Puha Hūhū
◼ Ko hai kua lata ke fakapuke e tau kupono mo e tau ole he Internet?
Haia i loto he tau tohi ha tautolu e tau kupono ne maeke ke fakapuke ti fakafano atu ke he la ofisa ke ole tohi po ke ahiahi atu he Tau Fakamoli a Iehova. Lafi ki ai, kua maeke ke fakaaoga e Web site www.watchtower.org ha tautolu ke ole ma e fakaako Tohi Tapu. Kua lagomatai he tau fakatokaaga nei e tokologa ke iloa e kupu mooli. Ka e ha ha i ai e tau lekua ka fakaaoga he tau tagata fakailoa e tau puhala nei ke taute e tau fakatokaaga ma e tau magafaoa ha lautolu po ke falu ke moua e tau lagomatai fakaagaaga.
Falu kua nakai fiafia ke moua e tau tohi ne nakai ole e lautolu mai he la ofisa, ti logona hifo kua fakatauhele he fakatokatokaaga ha tautolu a lautolu mo e kua tuku e tau higoa ha lautolu ke meli tumau ki ai. Ko e tau tagata fakailoa ne moua e fakailoaaga ke o atu ke he tagata ne nakai ole e ia ke ahiahi age ne fakafuafua kelea a lautolu ka hogohogo manava e tagata he kaina. Ko e mena ia, ko e tau ole ne tuku he Web site ha tautolu po ke tau kupono kua lata ke moua mai ia lautolu ni kua fiafia ka e nakai mai he tau tagata fakailoa ke lata mo e falu. Ka mailoga ai ko e ole kua fakafano atu he taha tagata ke lata mo e taha, to nakai ni fakaaoga.
Ti maeke fēfē a tautolu ke lagomatai fakaagaaga e tagata he magafaoa po ke kapitiga? Ka manako a koe ke moua e ia e tau tohi, ko e ha he nakai fakafano fakahako atu ki a ia ko e mena fakaalofa? Ka fiafia a ia ti manako ke ahiahi atu e Tau Fakamoli ka e nakai iloa e koe e puhala ke matutaki mo e tau motua he fakapotopotoaga he matakavi ia, lata ia koe ke tuku e laupepa Please Follow Up (S-43) ke he tohikupu he fakapotopotoaga haau, to kitekite a ia ki ai ti ta atu ai ke he la ofisa. Kaeke ko e tagata ne fiafia kua nofo he fale puipui, fale leveki tagata fakaaoga fakahehē he tau vai tuga e tau tulaki po ke fale gagao, kua nakai lata ia koe ke matutaki ke he la ofisa ke lata mo ia. Ka e maeke a koe ke fakamafana a ia ke matutaki ke he tau matakainaga taane ne ahiahi atu ke he fale ia po ke tohi atu ni a ia ke he la ofisa.