Oti Tuai e Tau Matematekelea!

KA PEHĒ taha ki a koe, “To nakai leva ti nakai liu matematekelea,” to fēfē e tali haau? Liga tali atu a koe, “Tuga kua miti a koe. Ko e tau mena tutupu pauaki ko e vala he moui.” Po ke liga manatu a koe ki a koe ni, ‘Ko hai haana ne fefeua?’

Pete ne liga kua ha ha i ai tumau e tau mena tutupu pauaki, kua fai fakavēaga ma e amaamanakiaga mooli to hiki e mena nei. Ka ko e hikiaga to nakai moua mai he tau laliaga he tagata. Nakai maeke e tau tagata ke maama katoatoa e puhala mo e kakano ne tutupu pauaki e tau mena nei, ti tote e takitakiaga po ke hikiaga ki ai. Ko e Patuiki ko Solomona i Isaraela i tuai, ne mailoga e pulotu haana mo e kitekiteaga hokulo, ne tohi: “Kua nakai maeke ke he tagata ke iloa e gahua kua eke i lalo he lā; ha ko e mena pete he mamahi e tagata he kumi, ka e nakai iloa e ia; ko e mena foki, pete he pehe hifo e tagata iloilo, ko e iloa ne fai e ia, ka e nakai ni maeke ke iloa e ia.”—Fakamatalaaga 8:17.

Ka nakai takitaki he tau tagata e tau mena tutupu pauaki, ko hai ne maeke? Fakakite he Tohi Tapu ha tautolu a Tufuga na ko ia ne taute e hikiaga nei. Ko Ia ne fakatū e tau fakatokaaga he takatakaiaga he lalolagi, tuga e tafe he vai. (Fakamatalaaga 1:7) He kehekeheaga lahi mahaki mo e tau tagata, ne nakai fai fakakaupāaga e malolō he Atua. Fakamooli ai ke he mena nei, ko e perofeta ko Ieremia ne pehē: “Ko e Iki na e ko Iehova, Kitiala, ko koe ne eke e lagi mo e lalolagi he hau a malolo lahi, mo e hau a lima fakaolo, nakai uka foki kia koe ha mena taha.” (Ieremia 32:17) Tali mai he tufuga he Atua e lalolagi mo e tau fakatokaaga oti kana i ai, iloa e ia e puhala ke takitaki e tau mena oti ke maeke he tau tagata ke nonofo mafola mo e haohao mitaki i ai.—Salamo 37:11; 115:16.

Ti maeke fēfē he Atua ke tamai e hikiaga kua lata? To manatu e koe e vala ke uaaki he tau fufuta he tau vala nei ne talahau ko e loga e tau mena matakutakuina ne tupu he lalolagi he vahā nei ne fakakite e “fakamailoga” he “fakaotiaga he lalolagi.” Pehē a Iesu: “Ka kitia e mutolu e tau mena ia kua eke, kia iloa ai e mutolu, kua tata tuai e kautu he Atua.” (Mataio 24:3; Luka 21:31) Ko e Kautu he Atua, ko e fakatufono he Atua he lagi, to tamai e tau hikiaga lalahi ke he lalolagi, pihia foki ke fakatotoka e tau mena tutupu pauaki. Pete he ha ha ia Iehova ko e Atua e malolō ke taute tokotaha e ia e mena nei, ne fifili e ia ke tuku age e matagahua ke he Tama haana. Tutala hagaao ki a ia nei, ko e perofeta ko Tanielu ne pehē: “Ti foaki age kia ia e pule, mo e fakahekeaga, mo e kautu, kia fekafekau kia ia e tau motu oti, mo e tau kautu, mo e tau vagahau kehekehe; ko e hana pule ko e pule tukulagi haia.”—Tanielu 7:14.

Ko e Tama he Atua ko Iesu Keriso ne tuku age e pule kua latatonu ke tamai e tau hikiaga oti kua lata ke taute e lalolagi mo matakavi fulufuluola. Ua e afe tau kua mole, he haia Iesu he lalolagi, ne fakatātā e ia ke he puhala tote e lotomatala haana ke takitaki e tau mena tutupu pauaki. He taha magaaho, he mogo ne haia a ia mo e tau tutaki haana he foulua he Vai i Kalilaia, “ati to ai e afa, ko e matagi lahi na ti kehe, kua fafati mai e tau peau ke he foulua, ti puke ai ni.” Ne hopoate e tau tutaki haana. He matakutaku a lautolu neke mamate ne fuluhi a lautolu ki a Iesu. Ko e heigoa ne taute e Iesu? Ne “hataki atu e ia e matagi, mo e pehe age ke he vai, Fakamate a kia milino a; ti mate ai e matagi kua milino lahi tuai.” Ne ofomate e tau tutaki haana ti hūhū: “Ka ko hai kia e tagata nai, ne fanogonogo ai e matagi mo e vai kia ia?”—Mareko 4:37-41.

Tali mai mogoia, ne hake a Iesu ke he takatakaiaga fakaagaaga ti foaki ki a ia e malolō mo e pule kua mua atu foki. Ha ko e Patuiki he Kautu he Atua, ha ha ia ia e matagahua ti pihia mo e lotomatala ke fakatokatoka e tau hikiaga kua lata ke foaki ke he tau tagata e moui mafola mo e haohao mitaki ke he lalolagi.

Pete ia, kitia e tautolu e loga he tau lekua mo e tau matematekelea ne taute he tau tagata, kua fakatupu po ke fakaholo ki mua he tau tagata e kelea he fakahoko e lotokai mo e fulukovi. Ko e heigoa he Kautu ka taute hagaao ki a lautolu kua eketaha ke he tau puhala ia ti nakai manako ke hiki? Kua tutala e Tohi Tapu hagaao ke he Iki ko Iesu ka hau “mai he lagi, fakalataha mo e tau agelu he hana malolo. Ke he afi puhopuho, ke taui atu kia lautolu kua nakai iloa e Atua, mo lautolu kua nakai omaoma ke he vagahau mitaki he Iki ha tautolu ko Iesu.” E, to “moumou ai foki a lautolu kua moumou e lalolagi.”—2 Tesalonia 1:7, 8; Fakakiteaga 11:18.

Mole ia, ko e ‘Patuiki he tau patuiki’ ko Iesu Keriso, to fakagahua katoatoa e pule ke he tau malolō he lalolagi. (Fakakiteaga 19:16) To kitia mooli e ia ko e tau tagata he Kautu to nakai mamahi ke he ha matematekelea. To fakaaoga e ia e malolō haana ke tautaofi e tau vala he fuafuaaga matagi mo e fakatokaaga he tau vahā ke aoga ai e tau tagata. Ko e fua to fakamooli e mena ne kua leva e mavehe e Iehova ko e Atua ke he tau tagata haana: “Ti ta atu ai e au e uha kia mutolu ke he vaha ke lata ai, to fua mai ai foki e kelekele hana tau fua, ko e tau akau foki he fonua to fua mai ai ha lautolu a tau fua.” (Levitika 26:4) To maeke he tau tagata ke tā e tau fale ka e nakai matakutaku neke malona ai he falu matematekelea: “To ta fale e lautolu, mo e nonofo ai a lautolu; to to e lautolu e tau ulu vine, mo e kai ai e lautolu ha lautolu a tau fua.”—Isaia 65:21.

Ko e Heigoa Haau kua Lata ke Taute?

Mooli ko koe, tuga ni e tokologa, kua futiaki ke he manatu he tau tagata kua nonofo he lalolagi ne nakai fai matematekelea moumou. Ka ko e heigoa haau ka taute ke nofo i ai? Ha ko “lautolu kua nakai iloa e Atua” mo “lautolu kua nakai omaoma ke he vagahau mitaki” to nakai lata ke momoui he lalolagi ka hoko mai ne atāina he matematekelea, kua maaliali ko ia kua latatonu ke fakaako mogonei hagaao ke he Atua mo e lalago e fakatokaaga haana ma e pule he lalolagi. Manako e Atua ke o mai a tautolu ke iloa a ia mo e omaoma e tala mitaki he Kautu ne kua fakatū e ia puhala he haana Tama.

Ko e puhala mitaki lahi ke fakaako ke taute e mena nei he kumikumi fakamatafeiga e Tohi Tapu. Ha ha i ai e tau fakaakoaga ke fakaatā ke nonofo he takatakaiaga haohao mitaki ka haia i lalo he pule he Kautu. He ha he ole ke he Tau Fakamoli a Iehova ke lagomatai a koe ke iloa e mena ne fakaako he Tohi Tapu? Kua manako mooli a lautolu ke lagomatai a koe ke he mena ia. Taha e mena ke mooli ai—ka lali a koe ke iloa e Atua mo e omaoma ke he tala mitaki, to fakamooli ai e tau kupu he Tau Fakatai 1:33 ke he tuaga haau: “Ka ko ia kua fanogonogo mai kia au to nofo ai a ia mo e monuina; to nofo fakatekiteki a ia, ti nakai matakutaku a ia he tau mena kelea.”