Ko e Ha ne Talahau he Tau Tagata kua Favale e Atua?

OFO nakai a koe ke he hūhū he kili he mekasini nei? Falu ne pihia, ka e tokologa e tagata he vahā nei ne manamanatu kua favale e Atua​—po ke manamanatu teao kua pihia a ia. Ko e ha?

Ko e falu ne hao mai he tau matematekelea pauaki ne hūhū: “Ko e ha ne fakaatā he Atua e tau mena nei ke tutupu? Kehe kia a ia? Po ke favale a ia?”

Kua tupetupe foki e falu ka totou e Tohi Tapu. Ha ha he tau tala pihia tuga ki a Noa mo e Fakapuke, ti manamanatu a lautolu, ‘To fakaatā he ha he Atua fakaalofa e tau tagata oti ia ke mamate? Kua favale kia a ia?’

Lagā pihia kia e tau hūhū ia ki a koe he falu mogo? Po ke moua e koe a koe kua nakai maeke ke tali a lautolu kua manamanatu na favale e Atua? He ha tuaga, manamanatu ke he taha hūhū ka liga lagomatai a koe.

KO E HA NE VIHIATIA E TAUTOLU E FAVALE?

Mukamuka ai, kua vihiatia e tautolu e favale ha kua ha ha ia tautolu e logonaaga hako mo e hepe. Kehe mamao a tautolu mai he tau manu. Ko e ha tautolu a Tufuga ne eke a tautolu “ke he hana fakatai.” (Kenese 1:27) Ko e heigoa e kakano he mena ia? Foaki e ia ki a tautolu e lotomatala ke fakakite e tau mahani mo e tau tuaga he aga haana, logonaaga haana he hako mo e hepe. Manamanatu ke he mena nei: Ka moua e tautolu e logonaaga hako mo e hepe mai he Atua ti manako ke vihiatia e favale, nakai kia mooli kua vihiatia foki ai he Atua?

Kua fakamooli he Tohi Tapu e tuaga tonu ia ha kua pehē e Tohi Tapu, na mavehe e Atua ki a tautolu: “Kua mua he tokoluga pihia haku a mahani ke he mahani ha mutolu, mo e haku tau manatu kua mua ke he tau manatu ha mutolu.” (Isaia 55:9) Ka fifili e tautolu kua favale e Atua, nakai kia kua kehe e mena ha tautolu kua talahau, he pehē kua mua atu e tau puhala ha tautolu ke he haana? Kua pulotu mooli ke moua e tau fakamooliaga loga to taute e fifiliaga ia. Liga hūhū a tautolu, nakai he favale e Atua, ka ko e ha falu he tau gahua haana kua tuga ke favale. Ke lagomatai a tautolu, kia manamanatu la tautolu ke he kakano mooli he “favale.”

Ka pehē a tautolu kua favale e tagata, kua fakafili e tautolu e tau logonaaga haana. Ko e tagata favale kua fiafia ke kitia e falu ne matematekelea po ke nakai manamanatu ke he tuaga tupetupe ha lautolu. Ti ko e matua taane ne akonaki e tama haana ha kua fiafia a ia ke fakamamahi e tau logonaaga he tama haana kua favale. Ka ko e matua taane ne akonaki e tama haana ke fakatonu po ke puipui a ia kua mitaki. Kua mukamuka ke nakai maama e tau fatuakiloto, he iloa mitaki e koe ka nakai hako e talahauaga he taha tagata ki a koe.

Kia fakatutala a tautolu ke he ua e kakano ne manatu e falu kua favale e Atua​—ko e tau matematekelea tupu pauaki ne kitia e tautolu he vahā nei mo e tau fakafiliaga faka-Atua kua totou e tautolu he Tohi Tapu. Fakakite mooli kia he tau mena ne tutupu kua favale e Atua?