Tau Maveheaga Ka Fakamooli
Ko e tala mitaki ke he Kautu he Atua kua fakamatala ke he lalolagi oti, tuga ni he perofetaaga ha Iesu. (Mataio 24:14) Tala mai he tohi ha Tanielu he Tohi Tapu, ko e Kautu nei ko e fakatufono he Atua. Haia he veveheaga 2 he tohi nei e perofetaaga ke he holoaga he tau fakatufono pauaki, po ke tau kautu ne pule he tau tagata, mai ia Papelonia i tuai ke hoko ke he vahā ha tautolu. He talahau tuai e tau mena tutupu he vahā i mua, pehē e kupu 44:
“To fakatu ai he Atua he lagi e kautu nakai fakaoti tukulagi; ko e kautu foki ia nakai tuku atu ai ke he taha motu, to tuki malipilipi mo e fakaotioti e tau kautu oti ia, ka ko ia to tumau tukulagi a ia.”
Ko e perofetaaga nei mo e falu perofetaaga he Tohi Tapu kua talahau tuai ko e Kautu he Atua ka hukui e tau pule oti kana he tau tagata ti tamai e mauokafua mo e maopoopo ke he tau tagata he lalolagi. To fēfē e moui i lalo hifo he Kautu? Hanei falu maveheaga kua mua e mitaki ka nakai leva ti fakamooli.
TO NAKAI FAI FELAKUTAKI
Salamo 46:9: “Kua fakahiku [he Atua] e tau ato hoko ke he fakatulakiaga he lalolagi; kua fafati e ia e kaufana, mo e tūtū e tao; kua huhunu foki e ia e tau kariota ke he afi.”
Manamanatu la to fēfē e lalolagi ka fakaaoga oti e tau tupe mo e tau lotomatala ne fakaaoga mogonei ke he tau kanavaakau ke taute aki e tau mena ke aoga e tau tagata, ka e nakai ke tamate a lautolu! To fakamooli e maveheaga ia i lalo hifo he Kautu he Atua.
TO NAKAI FAI GAGAO
Isaia 33:24: “To nakai pehe mai foki taha kua nofo ai, Kua gagao au.”
Manamanatu la ke he lalolagi ka nakai fai tagata kua matematekelea he gagao ate, kenesā, malaria, po ke falu gagao. To mole atu e manako ke he tau fale gagao mo e tau vai tului fakaekekafo. Kua mitaki katoatoa e malolō tino—pihia e vahā anoiha ma e tau tagata ka nonofo he lalolagi.
TO NAKAI KŪKŪ E TAU MENA KAI
Salamo 72:16: “To ha i ai e puke aloalolima he tau saito ke he motu, ki luga he fuga mouga.”
To loga e tau fua he fonua ke kai e tau tagata oti, mo e to maeke e tau tagata oti ke moua ai. To nakai liu ke hoge ti to huhua mitaki e tau mena kai.
TO NAKAI FAI MAMAHI, MOMOKO, MO E MATE
Fakakiteaga 21:4: “To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.”
Kakano he mena ia ko e moui tukulagi kua mitaki katoatoa ke he parataiso he lalolagi! Pihia e maveheaga he ha tautolu a Tufuga fakaalofa, ko Iehova ko e Atua.
“TO MONUINA FOKI”
To mooli nakai e tau mena oti nei? Pete kua laulahi ne makai ke talia kua mitaki lahi e moui ne mavehe mo e fakamaama mai he Tohi Tapu, ka kua kehekehe e tau kakano ati uka e tokologa ke maama hagaao ke he moui tukulagi. Nakai ofo he mena ia, ha kua nakai fai tagata ne moua e moui pihia ke maeke ke tala mai ki a tautolu.
Kua fakatupa e tau tagata ke he agahala mo e mate ti kua leva lahi e pehia he mamahi, matematekelea, mo e tau tuaga uka ati tokologa e tagata kua talia na pihia pauaki ni e puhala he moui. Ka e nakai pihia e finagalo he Tufuga ko Iehova ko e Atua ma e tau tagata.
Ke lagomatai a tautolu ke falanaki to moolioli e tau maveheaga oti he Atua, ne talahau mauokafua e ia hagaao ke he tau kupu haana: “Nakai liu noa mai [ai] kia au; ka to eke ni e mena kua loto au ki ai, to monuina foki ia ke he mena ne fakafano atu ai e au.”—Isaia 55:11.
Fakamaama he Tohi Tapu ko Iehova ko ia ko e Atua “kua nakai maeke ke pikopiko.” (Tito 1:2) Ha kua mavehe mai e ia e tau mena oti nei kua mitaki lahi ma e vahā anoiha, kua aoga ma tautolu ke manamanatu: Maeke mooli nakai e tau tagata ke momoui tukulagi he lalolagi Parataiso ne mavehe mai? Ko e heigoa ha tautolu kua lata ke taute ke aoga mai he maveheaga he Atua? He tau vala ka mui mai he tohi nei, to moua e koe e tau vala tala aoga ke tali e tau hūhū ia.