Hūhū he Tau Tagata Totou ha Tautolu

Ko e Fakahala Kia he Atua e Tau Matematekelea Pauaki?

Ne nakai fakaaoga he Atua e tau matematekelea pauaki ke fakahala aki e tau tagata noa. Ne nakai taute pihia e ia fakamua, mo e to nakai liu a ia ke taute pihia foki. Ko e ha? Ha ko e “Atua ko e fakaalofa,” he talahau he Tohi Tapu ia 1 Ioane 4:8.

Ko e fakaalofa e punaaga he tau gahua oti he Atua. Ne nakai fakatupu he fakaalofa e mamahi ke he tau tagata, ha kua pehē e Tohi Tapu “kua nakai mahani kelea e fakaalofa kia ia ne katofia mo ia.” (Roma 13:10) Ia Iopu 34:12, ne pehē e Tohi Tapu: “Ko e moli ni, nakai mahani kelea e Atua.”

Mooli, ne talahau tuai he Tohi Tapu e matematekelea ma e vahā ha tautolu, tuga e “tau mafuike lalahi.” (Luka 21:11) Ka e nakai fakatupu e Iehova e tau matematekelea he mafuike ke tuga e tagata fuafua matagi ne nakai fakatupu e tau mena ne moumou he tiotio ne fakapuloa tuai e ia. Ti, kaeke kua nakai fakalago ke he Atua e mamahi he tau tagata ha ko e tau matematekelea pauaki, ko e heigoa mogoia ne fakatupu ai?

“Ko e lalolagi oti ha he pule hana kua mahani kelea,” ko Satani ko e Tiapolo, he fakakite he Tohi Tapu. (1 Ioane 5:19) Ko e kelipopo tagata a ia tali mai he fakafualoto haana he kamataaga he tagata ke hoko mai ke he vahā ha tautolu. (Ioane 8:44) Kua kitia e Satani e moui he tagata ke tuga e mena fakateaga ne lata ke tiaki kehe. Nukua fakaohooho he manako lotokai a ia, ti ko e kakano haia ati taute e ia e fakatokaaga he lalolagi katoa ke tupu holofa e mahani lotokai. He fakatokaaga he lalolagi he vahā nei, kua atāina e tau tagata ke ekefakakelea e falu ati tokologa ai e tau tagata ne nakai fahia ne nonofo he tau matakavi hagahaga kelea, tau matakavi ka liga tutupu pauaki po ke fakatupu he tagata e tau matematekelea. (Efeso 2:2; 1 Ioane 2:16) Ko e mena ia, kua tukupau aki ni e tau tagata lotokai e falu matematekelea ne tutupu ke he tau tagata. (Fakamatalaaga 8:9) He puhala fe?

Kua taute foki he tagata e tau matematekelea loga ne tutupu. Ke fakatai ki ai, manamanatu ke he tau matematekelea ne lauia e tau tagata ne nonofo he taone i New Orleans, U.S.A., ne puke ha ko e afā, po ke tau fale ne moumou he tau pelapela ne tafe hifo he tau atu mouga he kautahi i Venesuela. Ke he tau mena ia mo e falu foki, kua tolomaki ki mua e tau matematekelea pauaki ne tuga e matagi mo e uha, ha kua fakateaga lahi e tau tagata ke he takatakaiaga, kelea e tau gahua enesinia, nakai fakatokatokaaga mitaki, nakai omaoma ke he tau hatakiaga, mo e kua taute mena fakahanoa foki e tau takitaki.

Kitekite la ke he matematekelea he tau vahā faka-Tohi Tapu. He vahā a Iesu, ne 18 e tagata ne mamate he malolo fakalutukia e kolo. (Luka 13:4) Kua liga tupu e matematekelea nei ha ko e hepe he tagata, “ko e vaha mo e tau mena ke tutupu ai,” po ke tau mena ua ia—ka e nakai ko e fua he fakafiliaga he Atua.—Fakamatalaaga 9:11.

Ka kua fai matematekelea kia ne fakatupu he Atua? E, ka e nakai tuga e tau matematekelea pauaki po ke ne taute he tagata, ha kua fifili e Iehova e tau tagata ka momoui, ti fai kakano ai, mo e fa lavea ni ke tutupu. Ne ua e fakataiaga, ko e Fakapuke he lalolagi katoa he vahā he tupuna ko Noa mo e moumouaga he tau maaga i Sotoma mo Komora he vahā a Lota. (Kenese 6:7-9, 13; 18:20-32; 19:24) Ne tatafi kehe he tau fakafiliaga faka-Atua ia e puke tagata mahani kelea ne nakai tokihala ka e fakamomoui e tau tagata ne tututonu ke he Atua.

Ti mooli foki, kua ha ha ia Iehova ko e Atua e kakano, manako, mo e malolō ke fakaoti e tau matematekelea oti mo e fakatotoka mai he tau lauiaaga he tau matematekelea pauaki. He hagaao ke he Patuiki ko Iesu Keriso ne kotofa he Atua, ne talahau tuai he Salamo 72:12: “Ha ko e mena laveaki e ia a ia ne nofogati he hana kalaga mai; katoa mo ia kua matematekelea, mo ia kua nakai fai lagomatai.”