TAU VALA TALA I MUA | MANAKO NAKAI A KOE KE FAKAAKO E TOHI TAPU?

Fakaholoaga Fakaako Tohi Tapu ma e Tau Tagata Oti

Kua iloa lahi e Tau Fakamoli a Iehova he gahua fakamatala ha lautolu ke he tau tagata tokologa. Ka e iloa nakai e koe na taute foki e mautolu e fakaholoaga fakaako Tohi Tapu ke he lalolagi katoa?

Tagata taane ne fakaako Tohi Tapu he gahuaaga haana

He 2014, ne molea e 8,000,000 e Tau Fakamoli he 240 e motu ne taute e tau fakaako Tohi Tapu ne teitei 9,500,000 he tau mahina takitaha.a Mooli ai, ko e numera he tau tagata ne fakaako Tohi Tapu mo mautolu kua molea e puke tagata he kavi 140 e motu!

Ke taute e gahua fakaako nei, ne lolomi he Tau Fakamoli a Iehova teitei taha mo e hafa e piliona he tau Tohi Tapu, tau tohi, tau mekasini, mo e falu tohi lagomatai ke fakaako e Tohi Tapu he tau tau takitaha—kavi ke he 700 vagahau! Ko e gahua lahi mahaki nei ke lolomi e tau tohi kua fakaatā e tau tagata ke fakaako e Tohi Tapu he tau vagahau ne manako a lautolu ki ai.

“Nakai fa loto au ke fakaako he fano he aoga, ka e fiafia e fakaakoaga nei. Ko e tau mena ne fakaako e au kua to lahi e mafanatia!”—Katlego, Aferika Toga.

“Tali he fakaakoaga ia e tau hūhū oti haaku mo e loga atu foki.”—Bertha, Mesikō.

“Ne taute e fakaakoaga Tohi Tapu he kaina haaku mo e magaaho ne lata mo au. Ko e mitaki ha ia ki a au!”—Eziquiel, Parasili.

“Ko e tau fakaakoaga ne fa mahani ke 15 ke he 30 e minuti he loa—falu magaaho loa atu foki—uta ni ke he mena kua hagahaga mitaki ki a au.”—Viniana, Ausetalia.

“Nakai fai totogi e fakaakoaga—ko e mitaki ha ia!”—Aimé, Benin.

“Ko e fakauka mo e totonu ha ia he faiaoga Tohi Tapu haaku. Ne feaki e maua e fakafetuiaga tata.”—Karen, Northern Ireland.

“Tokologa e tagata ne fakaako e Tohi Tapu ka e nakai eke mo Tau Fakamoli.”—Denton, Igilani.

TAU TALI KE HE TAU HŪHŪ KE HE HA TAUTOLU A FAKAHOLOAGA FAKAAKO TOHI TAPU

Taute fēfē e fakaholoaga fakaako?

Fakaaoga e mautolu e tau matakupu kehekehe he Tohi Tapu mo e kumikumi ke he tau kupu Tohi Tapu ne hagaao ke he matakupu ia. Ma e fakatai, kua tali he Tohi Tapu e tau hūhū tuga anei: Ko hai e Atua? Fēfē a ia? Fai higoa nakai a ia? Nofo i fe a ia? Maeke nakai a tautolu ke fakatata ki a ia? Ko e paleko ke iloa ko e mena fe i loto he Tohi Tapu ke moua mai ai e tau tali.

Ke lagomatai e tau tagata ke moua e tau tali, kua fa fakaaoga e mautolu e tohi ne 224 e lau, Ko e Heigoa ne Fakaako Mooli he Tohi Tapu?b Ne taute pauaki e tohi nei ke lagomatai e tau tagata ke maama e tau matapatu fakaakoaga he Tohi Tapu. Putoia ai e tau fakaakoaga ke he Atua, Iesu Keriso, matematekelea he tagata, ko e liu tu mai, liogi, mo e loga atu foki.

Magaaho fe mo e i fe ka fakaako?

Maeke e fakaako ke taute he magaaho mo e matakavi ne hagahaga mitaki ki a koe.

Fiha e loa he tau fakaakoaga takitaha?

Tokologa e tagata ne fakaatā kavi ke he taha e matahola he tau faahi tapu takitaha ke fakaako e Tohi Tapu. Ka e maeke ke hikihiki e loa he fakaakoaga. To taute e mautolu ke felauaki mo e fakaholoaga haau. Falu kua fakaako ke he 10 po ke 15 e minuti he faahi tapu.

Fiha e totogi he fakaakoaga?

Ko e fakaakoaga mo e tau tohi na foaki noa nakai fai totogi. Felauaki e puhala nei mo e talahauaga ha Iesu ke he haana a tau tutaki: “Kua moua noa e mutolu, kia foaki noa atu e mutolu.”—Mataio 10:8.

Fiha e leva he fakaholoaga katoa?

Ko e leva he fakaakoaga ko e fifiliaga ni haau. Ko e tohi Ko e Heigoa ne Fakaako Mooli he Tohi Tapu? ne 19 e fakaakoaga. Maeke ia koe ke fakaako ke he falu vala ni po ke tau vala tala oti ne latatonu mo koe.

Lata ni kia au ke eke mo taha he Tau Fakamoli a Iehova?

Nakai. Fakalilifu e mautolu e tonuhia he tau tagata takitokotaha ke fifili ko e heigoa haana ka talitonu ki ai. Ka kua maeke e tau tagata ne kua fai lotomatala ke he Tohi Tapu ke taute e fifiliaga aoga.

Moua e au i fe e falu vala tala?

Ko e faahi Kupega Hila jw.org kua ha hā i ai e tau vala tala hako hagaao ke he tau taofiaga mo e tau gahua he Tau Fakamoli a Iehova.

Maeke fēfē au ke ole ma e fakaako Tohi Tapu?

Ole he puhala he Initanete he www.pr418.com.
Tohi atu ke he kaina ne tata atu ki a koe ne tu he lau ua he mekasini nei.
Matutaki mo e Tau Fakamoli a Iehova ne tata ki a koe. Maeke ia koe ke kumi ke he “Jehovah’s Witnesses” he pepa telefoni he matakavi.

a Ko e tau fakaakoaga Tohi Tapu kua fa taute mo e tau tagata takitaha po ke tau matakau ikiiki.

b Ne taute fakailoa he Tau Fakamoli a Iehova. Molea e 230 e miliona lagaki he tohi nei ne lolomi ke he 260 e vagahau.

LAGOMATAIAGA MA E TAU MAGAFAOA

“He magaaho ne kamata e hoana haaku ke fakaako e Tohi Tapu, ne mailoga e au e tau hikiaga lalahi haana. Ne holo ki mua e moui magafaoa ha maua. He fia iloa e tau mena haana ne fakaako, ne kamata foki au ke fakaako. Ne feaki e au e tau aga mitaki ha ko e tau mena ne fakaako e au. Ko e fakaako he Tohi Tapu ne fakamalolō e magafaoa ha maua.”—Eziquiel.

“He kamata au ke fakaako e Tohi Tapu, ne tiaki e au e aga haaku ke kai tulaki mo e konahia, ti fakamahani au ke tautaofi e ita haaku. Kua mua e meā mo e maopoopo e fale haaku. Kua loto fakaaue lahi au ke he magafaoa haaku mo e fiafia au ke taute e tau mena ke fakafiafia a lautolu. Fiafia lahi mahaki toili au.”—Karen.

“Falu tagata ne tuhituhi au he fakaako e Tohi Tapu. Ka e lalago he taane haaku e fifiliaga haaku he pehē: ‘Ai tupetupe au ke he tau tala he tau tagata. He kitia a koe kua taute e tau hikiaga mitaki—ko e mena ia kua aoga ki a au. Fakatumau ke taute e tau mena kua taute e koe.’ Kua mua e fiafia e moui magafaoa ha maua mogonei!”—Viniana.