Yeremia
11 Ebinywa ebyo Yehova abwira Yeremia bya bino: 2 “Inywe bandu, muhulikirire ebinywa by’endaghane eno!
“Ubwirebyo* abandu be Yuda n’abikalani be Yerusalema. 3 Ubabwire uti, ‘Yehova oMungu we Israeli ati: “Atakirawe omundu oyutesikaya ebinywa ebiri omo ndaghane eno, 4 eyo nabwira abotata-kulu wenyu niti basikaye, omughulu nabalusaya omo kihugho kye Misri, omo riko ry’eriyeyukiryamo ekyuma. Munababwira niti, ‘Musikaye ebyo ngababwira, kandi mukole ebyosi ebyo ngabasaba erikola; neryo mukendibya bandu baghe, naghe ngendibya Mungu wenyu, 5 nitoke eriberererya ebinywa ebyo nalapira abotata-kulu wenyu, niti ngendihabo ekihugho ekikasendamo amaziwa n’obuki, ngoko biri munabwire.’”’”
Neryo munasubirya niti: “Amina,* Yehova.”
6 Neryo Yehova mwanibwira ati: “Utulaghanaye ebinywa byosi ebi omo miyi ye Yuda n’omo syonzira sye Yerusalema: ‘Muhulikirire ebinywa by’endaghane eno n’erikolesyabyo. 7 Kundi ingakunga abotata-kulu wenyu bo burora-rora eritsuka ekiro nabalusaya omo kihugho kye Misri erihika na munabwire. Ingabya ininemubakunga kangyi-kangyi* omw’ibabwira niti: “Mukwame ebyo ngababwira.” 8 Aliwe mubatahulikirira, kutse eritegha amatwi wabo. Omo mwanya w’ekyo, obuli mundu mwabya akakwama ebiri omo mutima wiwe mubi omo righundu. Neryo munabaletako emyatsi yosi eyihandikire omo ndaghane eyo nababwira niti bakwame, aliwe mubaghana erikwamayo.’”
9 Neryo Yehova mwanibwira ati: “Erihotera riri omo kati-kati k’abandu be Yuda n’abikalani be Yerusalema. 10 Babiritasyasubira amakosa ogho abotata-kulu wabo bakola kera, abaghana erikwama ebinywa byaghe. Nabo babirikwama eyindi miungu n’eriramyayo. Abandu be Israeli n’abe Yuda sibetasikya endaghane eyo nakola n’abotata-kulu wabo. 11 Neryo Yehova akabugha ati: ‘Ngendibaletera obuhanya obo batebangatoka eribalako. Omughulu bakendisyanisaba bati nibawatikaye, sinendisyahulikirirabo. 12 Neryo emiyi ye Yuda n’abikalani be Yerusalema bakendisyasaba obuwatikya bw’emiungu eyo babya bakaherera amahere,* aliwe siyendisyasabulabo omughulu obuhanya bukendisyabahikira. 13 Kundi iwe Yuda, emiungu yaghu yabiribya minene ng’emiyi yaghu, kandi wabirihimbira ekindu ekikita esisoni* ky’ebiherero bingyi ng’esyondaki esiri omo Yerusalema, n’ebiherero by’erihererako Baali amahere.’
14 “Naghu* isiwasabira abandu aba. Isiwabasabira obuwatikya, kutse eribasabira, kundi sinendibahulikirira omughulu bakendinisaba obuwatikya bakaghalwa.
15 Omwanzwa waghe anasingene eribya omo nyumba yaghe,
Abandu bangyi ibanemukola emipango mibi?
Banemwenditoka erikakirya obuhanya obukendikuhikira
Busana n’eriherera enyama nyibuyirire?*
Wanganatsema omo mughulu owali ng’oyo?
16 Kera, Yehova iniakakwahula mo muti oghuwene w’emizeituni
Omuti oghuwene, owaliko amatunda aghuwene.
Mwarururma kutsibu, neryo amahira kugho k’omuliro,
Kandi mubatwa ebitahi byagho.
17 “Yehova w’emilondo, oyo wakuhera, abiribugha ati obuhanya bukendikuhikira busana n’obubi obo abandu be Israeli n’abe Yuda bakola, abanihitanaya busana n’eriherera Baali y’amahere.”
18 Yehova mwanibwira kusudi niminye;
Oko mughulu oyo, muwanikangania ebyo babya bakakola.
19 Nabya ng’ekyana ky’embuli kyolo ekikayakerawa.
Nabya isinasi ngoko banemunisohera:
“Tutsandaye omuti n’amatunda wako,
Tulusayegho omo kihugho ky’abandu abaliho,
Erina riwe ritoke eribiriranwa kera na kera.”
20 Yehova w’emilondo akatswera omo ritunganene;
Akatsopolaya amalengekania w’emwisi-mwisi,* kandi akatsopolaya omutima.
Leka ngalebaye ngoko ukendibatuhulirya,
Kundi nabirikuletera olubanza lwaghe.
21 Neryo bino byo Yehova akabugha oko balume be Anatoti, abakasonda erikwita, kandi abakabugha bati: “Isiwabugha obuminyereri omo rina rya Yehova. Wamabikola utya, itukakwita”; 22 Yehova w’emilondo akabugha ati: “Ngendibatondesya. Abalwana bakenditibwa omo muyali, n’abana babo b’obulume n’ab’obukali bakendihola omo nzala. 23 Sihali n’omughuma wa kubo oyukendisyasaka, kundi ngendisyaletera abalume be Anatoti b’obuhanya oko mwaka ogho ngendisyabatondeseryako.”