Ko e Atua Kia kua Fakahala a Tautolu?
“Manatu au [ko e] tembatsu (fakahala faka-Atua), ka e fakaalofa au ke he tau tagata ne lauia he tau matematekelea pauaki,” he ui he takitaki politika Sapanī he mole e pakia he motu ia he 9.0 e malolō he mafuike mo e peau kula ia Mati 2011.
He molea e 220,000 ne mamate he mafuike ne tō ki Haiti ia Ianuari 2010, ko e akoako talahaua he televisoni ne pehē kua “tupu e mena ia ha ko lautolu ne taute e maveheaga ke he tiapolo” ti kua lata ke “fuluhi ke he atua.”
“Manako e Atua ke fafagu ha tautolu a loto manamanatu kua mate mo e nakai fai logonaaga,” fakapuloa ai he akoako Katolika he mogo ne mamate e 79 e tau tagata tokologa he taholiaga i Manila i Filipaina. Ko e nusipepa i ai ne talahau ko e “uafulu ma taha e pasene he tau tagata lalahi ne talitonu kua fakatoka mai e ita he Atua ke he tau kelekele ne malolo hifo, tau afā mo e falu matematekelea pauaki” ne lauia tumau ai ke he motu.
KO E taofiaga kua fakahoko he Atua e tau matematekelea ke fakahala e tau tagata kelea kua nakai foou. He 1755, he mole e 60,000 tagata ne mamate he mafuike, he afi, mo e peau kula ne pakia a Lisbon i Portugal, ko e tagata pulotu talahaua ko Voltaire ne hūhū kumikumi: “Mua atu kia e loga he tau mena tutupu ne lauia a Lisbon he magahala ia ka e puke a Paris he tau fiafia lahi ke he mahani fakalialia?” Mooli, totou miliona ne manamanatu kua fakaaoga he Atua e tau matematekelea pauaki ke fakahala e tau tagata. He tau motu loga ko e tau matematekelea pihia kua ui ai ko e tau gahua he Atua.
He kitia e tau mena oti nei, kua lata ia tautolu ke hūhū: Kua fakaaoga mooli kia he Atua e tau matematekelea pauaki ke fakahala e tau tagata? Ko e tau mena matematekelea mogonei kia ko e fakahala mai he Atua?
He mafiti a lautolu ke tukupau e Atua, falu ne tuhi ke he tau tala he Tohi Tapu na fakahoko he Atua e moumouaga ne fakatupu he tau mena pauaki he lalolagi. (Kenese 7:17-22; 18:20; 19:24, 25; Numera 16:31-35) Ka e fakakite he kumikumiaga he tau tala nei he Tohi Tapu, ko e tolu la e kitiaaga lalahi he tau mena tutupu takitaha ia. Fakamua, ne talahau tuai e hatakiaga. Uaaki, nakai tuga e tau matematekelea pauaki he vahā nei, ne kelipopo e tau tagata mitaki mo e tau tagata kelea, ko e moumouaga he Atua kua fifili ni. Ko e tau tagata kelea loto maō po ko lautolu ne nakai talia ke fanogonogo ke he tau hatakiaga ne mamate. Toluaki, ne taute he Atua e puhala ma e tau tagata mitaki ke hao.—Kenese 7:1, 23; 19:15-17; Numera 16:23-27.
He loga e tau matematekelea ne moumou e tau momoui he tau tagata toko miliona he vahā nei, kua nakai fai fakakiteaga ko e Atua i tua he tau mena ia. Ti ko e heigoa e kakano ati tupu ki mua e tau matematekelea pihia? Maeke fēfē a tautolu ke fahia ke he tau mena ia? To fai magaaho nakai ka oti e tau matematekelea? To moua e koe e tau tali he tau vala tala ka mui mai.