Tau Mena Tutupu Pauaki​—Fakamooli Kia kua Favale e Atua?

LIGA LOGONA E KOE: “Kua pule e Atua ke he lalolagi, ti fakatupu ai e tau matematekelea tupu pauaki; mena ia kua liga favale a ia.”

TALAHAU HE TOHI TAPU: “Ko e lalolagi oti ha he pule hana kua mahani kelea.” (1 Ioane 5:19) Ko hai ‘a ia kua mahani kelea’? Fakakite he Tohi Tapu a ia ko Satani. (Mataio 13:19; Mareko 4:15) Matakehe kia e mena ia? Manamanatu ke he mena nei: Ka ha ha ia Satani e pule ke he lalolagi oti, ti fakaohooho e ia e tau tagata ke lotokai, velevelemena, mo e manamanatu kū tuga a ia. Nakai kia lagomatai he mena ia ke fakamaama e kakano ne nakai leveki fakamitaki he tagata e takatakaiaga ni haana he lalolagi? Tokologa e tagata pulotu ne hataki e nakai leveki he takatakaiaga ka liga fakahoko e tau matematekelea tupu pauaki, fakatupu ai, fakaauatu e kelea, po ke fakalolelole lahi ke he tau tagata.

Ti ko e ha ne fakaatā he Atua a Satani ke lahi e fakaohoohoaga? Ko e tali kua liu ke he kamataaga he fakamauaga tala tuai he tagata, he totoko e tau matua fakamua ha tautolu ke he Atua ko e Pule. Tali mai ai, laulahi he tau tagata ne mumuitua ke he puhala ia. Ko e fifiliaga ia​—ko e tiaki he pule he Atua​—​ne tuku e tau tagata ke he tau lima ha Satani, ko e fī he Atua. Ti ui e Iesu a Satani ko e “iki he lalolagi nei.” (Ioane 14:30) To pule tukulagi kia a Satani? Nakai!

Nakai fakateaga a Iehovaa ke he matematekelea ne fakatupu e Satani. Ti aamotia lahi e Atua ha ko e matematekelea he tagata. Ma e fakatai, ke he tau magaaho uka ne tupu ke he motu ha Isaraela, ne pehē e Tohi Tapu hagaao ke he Atua: “Nakai fai fi a ia kia lautolu ke he ha lautolu a tau matematekelea oti.” (Isaia 63:9) Ne fakatokatoka fakaalofa he Atua ke fakaotioti mafiti e pule favale ha Satani! Ne kotofa tuai e ia e haana Tama ko Iesu Keriso ke eke mo Patuiki fakafili tonu mo e tututonu tukulagi.

PUHALA NE PUTOIA A KOE: Pete he kaumahala e pule ha Satani ke puipui e tau tagata mai he tau matematekelea tupu pauaki, to maeke he pule ha Iesu. Fai mena a Iesu ne taute ke puipui e tau tutaki haana he magaaho ne to e afā lahi. Pehē e Tohi Tapu: “Hataki atu e ia e matagi, mo e pehe age ke he vai, Fakamate a kia milino a; ti mate ai e matagi kua milino lahi tuai.” Tala age e tau tutaki: “Ka ko hai kia e tagata nai, ne fanogonogo ai e matagi mo e vai kia ia?” (Mareko 4:37-41) Ne foaki he mena ia e mauokafua ki a tautolu to puipui e Iesu e tau tagata omaoma oti he magahala ka pule a ia ko e Patuiki.​—Tanielu 7:13, 14.