Mahani Fakamoli—Ko e Heigoa e Totogi?
“Ko ia kua fakamoli, to taute e koe e mahani fakamoli.”—SALAMO 18:25, “NW.”
1, 2. (a) Ko e heigoa e mahani fakamoli, mo e haofia fefe e tau momoui ha tautolu he hana tau fahi kehekehe? (e) Ko e ha ne mitaki ai ke fuluhi ki a Iehova ko e ha tautolu a Fakafifitakiaga mitaki?
FAKAMOLI, gahua, fakaalofa, fekafekauaga, mahani omaoma. Ko e heigoa kua fetataiaki he tau kupu nei? Ko e tau hagaaoaga kehekehe he mahani fakamoli. Ko e mahani fakamoli ko e mahani fakaatua kua puhala mai he loto fakaalofa hofihofi. Ka e taha e mena, tokologa e tau tagata he vaha nei, kua tote lahi e mahani fakamoli. Ko e fefakamoliaki ke he hoa he fakamauaga, tau mahani kua lata ke he tau tagata momotua he magafaoa, omaoma he tagata gahua ke he hana takitaki—kua fakahanoa oti e tau mena nei mo e mahani ke fakatikai tumau. Ka ko e heigoa e lekua, kaeke ke tupu e kehekehe he mahani fakamoli? I Igilani, nakai la leva, ne tala age he tagata leveki tupe ke he tivi tukuhau, e tala moli ke he tau tupe he hana kautaha, ti oti ai hana gahua.
2 Na mukamuka lahi ke vagahau e mahani fakamoli, ka ko e mahani fakamoli tonu kua lata ni ke omoiaki e gahua kua nakai putoia he fakatikai matakutaku. Na fa kaumahala tumau a tautolu he mena nei, ha ko e tau tagata nakai mitaki katoatoa. Ti kua mitaki ni ki a tautolu ke manamanatu ke he fakafifitakiaga he taha ne nakai maeke hana mahani fakamoli kua nakai kautu ke huhu ko ia ni, ko e Atua ko Iehova.
Fakafifitakiaga e Mahani Fakamoli
3. Fakamoli fefe a Iehova ke he hana finagalo ne tohi he Kenese 3:15?
3 Ko e magaaho ne hala ai a Atamu, ne fakakite fakamitaki e Iehova hana finagalo ke fakahao e magafaoa he tau tagata ne nakai la fanau mai. Ko e matapatu he gahua nei, ko e hana fakaalofa ke he hana tau tagata ne tufugatia. (Ioane 3:16) To hoko e magaaho ko Iesu Keriso, ko e tega he maveheaga ne talahau he Kenese 3:15, ke fakamoli ai ke eke mo poa lukutoto, mo e nakai ko e manatu mitaki ki a Iehova ke liu tua hana finagalo kua oti he fakakite. Ha kua talia e poa a Iesu, to nakai takitaki ha tautolu a tua ke fakama.—Roma 9:33.
4. Fakamoli fefe a Iehova ki a Iesu, mo e ko e heigoa e fua?
4 Ko e mahani fakamoli a Iehova ki a Iesu kua fakamaloloaki e Tama he magaaho ne nofo a ia he lalolagi. Ne iloa e Iesu to hoko ni ki a ia e mate, ti tumau mauokafua a ia ke fakamoli ke he hana Atua ke hoko ke he fakaotiaga. Ko e magaaho ne papatiso mo e fakauku ai he agaga tapu a ia, ne fakakite ki a ia e iloilo katoa ke iloa hana moui fakaagaga, to fanau fakatino tagata. He po he hana afoaga, ne liogi a ia ke liuaki atu a ia ke he hana Matua he lagi, ke he ‘lilifu ne ha ha i ai a ia mo Iehova ka e nakai la fakave e lalolagi.’ (Ioane 17:5) Ka to maeke fefe e mena nei? Ko e maeke ni ka nakai toka e Iehova hana Tama fakamoli he tukuaga, ke kitia e popo. Ne fakatu mai e Iehova a ia, mai he mate ke he moui nakai mate, ko e mena ia ne fakamoli ai e maveheaga fakaperofeta ne tohia he Salamo 16:10: “Ha ko e mena nakai toka atu e koe au ki seoli.”—Gahua 2:24-31; 13:35; Fakakiteaga 1:18.
5. Ko e heigoa falu he tau gahua fakamoli ne lata mo e tau maveheaga a Iehova ki a Iesu?
5 Mui atu ke he hana liu tu mai, ne iloa e Iesu, ko e falanaki ni a ia ke he kupu a Iehova ke ‘eke e au a lautolu kua fai fi kia koe mo fakatuaga hui hau.’ (Salamo 110:1) Ne hoko mai e magaaho ia he tau 1914, he fakakatoatoaaga he “vaha he tau motu kehe,” fakalataha mo e fakatuaga he Kautu i luga he lagi. Ko e maveheaga ke pule a Iesu ke he hana tau fi, ne kamataaki e uta kehe a Satani mo e hana tau temoni mai he lagi. To fakaoti ai ka tuku a lautolu he pahua ke he afe e tau tau mo e moumou e “tau patuiki he lalolagi, mo e tau kau ha lautolu.”—Luka 21:24; Fakakiteaga 12:7-12; 19:19; 20:1-3.
6. Ko e heigoa e amaamanakiaga moli ne tuku mai e Iehova ki a tautolu, mo e fakakite fefe e tautolu ha tautolu a fakaaue ke he mena ia?
6 Ne fakaohooho mai e Salamo: “Kia talifaki a koe kia Iehova, mo e tumau ke he hana puhala; ti fakamatalahi e ia a koe ke eke māu e motu.” (Salamo 37:34) To mafanatia a tautolu ha ko e mena to toka mau e Iehova hana kupu ke hoko ke he fakaotiaga he lalolagi matahavala nei, ti fakahao e ia e tau tane, tau fifine, mo e tau fanau ne “tumau ke he hana puhala.” Ko e vala tala ia, mai he tohi Heperu fakamua ne moua mai e manatu he na kupu ua ia, ko e fakamalolo mo e tua fakamoli ke fekafekau kia Iehova. Ko e mena ia, nakai ko e magaaho a nei ke fakalolelole po ke tiaki e tau monuina he fekafekau kua tuku mai ki a tautolu. Ko e magaaho a nei ke eketaha a tautolu ke he fekafekauaga fakamoli he Atua ha tautolu mo e hana Kautu. (Isaia 35:3, 4) Ha ha i ai e tau fakafifitakiaga mitaki ke fakamalolo aki a tautolu. O mai la a tautolu ke manamanatu ke he falu ia lautolu.
Fakakite he tau Tupuna Mai he Kamataaga e Mahani Fakamoli
7, 8. (a) Ko e heigoa e tau gahua kotofa ne tuku age e Iehova ki a Noa mo e hana magafaoa? (e) Fakakite fefe e Noa mo e hana magafaoa kua lata mo e puipuiaga he Atua he magaaho ne fakapuke ai e lalolagi?
7 He magaaho ne finagalo a Iehova ke moumou e kaufakalatahaaga he tau tagata mahani kelea ke he fakapuke, ne taute e ia e maveheaga mo e ulu he magafaoa ko e tupuna ko Noa, ke lata mo e fakahaoaga he hana magafaoa mo e matutakiaga he moui he lalolagi nei. (Kenese 6:18) Ne fakaaue lahi a Noa, ke he puipuiaga fakaatua ia, kae ko ia mo e hana magafaoa kua lata ke fakakite e fakamoli ne lata ki ai. Taute fefe? Ke taute ai e tau mena ne poaki e Iehova. Ne hagaao fakamua a lautolu ke he gahua lahi mahaki, ke ta e vaka. Ko e magaaho ne mau ai, ko e gahua ha Noa ke fakapukeaki e tau hukui mai he tau manu mo e tau mena kai ke lata mo lautolu he vaha loa. Ka e nakai kuenaia. Ko e magaaho ne tuku age ke tauteute ai, ne taute oti e Noa e tau mena kua maeke kia ia ke he gahua fakamatala, ke ogo e fakafiliaga fakaatua ka hoko mai.—Kenese, veveheaga 6 mo e 7; 2 Peteru 2:5.
8 Kua tala mai he Tohi Tapu ki a tautolu “Ti eke ni e Noa; tuga ne poaki mai he Atua kia ia ke he tau mena oti, ne eke pihia ai e ia.” (Kenese 6:22; 7:5) Ne fakamoli a Noa mo e hana magafaoa ke taute ha lautolu a kotofaaga. Ko e kakano he ha lautolu a agaga poa, ko e ha lautolu a tau magaaho ne fakaaoga fakamitaki, ka e uka e gahua mo e uka foki e fakamatala. Ha kua nakai fanafanau a lautolu ato hoko e Fakapuke, ne lagomatai e fanau tane ha Noa mo e tau hoana ha lautolu ke taute ni he tau gahua kua kotofa, mo e taute fakalataha ha lautolu a gahua. Ne tamai fakatonu he Fakapuke e fakaotiaga ke he lalolagi mahani kelea. Ko Noa ni, mo e hana hoana, mo e ha laua fanau tane tokotolu mo e tau figona fifine toko tolu ne hao. Ti kua lata a tautolu ke fiafia ha kua fakamoli a lautolu ke he Atua mo e hana tau puhala, ha ko tautolu takitokotaha na tupu mai ia Noa, puhala mai ia Semu, Hamo, po ko Iafeta.—Kenese 5:32; 1 Peteru 3:20.
9. (a) Kamatamata fefe e Iehova, ki a Aperahamo e kamatamata ke he hana mahani fakamoli? (e) Fakakite fefe e Isaako e mahani fakamoli he mena nei?
9 Ko e magaaho ne tauteute ai a Aperahamo ke foaki a Isaako mo poa, ne omaoma fakamoli a ia ke he poaki a Iehova. Ko e kamatamata he hana fakamoli e mena ia! Ka e taofi ni e Iehova e lima a Aperahamo mo e pehe: “Ha kua iloa tuai e au kua matakutaku a koe ke he Atua, ha kua nakai lamakai a koe he tama hau, ko e hau a tama tokotaha, ka e tuku mai ni e koe a ia kia au.” Kua lata foki ia tautolu ke kitia ko e heigoa ne tupu mai ai e mena ia. Ke he tau aho tolu ne fenoga ai a lautolu ke he Mouga ko Moria, fai magaaho a Aperahamo ke fuafua e tau mena mo e hiki hana manatu. Ka e kua a Isaako, ko ia ne uta e tau gafi ma e poa huhunu mo e ko ia ne fakaata e ia a ia ke lili hana lima mo e hui? Ne nakai lolelole hana mahani omaoma ke he hana matua ko Aperahamo, po ke huhu e ia hana matagahua, pete ni kua liga ke hoko hana puhala he mahani fakamoli ke he mate.—Kenese 22:1-18; Heperu 11:17.
Mahani Fakamoli he Kerisiano
10, 11. Ko e heigoa e tau fakafifitakiaga ke he mahani fakamoli ne moua mai he tau Kerisiano fakamua?
10 Kua mahani fakamoli tumau a Iehova. “Hanai kia fifitaki a mutolu ke he Atua,” e ole fakamakamaka he aposetolo ko Paulo. (Efeso 5:1, 2) Ha kua fanogonogo e tau tupuna he kamataaga, kia fanogonogo pihia foki e tau Kerisiano. Ne fakatoka he tau Kerisiano fakamua e tau fakafifitakiaga mitaki ke he tapuakiaga fakamoli, tuga he fakakite he tau talahauaga na i lalo.
11 Ko e pule atu motu ha Roma ko Constantius 1, ko e matua tane he Pule atu motu ko Constantine, ne fakalilifu lahi e ia e tau tutaki a Iesu Keriso. Ke kamatamata aki e mahani fakamoli he tau Kerisiano ne nonofo he fale he patuiki, ne pehe a ia ki a lautolu ko e maeke ni a lautolu ke nonofo he hana tapuakiaga ka talia e lautolu ke taute poa ke he tau tupua. Ka nakai talia, to moua e fakaotiaga ha lautolu mai he hana lima e taui kelea. Mai he lagatau mukamuka nei, ne manako a Constantius ke kitia mitaki a lautolu ne nakai hiki ha lautolu a mahani fakamoli. Ko lautolu ne fakamoli ke he Atua mo e hana tau puhala kua mau kehe fekafekau he pule atu motu, ti hoko falu ke eke mo tau tagata ne falanaki e tua kehe tau fakatonutonuaga. Ko lautolu ne nakai fakamoli ke he poakiaga he Atua kua fakama ke he uta kehe.
12. Kua lata ke fakakite fefe he tau leveki Kerisiano e mahani fakamoli, mo e aoga lahi fefe e mena nei ma e mitaki he fakapotopotoaga?
12 Pete ni he fakamailoga he mahani fakamoli e tau momoui he tau Kerisiano oti, ka kua talahau fakamahino he tohi a Tito 1:8 e fakamauaga he tohi ke he tau fua kua lata ma e tagata kua eke mo leveki Kerisiano. Kua talahau e William Barclay, ko e hoʹsi·os ko e kupu Heleni ne fakaliliu ai ko e “fakamoli” kua fakamaama ai “ko e tagata kua omaoma ke he tau fakatufono ne nakai fai kamataaga mo e fakaotiaga, kua toka tuai, to fakatu e tau fakatufono he tagata.” Ti kua lata tonu he tau momotua ke omaoma fakamoli pihia ke he tau fakatufono he Atua. To lagomatai he fakafifitakiaga tonu ia e fakapotopotoaga ke tupu mo e malolo lahi ke fakafehagai mo e tau kamatamata oti, pihia mo e malolo ne fakamatakutakuaki e matakau katoa po ke hana tau tagata takitokotaha. (1 Peteru 5:3) Lahi mahaki e kavega he tau momotua kua kotofa ke he fuifui mamoe, ke aua neke tiaki ha lautolu a mahani fakamoli ki a Iehova, ha kua poaki ke he fakapotopotoaga “kia fifitaki a mutolu ha lautolu a tua.”—Heperu 13:7.
Mahani Fakamoli—Ko e Heigoa e Totogi?
13. Ko e heigoa e kakano he talahauaga “Ha ha he tau tagata oti ha lautolu a totogi,” mo e ko e heigoa e tau fakataiaga ne fakakite aki e mena nei?
13 “Ha ha he tau tagata oti ha lautolu a totogi” ko e talahauaga ne kua mailoga ko e ha Robert Walpole, ko e ulu fekafekau fakatufono ha Peritania he senetenari ke 18 aki. Ti felauaki mitaki mo moli, e mo e tau mahani fakamoli tali mai he tau tala tuai kua mahani tumau ke fakafuaaki ha ko e lotokai. Manamanatu la ki a William Tyndale ne fakaliliu e Tohi Tapu, ko ia ne talia hehe a Henry Phillips ke eke mo kapitiga fakamoli. He tau 1535 ne nakai fakamoli he afo fakakelea e Phillips a Tyndale ke he hana tau fi, ne takitaki atu he magaaho ku ia ni ti tuku a Tyndale ke he fale puipui mo e mate tuai a ia. Taha tagata fakamau tohiaga tuai, ne pehe, liga ko Phillips ko e fekafekau he patuiki Peritania po ke he tau Katolika i Peritania, ne “totogi mitaki ma e gahua tuga ha Iuta.” Liu fatiaki mai he tagata fakamau matohiaga nei a Iuta Isakariota, ko ia ne talia e tolugofulu e tau tupe ko e totogi ke afo a Iesu Keriso. Kua nakai lata ke talahau a tautolu mai he tau fifitakiaga nei, ko e “totogi” he mahani fakamoli he tagata ko e tupe tumau ni hokoia. Nakai pihia.
14. Kamatamata fefe e mahani fakamoli ha Iosefa ki a Iehova, ti ko e heigoa ne moua mai ai?
14 Ko e magaaho ne ole ai he hoana ha Potifara a Iosefa ke “momohe mo [ia],” kua kamatamata hana mahani fakamoli ki a Iehova. Ko e heigoa hana ka taute? Ha kua maama mitaki hana loto ke he poakiaga nei kua hoko, ne hola kehe a Iosefa mai he fale, mo e lali a ia ke nakai “eke e mena kelea lahi ia mo e hala au ke he Atua.” Ko e magaaho fiafia he mahani feuaki kua nakai fakakaumahala e mahani fakamoli a Iosefa ke he hana Atua, ko Iehova.—Kenese 39:7-9.
15. Fakakite fefe e mahani nakai fakamoli a Apisaloma, ti ko e heigoa e fua?
15 Ka e, ha ha i ai agaia foki falu a mena matematekelea; maeke he manako ke he tuaga tokoluga ke moumou e mahani fakamoli. Ko e fakaohoohoaga haia he totoko ha Apisaloma ke he hana matua, ko e Patuiki ko Tavita. Ne fakatu fufu e ia e tau lagatau, mo e taute e Apisaloma e fakafetuiaga mitaki mo e tau tagata. Ka mole ia ti fakatu e ia e kau kautau ke totoko ke he tau tagata kau fakamoli he hana matua. Ko e hana mate ke he lima a Ioapo ne fakaoti aki e mahani nakai fakamoli ha Apisaloma, ke he hana matua tane ko Tavita, ka ko e palepale lahi ha a nei, ke totogiaki hana lali ke moumou e tau fakatokatokaaga pule he Atua.—2 Samuela 15:1-12; 18:6-17.
Ko e Mahani Fakamoli ne Nakai Fai Totogi
16. Ko e heigoa ne fakakite he tohi 2 Korinito 11:3, hagaao ke he tau lagatau a Satani?
16 Pete he talahau e Satani kua moua he tau tagata oti hana totogi, ti moli e mena nei ki a Apisaloma, ka e nakai moli ki a Iosefa, mo e to nakai fakaai foki ke moli ke he tau tagata tapuaki fakamoli a Iehova. Kae pete ni, to foaki e Satani ha mena he tau mena ke moumouaki ha tautolu a mahani fakamoli ke he ha tautolu a Tufuga. Ne talahau he aposetolo hana matakutaku “neke tuga he fakavai he gata a Eva ke he hana tau lagatau,” ti fakakelea foki ha tautolu a tau manatu, ke tiaki e tautolu e mahani fakamoli ha tautolu ki a Iehova, mo e tapuaki ki a ia.—2 Korinito 11:3.
17. Ko e heigoa ne fakafetuiaki he falu e tau monuina, aki e mena ai fai fuafuaga totogi?
17 Kua lata ia tautolu ke huhu hifo ki a tautolu: ‘Fai totogi nakai ke talia e au, ke tautuiaki e monuina he tapuaki fakamoli ke he haku a Tufuga?’ Ko e mena momoko moli ka, nakai tuga a Iosefa e falu he tau fekafekau tukulele a Iehova, ne tote lahi e mena ne fakafetuiaki. Pihia foki e falu momotua ne fakafua ha lautolu a tau monuina nakai fai fuafuaaga totogi ko e fekafekauaga tapu ma e fiafia ku he tau mena fakafiafia kelea he tino. Ko e tau momotua, po ke nakai, tokologa ne taute e tau mena nei, ne galo e malolo he magafaoa maopoopo, ko e fakaalofa mo e fakalilifu he fakapotopotoaga, mo e taliaaga a Iehova—ko Ia tokotaha ne maeke ke tamai e malolo ke tumau e mahani fakamoli mo e totoko ke he ha kamatamata mai ia Satani.—Isaia 12:2; Filipi 4:13.
18. Ko e ha ne aoga ai ke fanogonogo ke he poakiaga he 1 Timoteo 6:9, 10?
18 Ko e falu, ko e tutuli ke moua e tau tutuaga tokoluga he lalolagi, “kua hoka e lautolu a lautolu ti ati ni ke he tau mena matematekelea loga,” ha kua kitia e tau poakiaga maama he Tohi Tapu. (1 Timoteo 6:9, 10) Ko Tima ko e Kerisiano ne talahau e Paulo, kua galo ia ia e mena nei, galo fakaku po ke galo fakaoti. (2 Timoteo 4:10) Ko e mahani fakamoli ki a Iehova kua nakai maeke ke fakatikai mo e nakai fai fua mamahi ka tupu mai ai. “Kua nakai fakavai e taha e Atua; ha ko e mena kua gana he tagata, ko e mena ia ni ke helehele mai ai e ia.”—Kalatia 6:7.
19, 20. (a) Ko e heigoa falu a mena hagahaga kelea ka moua mai he fakamahani mau ke kitekite televisoni lahi? (e) Ko e heigoa e fakafifitakiaga ne fakatoka he taha magafaoa ko e tau Fakamoli?
19 Falu a magaaho ko e totogi he fakatautuiaga kua puhala mai fakagalogalo. Tuga a nei, ko e hokotaki mai he Kautu Amelika pehe ko e loga e tau magafaoa, vevehe ua ni e tau tula ala ha lautolu ke kitekite televisoni he tau kaina, ti mua atu e mahuiga ke he tau fuata. Kaeke ke fagai he Kerisiano hana loto ke he televisoni ni hokoia, mo e hana feuaki mo e favale, to malona vave hana tau puhala Kerisiano. To mukamuka lahi e mena nei ke takitaki atu ke he mahani nakai fakamoli, mo e fano kehe mai ia Iehova. Ko e feoaki kelea pihia ne fakakeleaaki e tau mahani mitaki. (1 Korinito 15:33) Aua neke nimo ia tautolu e poaki mai he tau Tohi Tapu ki a tautolu ke foaki e tau magaaho ke fakaako mo e manamanatu ke he Kupu a Iehova. Ko e fakaaoga mitaki nakai he magaaho ata ka nofo i mua he televisoni ke fakatautuiaki e magaaho kua lata ke fakaaoga ke moua e iloilo ke takitaki atu ke he moui tukulagi tuga e tagata tapuaki fakamoli a Iehova? Tokologa ne omai ke iloa e iloilo he kupu moli he vaha nei ne hiki ha lautolu a tau manamanatuaga hagaao ke he mena nai.—1 Timoteo 4:15, 16; 2 Timoteo 2:15.
20 Ko Takashi ko e Siapani fakatu gahua ne nofo i Igilani. Fa mahani a ia ke fakaaoga tolu po ke fa e tula he tau magaaho afiafi ke kitekite televisoni mo e hana magafaoa. Ka e tolu e tau ne mole atu he papatiso a ia mo e hana hoana, ne fifili e ia kua lata ni e fakaako Tohi Tapu he tagata mo e magafaoa ke taute fakamua. Ko e magaaho ne fakatote hifo e kitekite televisoni hana ke 15 po ke 30 ni e minute he aho he fakaevalesi, ne moua e ia e takitakiaga mitaki ma e hana magafaoa. Pete ni he fakaaoga e Takashi ua e Tohi Tapu, taha faka-Peritania, taha faka-Siapani, ke he hana fakaako kua mafiti lahi hana tupu fakaagaga, ti ko e magaaho nei kua eke a ia mo fekafekau lagomatai he fakapotopotoaga vagahau faka-Peritania. Ko e hana hoana ko e tagata foafoa lagomatai. “Ke puipui fakaagaga ha maua tau fanau tane ikiiki,” he talahau e ia, “kitia ni e au e tau mena kua fakaata he hoana haku mo au, a laua ke kitekite he televisoni.” Fai palepale e akonaki fakatagata pihia.
21. Ko e heigoa ne iloa e tautolu hagaao ke he tau lagatau a Satani, mo e puipui fefe e tautolu a tautolu?
21 Fakamoli e tautolu e mena nei: Na iloa e Satani e tau lolelole ha tautolu, po ke liga iloa mitaki e ia a tautolu. To nakai fai mena ke taofi a ia he hana lali ke uta kehe po ke fakalolelole ha tautolu a mahani omaoma ki a Iehova. (Fakatatai Mataio 4:8, 9) To maeke fefe mogoia ia tautolu ke puipui a tautolu? Maeke ni ka tuku tumau ha tautolu a tukuleleaga ki mua ha tautolu mo e fiafia ke fakalaulahi e lotomatala kae fekafekau a tautolu ke he tau manako fakaagaga he falu. Ha ko e tau fekafekau fakamoli a Iehova kua lata ni ke lavelave a tautolu he hana a fekafekauaga mo e ke takitaki he hana Kupu tapu a tautolu, he tau magaaho oti. To lagomatai he mena nei a tautolu mo e ha tautolu a fifiliaga mauokafua to nakai fai totogi ka foaki e Satani ke liliu kehe aki a tautolu mai he mahani fakamoli ke he Atua.—Salamo 119:14-16.
Tali Fefe e Koe?
◻ Fakakite fefe e Iehova mo Iesu e mahani fakamoli?
◻ Ko e heigoa foki falu fakafifitakiaga faka-Tohi Tapu ke he mahani fakamoli?
◻ Ko e heigoa ne lali a Satani ke foaki ma tautolu, po ke lali ke taute?
◻ Fakamalolo fefe e tautolu a tautolu ke tumau e fakamoli he ha tautolu a tapuaki ki a Iehova?