Tau Fakafiliaga Faka-Atua​—Favale Kia e Tau Mena Ia?

KE LATA mo e hūhū nei, kia hagaaki fakakū la tautolu ke he ua e fakataiaga he fakafiliaga faka-Atua he Tohi Tapu​—ko e Fakapuke he vahā ha Noa mo e tamate he tau tagata Kanana.

KO E FAKAPUKE HE VAHĀ HA NOA

LIGA LOGONA E KOE: “Kua favale e Atua he fakatoka mai e ia e fakapuke ke moumou e tau tagata oti ka e fakahao a Noa mo e magafaoa haana.”

TALAHAU HE TOHI TAPU: Pehē e Atua: “Kua moui au, nakai fiafia au ka mate e tagata mahani kelea, ka kia liu mai a ia ne mahani kelea he tau mahani hana mo e moui ai.” (Esekielu 33:11) Ti ko e moumouaga he tau tagata mahani kelea he vahā ha Noa ne nakai fiafia e Atua ki ai. Ti ko e ha ne taute pihia e ia?

Ne tali he Tohi Tapu e mena ia he fakahoko he Atua e tau fakafiliaga ke he tau tagata nakai mahani Atua he vahā i tuai, “kua tuku [e ia] mo fakamailoga ke he tau tagata matahavala a mui.” (2 Peteru 2:5, 6) Ko e heigoa e puhala ne fakatoka he Atua?

Fakamua, ne fakakite he Atua pete ne mamahi e finagalo haana ke moumou e tau tagata, ne mailoga e ia e tau tagata favale ne fakatupu e matematekelea mo e fakalago ki a lautolu ha lautolu a tau mahani. Nakai leva, to fakaotioti e ia e tau nakai fakafili tonu mo e tau matematekelea oti kana.

Uaaki, ko e puhala he tau mahani he Atua he vahā i tuai ne fakakite na hataki fakaalofa he Atua e tau tagata ato fakahoko e fakafiliaga. Ko Noa ko e tagata fakamatala he tututonu, ka e tokologa e tagata ne fakaheu a ia. Pehē e Tohi Tapu: “Nakai [fanogonogo a] lautolu ato hoko mai e fakapuke, mo e uta kehe a lautolu oti.”​—Mataio 24:39.

Taofi mau nakai e Atua ke he puhala ia? E. Ma e fakatai, ne hataki e ia e tau tagata Isaraela kaeke ke liliu a lautolu ke he mahani kelea tuga e tau motu ne agaagai ia lautolu, to fakaatā e ia e tau fī ke fofō e motu ha lautolu; moumou e taone ha lautolu ko Ierusalema; ti uta fakapaea ai. Na liu a Isaraela ke he mahani kelea​—ti poa foki e tau tama. Fai mena nakai ne taute e Iehova? E, ka e mogo ni ne mole e fakafano atu tumau he tau perofeta ke hataki e tau tagata haana ke hiki e tau puhala fakamua ha lautolu neke mule lahi. Pehē foki a ia: “To nakai ni eke he Iki ko Iehova ha mena, ka e fakakite ai e ia hana finagalo ke he hana tau fekafekau ko e tau perofeta.”​—Amosa 3:7.

PUHALA NE PUTOIA A KOE: Ko e puhala ne kitia e tautolu he tau fakafiliaga ha Iehova i tuai kua foaki ki a tautolu e amaamanakiaga. Onoono atu a tautolu mo e mauokafua ke he fakafiliaga he Atua ki a lautolu ne favale kua fakatupu e matematekelea. Pehē e Tohi Tapu: “Fakaotioti a lautolu kua mahani kelea . . . Ka ko e tau tagata mahani molu, to eke ma lautolu e motu; ti fakafiafia foki e lautolu a lautolu ha ko e monuina kua lahi.” (Salamo 37:9-11) Ko e heigoa e manatu haau hagaao ke he fakafiliaga kua fakatotoka e tau matematekelea he tau tagata? Favale kia, po ke fakaalofa noa e mena ia?

KO E MOUMOUAGA HE TAU TAGATA KANANA

LIGA LOGONA E KOE: “Ko e moumouaga he tau tagata Kanana ko e tauaga favale ne tatai mo e tau kelipopoaga he vahā foou nei.”

TALAHAU HE TOHI TAPU: “Kua tonu hana [Atua] tau puhala oti ni. [Ko ia] ko e Atua kua fakamoli, nakai ha ha ia ia ha mahani kelea.” (Teutaronome 32:4) Ko e mahani he fakafili tonu faka-Atua kua nakai tatai mo e felakutaki he tagata. Ko e ha? He nakai tatai mo e tau tagata, kua maeke he Atua ke kitia e tau loto​—ko e tau mena ne haia he tau loto he tau tagata.

Ma e fakatai, he mogo ne fakafili he Atua e tau maaga ha Sotoma mo Komora ti fifili ke moumou ai, ko e tagata tua fakamooli ko Aperahamo ne tupetupe ke he matakupu he fakafili tonu. Ne nakai maeke a ia ke manamanatu ko e Atua fakafili tonu haana “to fakamahakava . . . e tau tagata tututonu fakalataha mo e tau tagata mahani kelea.” Ne fakamafana fakauka he Atua a ia pete ne toko hogofulu e tagata tututonu i Sotoma, to fakahao e Ia e maaga ha ko lautolu. (Kenese 18:20-33) Maaliali ai, ne kumi hifo e Atua ke he tau loto he tau tagata ia ti kitia e kelea lahi mahaki ha lautolu.​—1 Nofoaga he Tau Patuiki 28:9.

Pihia foki, ne fakafili he Atua e tau tagata Kanana ti latatonu ke moumou a lautolu. Kua talahaua e tau tagata Kanana he favaleaga fakateteki ha lautolu, ne putoia e tugi moui he tau fanau he poa ke he afi.a (2 Tau Patuiki 16:3) Iloa he tau tagata Kanana ne poaki e Iehova ki a Isaraela ke pule ke he tau kelekele oti. Ko lautolu ne fifili ke nonofo mau mo e tau atu he totoko pauaki ke he tau Isaraela, ti pihia mo Iehova, ne fakakite e fakamooliaga malolō kua fakalataha a ia mo e tau tagata haana.

Lafi ki ai, ne fakahoko he Atua e fakaalofa noa ke he tau tagata Kanana ne tiaki e tau mahani kelea ha lautolu ti talia e tau tuaga tokoluga he mahani ha Iehova. Ma e fakatai, ko e fifine fakataka Kanana ko Raava ne fakahao mo e magafaoa foki haana. Pihia foki he mogo ne kumi fakaalofa noa e tau tagata ne nonofo i Kanana he maaga ko Kipeona, ko lautolu mo e tau fanau oti ha lautolu ne fakamomoui ai.​—Iosua 6:25; 9:3, 24-26.

PUHALA NE PUTOIA A KOE: Maeke a tautolu ke iloa e fakaakoaga aoga mai he fakafiliaga he tau tagata Kanana. Hane mafiti atu a tautolu ke he “aho ke fakafili ai mo e mahakava ai e tau tagata matahavala.” (2 Peteru 3:7) Ka fakaalofa a tautolu ki a Iehova, to aoga ki a tautolu ka fakaotioti e ia e tau matematekelea he tau tagata he utakehe a lautolu ne tiaki e pule fakafili tonu haana.

Kua fakamanatu fakaalofa a Iehova ki a tautolu ko e tau fifiliaga ne taute he tau matua kua lauia e tau tama ha lautolu. Pehē e Kupu he Atua: “Kia fifili la e moui, kia moui ai a koe katoa mo e hau a fanau; Kia fakaalofa atu a koe kia Iehova hau a Atua, mo e fanogonogo ke he hana leo, mo e pipiki atu a koe kia ia.” (Teutaronome 30:19, 20) Ko e tau kupu kia a ia he Atua favale po ke tau kupu he Atua ne fakaalofa ke he tau tagata ti manako ki a lautolu ke taute e tau fifiliaga hako?