“Ko e Fakaotiaga”​—Ko e Heigoa e Kakano he Mena Nei?

Ka logona e koe e tau kupu “Kua tata mai e fakaotiaga!” fēfē e manatu haau? Manamanatu nakai a koe ke he patuō lahi ka feoka mo e lalolagi ti mamate oti e tau tagata? Po ke manamanatu a koe ke he matematekelea tokaimaka tuga e mafuike lahi mahaki po ke felakutaki ke toluaki he lalolagi? Ko e tau mena fakatupetupe a ia ke he falu tagata, ka ko e falu foki ne fakauaua po ke fekī ki ai.

Ne talahau he Tohi Tapu: “Ti hoko mai ai e fakaotiaga.” (Mataio 24:14) Ko e mena taha ia ka tupu ne fakahigoa foki ko e “aho lahi he Atua” mo e “Amaketo.” (Fakakiteaga 16:14, 16) Mooli, kua fetotokoaki lahi e tau lotu ke he manatu nei ti holofa e tau manatu matakehe mo e matakutakuina. Pete ia, kua talahau fakamaaliali e Tohi Tapu ke he fakaotiaga he fakakite e kupu mooli hagaao ki ai. Lagomatai foki he Kupu he Atua a tautolu ke kitia maaliali kua tata e fakaotiaga. Mua atu e mitaki, kua fakaako ki a tautolu e puhala ke hao ai! Fakamua, o mai ke fakahako e falu manatu hepe mo e moua e maamaaga tonu. Ko e heigoa e kakano mooli he “fakaotiaga” hagaao ke he Tohi Tapu?

KO E FAKAOTIAGA NAKAI KO E

1. MOUMOUAGA KATOATOA HE FUA LALOLAGI.

   Talahau he Tohi Tapu: “Ko ia [Atua] ne fakave e lalolagi ki luga he hana tau fakave, . . . tukulagi tukumuitea.” (Salamo 104:5) Ko e kupu Tohi Tapu nei mo e falu kua fakamafana a tautolu to nakai fakaai e Atua ke moumou e fua lalolagi po ke fakaatā ai ke moumou!​—Fakamatalaaga 1:4; Isaia 45:18.

2. MENA TUPU NOA NI MO E FAKAOFO.

   Fakakite he Tohi Tapu ko e fakaotiaga kua fitā he fakatoka pauaki he Atua e magaaho ke fakahoko ai. Totou e tautolu: “Ka ko e aho ia, mo e magaaho ia nakai iloa e taha, po ke tau agelu he lagi, po ke Tama, ka ko e Matua ni hokoia. A mutolu, kia mataala a a mutolu, mo e liogi, ha ko e mena nakai iloa e mutolu po ke hoko mai a fe e aho ia.” (Mareko 13:32, 33) Maaliali ai, ne fakatoka he Atua (“ko e Matua”) e “aho ia” ka tamai e ia e fakaotiaga.

3. MENA KAMATA MAI HE TAU TAGATA PO KE HE TAU PATUŌ KUA HOLO MAFITI HE LAGI LIKOLIKO.

   Hoko mai fēfē e fakaotiaga? Pehē e Fakakiteaga 19:11: “Ne kitia foki e au e lagi kua hafagi, kitiala, ko e solofanua hina, ko ia foki kua heke ai kua higoa a ia ko e Fakamoli, mo e Moli.” Matutaki he kupu 19: “Ti kitia ai e au e manu favale, mo e tau patuiki he lalolagi, mo e tau kau ha lautolu, kua fakapotopoto ke tau kia ia kua heke e solofanua mo e hana tau kau.” (Fakakiteaga 19:11-21) Pete ni ko e vagahau fakatai a nei, kua iloa mooli e tautolu: To fakafano mai he Atua e tau agelu loga ke moumou e tau fi haana.

KO E FAKAOTIAGA KO E

1. FAKAOTIAGA HE TAU FAKATUFONO NE NAKAI KAUTŪ HE LALOLAGI.

   Fakamaama mai he Tohi Tapu: “To fakatu ai he Atua he lagi e kautu [fakatufono] nakai fakaoti tukulagi; ko e kautu foki ia nakai tuku atu ai ke he taha motu, to tuki malipilipi mo e fakaotioti e tau kautu oti ia, ka ko ia to tumau tukulagi a ia.” (Tanielu 2:44) Tuga ne talahau mai he vala 3, to hoko e moumouaga ke he “tau patuiki he lalolagi, mo e tau kau ha lautolu,” kua “fakapotopoto ke tau kia ia kua heke e solofanua mo e hana tau kau.”​—Fakakiteaga 19:19.

2. FAKAOTIAGA HE FELAKUTAKI, MAHANI VALE MO E NAKAI FAKAFILI TONU.

   “Kua fakahiku e ia [Atua] e tau ato hoko ke he fakatulakiaga he lalolagi.” (Salamo 46:9) “Ko lautolu ne mahani hakohako to nonofo a lautolu ke he motu; mo lautolu ne katoatoa e mitaki ha lautolu a mahani to toe ai a lautolu; Ka to vevehe kehe mai he motu a lautolu ne mahani kelea, to taaki ai foki a lautolu ne mahani fakavai.” (Tau Fakatai 2:21, 22) “Kitiala, kua fakafou tuai e au e tau mena oti.”​—Fakakiteaga 21:4, 5.

3. FAKAOTIAGA HE TAU LOTU NE KAUMAHALA E ATUA MO E TAU TAGATA.

   “Kua perofeta ai mo e pikopiko he tau perofeta, ti pule ai e tau ekepoa he omaoma kia lautolu; . . . ti heigoa kia e mena ke eke ke he hana fakahikuaga?” (Ieremia 5:31) “Tokologa ke pehe mai kia au ke he aho ia, Ko e Iki na e, ko e Iki na e, nakai kia ko e mena perofeta age a mautolu ke he hau a higoa, ko e hau a higoa foki ne vega ai e mautolu ki fafo e tau temoni, ko e hau a higoa foki ne eke aī e mautolu e tau mana loga. Ati tala age ai e au kia lautolu, nakai iloa ni e au a mutolu, kia o kehe a a mutolu ia au, ko mutolu ne eke e tau mahani kelea.”​—Mataio 7:21-23.

4. FAKAOTIAGA HE TAU TAGATA NE KUA OMOI MO E LALAGO E TAU TUTŪAGA KELEA HE MOGONEI.

   Ne pehē a Iesu Keriso: “Ko e fakahala foki hanai, kua hoko mai e maama ke he lalolagi, ka ko e tau tagata kua mua ha lautolu a manako ke he pouli he ha lautolu a manako ke he maama; ha kua kelea ha lautolu a tau mahani.” (Ioane 3:19) Fakamaama mai he Tohi Tapu e moumouaga he lalolagi katoa i tuai he magahala he tagata tua fakamooli ko Noa. “Ne fakaotioti ai e lalolagi tuai he vai ne puapuā; Ka ko e lagi a enei mo e fonua kua fakatoka ha ko e kupu ia ni, kia taofi ma e afi ke he aho ke fakafili ai mo e mahakava ai e tau tagata matahavala.”​—2 Peteru 3:5-7.

Mailoga ko e “aho ke fakafili ai mo e mahakava” kua fakatatai mo e moumouaga he “lalolagi tuai” he vahā ha Noa. Lalolagi fe ne moumou? Ne hao e palaneta ha tautolu; ka ko e “tau tagata matahavala”​—tau fi he Atua​—“ne fakaotioti ai.” Magaaho ka hoko mai e “aho ke fakafili ai” he Atua, to moumou foki a lautolu kua fifili pauaki mo tau fi he Atua. Ka ko e tau kapitiga he Atua to fakahao, tuga a Noa mo e haana a magafaoa.​—Mataio 24:37-42.

To mitaki mooli e lalolagi nei ka utakehe he Atua e tau fakaohoohoaga kelea oti! Maaliali ai, ko e talahauaga he Tohi Tapu ke he fakaotiaga ko e tala mitaki ka e nakai kelea. Pete ia liga manamanatu a koe: ‘Talahau nakai he Tohi Tapu ki a tautolu e magaaho ka hoko mai e fakaotiaga? Kua tata mai kia? Maeke fēfē au ke hao ai?’