Kua Leveki Mooli Kia e Iehova a Koe?

“Ko e tau logonaaga fakateaga kua liga ko e tau mena vihi lahi ne lali au ke kautū i ai.” Talahau ai he taha fifine ne uka lahi ke talitonu kua nakai fai kakano a Iehova ke leveki a ia. Pihia foki nakai e logonaaga haau? Ka pihia, liga manamanatu a koe, ‘Leveki mooli kia e Iehova e tau tagata tapuaki takitaha haana?’ Ko e tali ko e ē! Moua e tautolu e fakamooliaga kua leveki fakatagata a Iehova he tau kupu ha Iesu.—Totou Ioane 6:44.

Ko e heigoa ne talahau e Iesu ko ia ne iloa mitaki e aga mo e finagalo ha Iehova, mai he falu? (Luka 10:22) Ne fakamaama e Iesu: “Nakai maeke ia taha ke hau kia au, ka nakai futia mai he Matua ne fakafano mai au.” Ti nakai maeke a tautolu mo tutaki he Keriso​—mo tagata tapuaki he ha tautolu a Matua he lagi ko Iehova​—ato futia fakatagata e Iehova a tautolu. (2 Tesalonia 2:13) Ka maama e tautolu e talahauaga ha Iesu, ti to kitia e tautolu e fakamooliaga malolō he tau kupu haana he levekiaga fakatagata he Atua.

Ko e heigoa e kakano kua futia e Iehova a tautolu? Ko e vepi Heleni ne talahau “futia” ne fakaaoga foki ke lata mo e toho he kupega he tau ika. (Ioane 21:6, 11) Toho kia e Iehova a tautolu ke he mena ne nakai finagalo a tautolu ki ai, he fakaohooho a tautolu ke fekafekau ki a ia? Nakai. Foaki mai e Iehova ki a tautolu e tokanoaaga ke fifili, ti nakai fakaohooho e ia e tau loto ha tautolu ke hafagi. (Teutaronome 30:19, 20) Taha e tagata pulotu ne talahau pehē: “Nakai maeke ke hafagi mai i fafo ke he loto he tagata. Kua lata ai ke hafagi mai i loto.” Ne kumi a Iehova ke he tau loto he tau tagata tokologa he lalolagi nei, he kumi ki a lautolu ne manako ki a ia. (1 Nofoaga he Tau Patuiki 28:9) He moua e ia e tagata pihia, ne tali atu a ia ke he puhala aamotia. Pihia fēfē?

Ne futiaki totonu, po ke tataki mai e Iehova e loto he tagata kua kotofa mitaki. (Gahua 13:48) Taute pihia e Iehova ke he ua e puhala​—mai he fekau he tala mitaki he Tohi Tapu ne hokotia ki a tautolu takitokotaha, mo e agaaga tapu haana. Ka kitia e Iehova e loto kua talia ke he kupu mooli he Tohi Tapu, ne fakaaoga e ia e agaaga haana ke lagomatai e tagata ke maama mo e fakagahua e kupu mooli ia he moui haana. (1 Korinito 2:11, 12) He nakai fai lagomataiaga faka-Atua, nakai maeke a tautolu ke eke mo tau tutaki mooli ha Iesu mo e tau tagata tapuaki mooli ha Iehova.

Ti ko e heigoa mogoia ne fakaako he tau kupu ha Iesu ki a tautolu ne haia he Ioane 6:44 hagaao ki a Iehova ko e Atua? Kua futia e Iehova e tau tagata ha kua kitia e ia e mena mitaki he tau loto ha lautolu mo e leveki ki a lautolu takitokotaha. He maama e kupu mooli fakalagalaga nei ne tamai e mafanatia ke he fifine ne totoku he kamataaga. Pehē a ia: “He eke mo fekafekau ha Iehova ko e kotofaaga mua ue atu ka moua he tagata. Ti ka fifili e Iehova au ke eke mo fekafekau haana, ti liga kua uho au ki a ia.” Ka e kua a koe? Ko e iloa kia kua leveki e Iehova e tau tagata tapuaki takitokotaha haana kua omoomoi a koe ke hafagi e gutuhala he loto haau?