fuifui mamoe he Atua; kua o atu fakamoli e tau matua ke he tau feleveiaaga he fakapotopotoaga; kua lagomatai fakamoli he matakainaga fifine e tau motua. (Heperu 10:24, 25; 13:17; 1 Peteru 5:2) E, ke he tau puhala oti he moui, kua kitia e tautolu ne fifili e tau tagata he Atua ke fekafekau fakamoli mo e fakatokatokaaga a Iehova.

3. Ko e ha kua aoga lahi ai ke mahani fakamoli tumau a tautolu ke he fakatokatokaaga a Iehova he lalolagi?

³ He mogo ne onoono hifo a Iehova ke he lalolagi matahavala nei, kua kitia e ia tote lahi e fakamoli. (Mika 7:2) Kua olioli lahi ha e loto hana he magaaho kua kitia e ia e mahani fakamoli he hana tau tagata! E, kua fakafiafia he fakamoli ni hau a ia. Pete ia, kua fakaita ai a Satani, ko e totoko fakamua, mo e fakamoli ai a ia ko e pikopiko. (Tau Fakatai 27:11; Ioane 8:44) Amanaki ai to lali a Satani ke fakalolelole e fakamoli hau ki a Iehova mo e Hana fakatokatokaaga he lalolagi. Kia kitekite la tautolu ke he falu he tau puhala kua taute e Satani e mena nei. Ti kitia mitaki ai e tautolu e puhala ke maeke ia tautolu ke mahani fakamoli tumau ke he fakaotiaga.​—2 Korinito 2:11.

Onoono Tumau Atu ke he Nakai Mitaki Katoatoa ka Moumou e Fakamoli

4. (a) Ko e ha ne mukamuka ke onoono kelea ki a lautolu ne ha ha ai e pule malolo? (e) Kua fakamoli fefe e Koru e nakai mahani fakamoli ke he fakatokatokaaga a Iehova?

⁴ Ka ha ha ai e matakainaga tane ke he tuaga he matagahua, kua liga kitia maali ai hana tau hehe. Kua mukamuka ha ia ke kape ‘e mala akau he mata he ha tautolu a matakainaga, ka e nakai kitia e tautolu ha tautolu’! (Mataio 7:1-5) He manamanatu mau mogoia, ke he tau hehe, ke fanau mai e nakai fakamoli. He fakatai ai, manamanatu ke he kehekeheaga a Koru mo Tavita. Kua lahi mahaki e matagahua kua hahamo e Koru, mo e liga kua mahani fakamoli a ia ke he loga he tau tau, ka e kua fakatokoluga ai a ia. Ne hokotia a ia ke vihiatia e pule malolo a Mose mo Arona, ko e tau kasini fakamua hana. Ka ko Mose kua totonu mua ue atu he tau tagata oti, ati kamata moli ai a Koru ke kumi kelea ki a ia. Ne liga kitia e ia e tau hehe ha Mose. Ko e tau hehe ia, ne nakai fakahako aki e nakai fakamoli a Koru ke he fakatokatokaaga a Iehova. Kua tamate a ia mai he fakalatahaaga he fakapotopotoaga.​—Numera 12:3; 16:11, 31-33.

5. Ko e ha ne liga kamatamata e logonaaga a Tavita ke totoko ki a Saulo?

⁵ Ka kua fekafekau ai a Tavita ki lalo hifo he Patuiki ko Saulo. Lagataha ne eke moli ai e patuiki mitaki ko Saulo ke mahani kelea. Kua lata a Tavita ma e tua, fakauka, mo e pihia mo e falu iloilo ke hao mai he tau totoko mahekeheke a Saulo. Ka e, he magaaho ne ha ha ia Tavita e magaaho ke taui, ne pehe a ia kua “fakamamao e Iehova” a ia, ke taute e gahua nakai fakamoli kia ia kua fakauku e Iehova.​—1 Samuela 26:11.

6. Pete ni e kitia e tautolu e tau lolelole mo e tau hehe he tau motua, ko e heigoa kua lata ke nakai taute e tautolu?

⁶ Kaeke ko e falu hane fa e takitaki ai ia tautolu kua hagahaga ke hepe e fifiliaga, vagahau e tau kupu vale, po ke hagahaga ke fakakite e fiafia tagata, to gugu kia a tautolu ki a lautolu, liga he lafi ke he aga kumi kelea he fakapotopotoaga? To nonofo kehe mai kia a tautolu he tau feleveiaaga Kerisiano ko e puhala he nakai talia? Nakai pihia! Tuga a Tavita, to nakai fakaata e tautolu e tau hehe he falu ke omoi a tautolu ke nakai mahani fakamoli ki a Iehova mo e hana fakatokatokaaga!​—Salamo 119:165.

7. Ko e heigoa e falu he tau gahua fakahehe ne tupu ai he matutaki mo e faituga i Ierusalema, mo e fefe e logonaaga a Iesu ke he mena nei?

⁷ Ko e fakafifitakiaga he tagata kua mua ue atu he mahani fakamoli ko Iesu Keriso, ne fakamaama fakaperofeta ko e [“tagata mahani fakamoli,” NW] a Iehova. (Salamo 16:10) Ko e fakaaoga fakahehe he faituga i Ierusalema kua liga ke taute e fakamoli mo kamatamataaga. Ne iloa e Iesu ko e gahua mo e tau poa he ekepoa ne mua kua fakakite tuai hana a fekafekauaga mo e poa he mate, mo e iloa e ia kua aoga ma e tau tagata ke ako mai he tau mena nei. Ti kua puke a ia he ita tututonu he magaaho ne kitia e ia e faituga kua eke ai mo “ana he tau tagata fofo mena.” Fakalataha mo e pule malolo ne foaki he Atua, kua lagaua e fakamea e ia e faituga.a​—Mataio 21:12, 13; Ioane 2:15-17.

8. (a) Fakakite fefe e Iesu e fakamoli ke he fakatokatokaaga he faituga? (e) Fakakite fefe e tautolu kua fakaaue a tautolu he tapuaki ki a Iehova fakalataha mo e hana a fakatokatokaaga mea?

⁸ Kua lagomatai fakamoli agaia ni e Iesu e fakatokaaga he faituga. Mai he tote, ne fano a ia ke he tau galue he faituga mo e fa fakaako i ai. Ne totogi foki e ia e tukuhau faituga​—pete he nakai ko e gahua moli hana ke taute pihia. (Mataio 17:24-27) Ne nava e Iesu e takape mativa he tuku “hana a tau mena oti ke moui ai” ke he mena ne toka ai e tupe he faituga. Nakai leva he mole atu ai, kua tiaki tukulagi e Iehova e faituga ia. Ka e ato hoko e mena ia, kua mahani fakamoli a Iesu ki ai. (Mareko 12:41-44; Mataio 23:38) Ko e fakatokatokaaga he Atua he lalolagi he vaha nei kua mua atu ke he fakatokaaga Iutaia mo e hana faituga. Ha kua kitia ai e nakai mitaki katoatoa; ko e mena haia ne kua taute e tau hikihikiaga ke he tau magaaho. Ka e nakai fai kua fakamaama aki e matahavala, po ke kua teitei a Iehova ko e Atua ke hukui ai. Kia nakai lata ke fakaata e tautolu ha nakai mitaki katoatoa kua kitia e tautolu i ai ke fakaita a tautolu po ke omoi a tautolu ke moua e aga tuhituhi mo e kelea. Ka e, kia o mai a tautolu ke muitua ai e fakamoli ha Iesu Keriso.​—1 Peteru 2:21.

Tau Nakai Mitaki Katoatoa ha Tautolu Ni

9, 10. (a) Kua fakaaoga fefe he fakatokatokaaga he tau mena a Satani e tau nakai mitaki katoatoa ha tautolu he tataki a tautolu ke he mahani nakai fakamoli? (e) Ko e heigoa hana ne taute e hala kelea lahi mahaki kua lata ke taute?

⁹ Kua lali foki a Satani ke fakatolomaki e nakai fakamoli he fakaaoga ha tautolu a nakai mitaki katoatoa. Ko e fakatokatokaaga he tau mena hana kua gahua ai ke he tau lolelole ha tautolu, he kamatamata a tautolu ke taute e mena kua hepe ke he fofoga a Iehova. Momoko ai, kua totou afe kua mokulu ai ke he mahani kelea he tau tau takitaha. Kua lafi e falu ke he nakai fakamoli nei he takitaki atu ke he moui tu ua, he fakatumau ke he puhala taute mena kelea ka e fakatupua agaia ke fakatumau mo tau Kerisiano tua fakamoli. He tali ke he tau vala tala ke he mataulu tala nei he “Young People Ask . . . ” tau vala he mekasini Awake!, taha e fifine fuata ne tohi: “Ko e tau vala tala ko e tala he moui haku.” Ne feaki fakagalogalo e ia e tau fakakapitiga mo e tau fuata ne nakai fai fakaalofa ki a Iehova. Ko e fua? Kua tohi e ia: “Ne hifo muatua e moui haku ki kelekele, mo e putoia ai au ke he mahani kelea mo e kua moua ai e akonakiaga. Ko e fakafetuiaga haku mo Iehova kua malona, mo e falanaki mai he tau matua haku mo e tau motua kua galo.”b

¹⁰ Ne moua lagomatai mai e fifine fuata nei he tau motua mo e liu atu ai ke he fekafekauaga fakamoli ki a Iehova. Kelea lahi ai, mogoia, tokologa kua matematekelea ke he tau fua kelea mua atu, mo e falu kua nakai liliu mai ke he lotopa. Ko e mitaki lahi ha ia ke mahani fakamoli mo e hola kehe mai he kamatamata he lalolagi kelea nei! Kia logona e tau hatakiaga mai he tau mekasini Watchtower mo e Awake! ke he tau mena pihia tuga e fio fakalalolagi mo e fakafiafiaaga hehe. Kia nakai fai magaaho ke to a koe ke he mahani nakai fakamoli. Ka e kaeke kua to a koe, kia nakai fakatupua ke eke a koe mo tagata kehe. (Salamo 26:4) Ka e, kia kumi lagomatai. Ko e mena haia ne ha ha ai e tau matua mo e tau motua Kerisiano.​—Iakopo 5:14.

11. Ko e ha kua hepe ai ke manamanatu kua nakai fai aoga a tautolu, mo e ko e heigoa e fakatokaaga he Tohi Tapu ka lagomatai a tautolu ke fakahako e onoonoaga ha tautolu?

¹¹ Liga ke fakahagahaga kelea he tau nakai mitaki katoatoa ha tautolu a tautolu ke he falu puhala. Ko e falu ne taute e gahua he nakai mahani fakamoli kua mahala he lali ke fakafiafia a Iehova. Manatu, na taute e Tavita e tau hala kelea lalahi. Ka e, he leva e mate a Tavita, ne manatu e Iehova a ia ko e fekafekau tua fakamoli. (Heperu 11:32; 12:1) Ko e ha? Ha kua nakai mahala a ia he lali ke fakafiafia a Iehova. Kua pehe mai e Tau Fakatai 24:16: “Ko e lagafitu he veli e tagata tututonu, ka e liu tu a ia.” Moli ai, kaeke ke veveli atu a tautolu ke he tau hala ikiiki​—e, he taute lagaloga ai​—ha ko e falu lolelole hane fa e taufetului mo tautolu, liga tututonu agaia ni a tautolu ke he fofoga a Iehova kaeke ke fakatumau a tautolu ke “liu tu”​—ke tokihala fakamoli mo e liu ke he puhala he fekafekauaga mahani fakamoli.​—Fakatatai 2 Korinito 2:7.

Mataala ke he Tau Puhala Kakana he Nakai Fakamoli!

12. Ke he mena tupu he tau Farasaio, takitaki fefe he manatu mao fakamatafakatufono ke he nakai fakamoli?

¹² Hau foki e nakai fakamoli he tau puhala kakana. Kua fakahagahaga ai foki ki ai ko e mahani fakamoli! Ma e fakatai, ko e tau Farasaio he vaha a Iesu kua liga manamanatu ki a lautolu ko e mahani fakamoli lahi mahaki.c Ka e kaumahala a lautolu ke kitia e kehekeheaga he eke ke mahani fakamoli mo e eke ke tapiki mau ke he tau matafakatufono he tagata, ko lautolu haia kua mao mo e vale e fifiliaga. (Fakatatai Fakamatalaaga 7:16.) He mena nei kua nakai mahani fakamoli a lautolu​—ke he tau tagata kua lata ke leveki e lautolu, ke he aga he Fakatufono kua talahau e lautolu ke fakaako, mo e ki a Iehova ni hokoia. Kehe ai a Iesu, kua mahani fakamoli ke he agaga he Fakatufono, ne kua fakave ai ke he fakaalofa. Ti kua ati hake mo e fakamalolo e ia e tau tagata, tuga ni ne talahau tuai mai he tau perofetaaga faka-Mesia.​—Isaia 42:3; 50:4; 61:1, 2.

13. (a) Liga maeke fefe e tau matua Kerisiano ke nakai mahani fakamoli? (e) Kua lata he ha e tau matua ke kalo kehe mai he akonakiaga kua molea e vale, tuhituhi, po ke kelea ha lautolu a fanau?

¹³ Ko e tau Kerisiano mo e fuafuaaga he pule malolo kua lagomatai lahi mai he fifitakiaga a Iesu ke he mena nei. Ma e fakatai, kua iloa he tau matua mahani fakamoli kua lata ke akonaki ha laua a fanau. (Tau Fakatai 13:24) Ka kia manatu e laua ke nakai fakahogohogo e laua e fanau ikiiki ha laua aki e akonakiaga mao he taute ai ke he ita po ke he peehi tumau he tuhituhi. Ko e fanau kua logona kua nakai maeke a lautolu ke fakafiafia e tau matua ha lautolu po ke logona ko e tapuakiaga he tau matua ha lautolu kua tuga ni ke taute a lautolu ke kelea mo e tuhituhi kua eke moli mo fakalolelole, ti ko e fua, kua o kehe mai he tua moli.​—Kolose 3:21.

14. Kitia moli fefe e mahani fakamoli he tau leveki mamoe Kerisiano ke he fuifui ne leveki e lautolu?

¹⁴ Tatai ai, ko e tau motua Kerisiano mo e tau leveki faifano kua onoono atu ke he tau mena vihi mo e tau hagahaga kelea kua fehagai mo e fuifui mamoe. Ha ko e tau leveki mamoe mahani fakamoli, kua foaki e lautolu e fakatonuaga he magaaho kua lata, he kitia moli ai kua ha ha ia lautolu e tau mena moli oti fakamua mo e fakave fakamitaki e mena kua talahau e lautolu ke he Tohi Tapu mo e tau tohi he Sosaiete. (Salamo 119:105; Tau Fakatai 18:13) Kua iloa foki e lautolu, kua falanaki e tau mamoe ki a lautolu ma e ati hakeaga mo e fagaiaga fakaagaga. Ti kua kumi a lautolu ke fifitaki a Iesu Keriso, ko e Leveki Mamoe Mitaki. Kua fekafekau fakamoli a lautolu ke he tau mamoe he fahi tapu ke he taha fahi tapu he tau feleveiaaga Kerisiano​—nakai he hehe hifo a lautolu ki lalo, ka e, ati hake a lautolu mo e fakamalolo ha lautolu a tua.​—Mataio 20:28; Efeso 4:11, 12; Heperu 13:20, 21.

15. Fakakite fefe he falu he senetenari fakamua kua huhui e lautolu e tau fakamoli?

¹⁵ Ko e taha puhala kakana he nakai fakamoli ko e huhui e mahani fakamoli. Ko e fakamoli kua moli ke he puhala faka-Tohiaga Tapu kua nakai fakaata he tuku mua e tautolu ha omaoma i mua he fakamoli ha tautolu ke he Atua ko Iehova. Tokologa he tau Iutaia he senetenari fakamua kua tapiki fakamao ke he Fakatufono faka-Mose mo e fakatokatokaaga he tau mena faka-Iutaia. Ka e hoko mai ni e magaaho a Iehova ke hiki hana a fakamonuinaaga mai he motu totoko ia ke he motu Isaraela fakaagaga. Tokofiha maka ni ne mahani fakamoli ki a Iehova mo e felauaki ai mo e hikihikiaga aoga nei. Ti pihia foki mo e tau Kerisiano moli, falu he tau Iutaia kua liliu tumau ke he “tau kupu fakamau kua mama mo e fakateaga” he Fakatufono faka-Mose, ne kua fakamoli ai ia Keriso.​—Kalatia 4:9; 5:6-12; Filipi 3:2, 3.

16. Tali atu fefe e tau fekafekau fakamoli a Iehova ke he tau hikihikiaga?

¹⁶ He kehe ai, ko e tau tagata a Iehova he tau vaha fou nei kua fakakite e lautolu a lautolu ke mahani fakamoli ke he tau magaaho he hikihikiaga. Ha kua fakatumau ai e maama he kupu moli kua fakakite ke maama lahi, kua taute ai e tau hikihikiaga. (Tau Fakatai 4:18) Nakai la leva, ko e “fekafekau fakamoli mo e loto matala” kua lagomatai a tautolu ke hakahaka e maamaaga ha tautolu ke he kupu “hau” ne fakaaoga he Mataio 24:34 mo e magaaho he fakafiliaga he “tau mamoe” mo e “tau koti” ne talahau he Mataio 25:31-46, mo e pihia foki mo e onoonoaga ha tautolu ke he taha vahega fekafekauaga tagata noa. (Mataio 24:45) Nakai fakauaua ai to fiafia ai falu tagata tiaki e taofiaga kaeke ke tokologa e Tau Fakamoli a Iehova ka tapiki fakamao ai ke he maamaaga fakamua he tau mataulu tala ia mo e nakai manako ke tolomaki ki mua. Nakai la fai mena pihia kua tupu. Ko e ha? Ha kua mahani fakamoli e tau tagata ha Iehova.

17. Liga tuku fefe e lautolu kua ofania ha tautolu a mahani fakamoli ke he kamatamata he tau magaaho?

¹⁷ Ko e huhui he tau mahani fakamoli kua lauia lahi ai a tautolu. He magaaho ka fifili e kapitiga fakahele po ke tagata he magafaoa ke moumou e tau matapatu fakaakoaga he Tohi Tapu, kua mavehevehe a tautolu ha ko e tau fakamoli. Na pauaki ai e logonaaga fakamoli ha tautolu ke he tau tagata he magafaoa. Ka e kua nakai lata ke tuku e omaoma ha tautolu ki a lautolu i mua he ha tautolu a mahani fakamoli ki a Iehova! (Fakatatai 1 Samuela 23:16-18.) Na kua lata ia tautolu ke lagomatai e tagata taute kelea ke fakakite e hala kelea lahi mahaki po ke kau fakalataha mo lautolu ke he tau momotua hane fa e lali ke ‘liuaki mai a lautolu mo e loto he mahani molu.’ (Kalatia 6:1) He taute pihia ko e nakai mahani fakamoli a ia ki a Iehova, hana fakatokatokaaga, mo e ki a ia kua ofania. Pete ni ia, ko e tu he vahaloto he tagata hala mo e akonakiaga kua lata mo ia, kua taofi ai e fakakiteaga he fakaalofa a Iehova ke hokotia atu ki a ia. (Heperu 12:5-7) Manatu, foki, “kua fakamoli e kapitiga he fakakafokia mai e ia.” (Tau Fakatai 27:6) Ko e fakatonuaga fakahako mo e fakaalofa kua fakave ke he Kupu he Atua liga kua fakakafokia e fakatokoluga he tagata ofania kua hehe, ka e liga ke fakahao moli e moui he vaha loa i mua!

Fakatumau e Fakamoli Pete Ni e Favaleaga

18, 19. (a) Ko e heigoa e manako a Ahapo ki a Napota, mo e ko e ha ne nakai talia ai e Napota? (e) Kua fua mitaki nakai e fakamoli a Napota? Fakamaama.

¹⁸ Falu magaaho ko e keliaga a Satani ke he fakamoli ha tautolu kua hau fakahako. Manamanatu ke he mena kua tupu ki a Napota. He mogo ne peehi malolo he Patuiki ko Ahapo a ia ke fakafua e ulu vine hana, ne tali a ia: “Kia fakamamao e Iehova ia au ke ta atu ai e au kia koe e tufaaga he haku a tau matua.” (1 Tau Patuiki 21:3) Nakai ulu mao a Napota; ka kua mahani fakamoli a ia. Kua poaki he Fakatufono faka-Mose ke nakai fai Isaraela ke fakafua tukulagi e kelekele kua tupu mai fakahaga he tau matua. (Levitika 25:23-28) Ne iloa moli e Napota to kelipopo he patuiki favale nei a ia, ha kua fita he fekau e Ahapo hana hoana, ko Iesepela, ke keli e tau perofeta tokologa a Iehova! Ka kua mauokafua a Napota.​—1 Tau Patuiki 18:4.

¹⁹ Kua totogi fakahako e mahani fakamoli he falu magaaho. Mo e lagomataiaga he “tau tagata kolokolovao” a Iesepela ke tukupau a Napota ma e holifono ne nakai taute e ia. Ti ko e fua, kua tamate ai a ia mo e hana tau tama tane. (1 Tau Patuiki 21:7-16; 2 Tau Patuiki 9:26) Kua kakano kia e mena ia kua hepe e fakamoli ha Napota? Nakai! Kua fakalataha ai a Napota mo e tau tagata tane mo e tau fifine tokologa mahani fakamoli ne kua “momoui” he manamanatuaga a Iehova he mogonei, kua momohe haohao mitaki he tukuaga ato hoko e magaaho he liu tu mai.​—Luka 20:38; Gahua 24:15.

20. Maeke fefe e amaamanakiaga ke lagomatai a tautolu ke tumau e fakamoli?

²⁰ Ko e maveheaga taha ia kua age e mauokafua ke he tau tagata mahani fakamoli a Iehova he vaha nei. Iloa e tautolu to uka lahi mahaki e mahani fakamoli ha tautolu he lalolagi nei. Ne totogi e Iesu Keriso aki e moui hana e fakamoli hana, ti tala age a ia ke he tau tutaki hana to nakai kehe e mena ka tupu ki a lautolu. (Ioane 15:20) Ha ko e fakatumau hana ke he amaamanakiaga hana ma e vaha anoiha, kia pihia foki a tautolu he fakatumau ha ko e ha tautolu ni. (Heperu 12:2) Ti maeke ia tautolu ke mahani fakamoli tumau he fehagai mo e tau puhala oti he favaleaga.

21. Ko e heigoa e tau fakamoliaga kua foaki e Iehova ke he hana tau tagata mahani fakamoli?

²¹ Moli, tokogahoa a tautolu he vaha nei kua matematekelea ha ko e tau keliaga fakatonu pihia he ha tautolu a fakamoli. Ka e ko e tau tagata he Atua kua fehagai moli mo e loga he tau favaleaga ato hoko mai e fakaotiaga. Iloa moli fefe e tautolu ke tumau ha tautolu a fakamoli? He fakatumau ke mahani fakamoli he mogonei. Kua mai e Iehova e poakiaga mua atu ki a tautolu ​—ke fakamatala mo e fakaako hagaao ke he hana Kautu. Kia fakamoli tumau a tautolu ke he gahua aoga nei. (1 Korinito 15:58) Ka nakai fakaata e tautolu e nakai mitaki katoatoa he tagata ke moumou ha tautolu a fakamoli ke he fakatokatokaaga a Iehova mo e kaeke ke puipui mai a tautolu he tau puhala kakana pihia he nakai mahani fakamoli tuga e huhui e tau mahani fakamoli, ti kua mitaki ni a tautolu ke mau tauteute neke kamatamata fakalahi ha tautolu a fakamoli. He ha mena ni, kia tuku tumau e falanakiaga ha tautolu ko e to nakai kaumahala e mahani fakamoli a Iehova ke he hana tau fekafekau fakamoli. (2 Samuela 22:26) E, to puipui e ia hana tau tagata mahani fakamoli!​—Salamo 97:10.

[Tau Matahui Tala]

To Tali Fefe e Koe?

◻ Kalo kehe fefe a tautolu he fakaata e tau nakai mitaki katoatoa he falu ke takitaki a tautolu ke nakai fakamoli?

◻ Ko e heigoa e tau puhala he tau nakai mitaki katoatoa ha tautolu ni ka liga takitaki a tautolu ke he tau mahani nakai fakamoli?

◻ Maeke fefe ia tautolu ke kalo kehe mai he hagahaga ke huhui e tau mahani fakamoli ha tautolu?

◻ Ko e heigoa ka lagomatai a tautolu ke tumau e fakamoli pete ni ke he tau magaaho he favaleaga?

[Puha he lau 21]

Fekafekau Fakamoli he Peteli

“Kia eke e tau mena oti mo e fulufuluola mo e taute fakamitaki.” Tohi pihia ai he aposetolo ko Paulo. (1 Korinito 14:40) Ne iloa e Paulo ke holo e fakapotopotoaga, kua lata ke ha ha ai e “taute fakamitaki,” ma e fakatokatokaaga. Tatai ke he vaha nei, kua taute he tau motua e tau fifiliaga ke he tau mena kua aoga lahi, tuga he kotofa e tau tagata he fakapotopotoaga ke he tau matakavi kehekehe he fakaakoaga tohi, fakatokatoka e tau feleveiaaga ma e gahua he fonua, mo e fakakia e matakavi kua gahua. Ko e tau taute fakamitaki pihia kua mahani ai ke fakatu e tau kamatamata he mahani fakamoli. Nakai ko e tau poakiaga omoomoi faka-Atua, mo e kua nakai talia oti ai ke he tau manako he tau tagata takitokotaha.

Ko e kamatamata kia e mena ia ki a koe ke he tau magaaho, ke mahani fakamoli ke he falu he tau taute fakamitaki lahi ne eke he fakapotopotoaga Kerisiano? Kaeke ke pihia, to moua e koe e fakafifitakiaga he Peteli ke lagomatai lahi. Ko e higoa Peteli, ko e kupu Heperu kua kakano “Fale he Atua,” kua age ke he tau la oti ne 104 he Sosaiete he Kolo Toko, fakalataha mo e matapatuaga he U.S.* Ko e tau tagata gahua noa kua nonofo mo e gahua he tau kaina Peteli kua manako ke he tau kaina nei ke fakaata e lilifu mo e tokoluga ue atu ma Iehova. Ti kua lata ke mahani fakamoli he vala ha tautolu takitokotaha.

Ko e tau tagata aahi atu ke he Peteli kua fa mahani ke talahau hagaao ke he maopoopoaga mo e meaaga kua kitia e lautolu i ai. Kua maopoopo mo e fiafia e tau tagata gahua; ko e tau vagahau mo e tau mahani ha lautolu, ti pihia foki mo e tau tauteuteaga ha lautolu kua fakakite e tau manamanatuaga Kerisiano motua mo e fakamahani he Tohi Tapu. Kua pipiki fakamoli e tau tagata oti he magafaoa Peteli ke he tau tuaga he Kupu he Atua.

Lafi ki ai, kua foaki he Kau Fakatufono ki a lautolu e tohi ne mataulu Dwelling Together in Unity, ne kua fakatoka totonu mai e falu taute fakamitaki ne aoga ke lata ma e magafaoa lahi ke gahua auloa ai. (Salamo 133:1) Tuga nei, kua lauia ai e tau poko nonofo, tau mena kai, fakameaaga, tau mena tui mo e tauteuteaga, mo e tau mena tuga a ia. Ko e tau tagata he magafaoa Peteli kua lagomatai fakamoli mo e pipiki ke he tau taute fakamitaki pihia, pete ni he takitaki he manako fakatagata ha lautolu a lautolu ke he taha puhala. Kua onoono a lautolu ke he tohi nei, nakai ko e loga he tau matafakatufono mo e tau poakiaga mao, ka e ko e tau fakaakoaga aoga lahi kua taute ke fakaholo ki mua e kaufakalataha mo e auloaaga. Kua mahani fakamoli e tau leveki he toto mau e tau fakaholoaga nei kua fakave ke he Tohi Tapu, ti kua fakaaoga ai e lautolu ke he puhala mitaki ke ati hake mo e fakamalolo e magafaoa Peteli ke fakatumau ke he fekafekauaga tapu ha lautolu he Peteli.

* Ko e fale gahua, ofisa, mo e tau kaina nonofo nei kua nakai fakatu e faituga fakaagaga lahi mahaki he Atua, po ke fale. Ko e faituga fakaagaga he Atua ko e mena taute fakamitaki hana ma e tapuakiaga mea. (Mika 4:1) Tuga ia, kua nakai fakakaupa ke he ha talagaaga he lalolagi.

[Puha he lau 22]

Ko e Tagata Fakamoli mo e Tagata Mao Fakamatafakatufono

He 1916 kua mailoga he Encyclopædia of Religion and Ethics ko e “kehekeheaga nei he vahaloto he tagata fakamoli mo e tagata mao fakamatafakatufono kua liga kitia ke he tau magaaho oti mo e ke he tau matakavi oti.” Kua fakamaama ai: “Ha i ai e tagata mao fakamatafakatufono kua taute e mena ne tala age ki a ia ke taute, nakai moumou e tau matafakatufono; kua falanaki tumau a ia ke he kupu kua tohia mo e tapiki mau ki ai. Ha i ai e tagata fakamoli kua taute e mena nei ka e maeke ke . . . falanaki foki ki ai ke he tau mena loga, kua tuku katoatoa hana manamanatuaga ke he hana a matagahua, kua taute hana aga ke fakatatai atu mo e aga he kakano ke taute.” Fakamui, ko e gahua taha nei kua kitia ki ai: “Ke mahani fakamoli kua mua atu ai ke he omaoma matafakatufono. . . . Kua kehe mai e tagata mahani fakamoli he tagata omaoma matafakatufono ha kua gahua ai a ia mo e loto mo e manamanatuaga katoa . . . Nakai ko e tau agahala pauaki he matagahua, kaumahalaaga, po ke fakagoagoa, he fakaata a ia ke taute pihia.”