Yeremia
12 Yehova, uli mutunganene omughulu ngakuletera olubanza lwaghe,
Omughulu ngakanaya naghu oko myatsi y’eritunganene.
Aliwe busanaki ababi bakatoka erikola emyatsi yosi eyo bakakola?
Kandi busanaki abatebya sibalihanga-hangaya?
2 Muwaherabo, neryo bamasako emirihi.
Mubalasa n’erihetako amatunda.
Bakabya ibanemukwahula, aliwe isighuli omo malengekania wabo w’emwisi-mwisi.*
3 Yehova, uniasi ndeke, kandi ukabya ighunanilangire;
Wabiritsopolya omutima waghe n’erilangira ngoko ane omo bughuma naghu.
Ulusayebo omo bandi, ngoko esyombuli esikayakerawa sikalusibawa omo sindi,
Uhirebo eluhande busana n’ekiro ky’eritibwa.
4 Erihika mughulu wahi ekihugho kikendisyabya ikinahongire?
N’erihika mughulu wahi ebiti by’omo malima wosi bikendisyabya ibinumire?
Esyonyama n’esyonyunyu syabirikwa,
Busana n’obubi bw’abandu abikere mukyo.
Kundi ibakabugha bati: “Syalangire ebikendituhikira.”
5 Eritibita n’abandu abakaghenda omo bisando ryamabikuluhya,
Wanganatoka eritibita haghuma n’esyosabayiri?*
Utekene omo kihugho ekirimo buholo,
Aliwe unemwenditoka eriyilusya omo hisaka ehitatene ehiri oko musike we Yordani?
6 Nibya n’abaghala benyu, ekihanda kya baba waghu,
Nabo babirikuhotera.
Kundi banemulaka omo mulenge muli bakakutsuma.
Isiwayiketerabo,
Nomo bangakubwira ebinywa ebyuwene.
7 “Nabirisigha enyumba yaghe; nabirisigha omwandu waghe.
Nabirisigha omwanzwa waghe omo byala by’esyonzighu siwe.
8 Okw’ingye, omwandu waghe abiribya ng’esimba eyiri omo musitu.
Mwakanirurumira.
Ekyo mukikaleka inamupona.
9 Okw’ingye, omwandu waghe ali ng’akanyunyu akakahigha akalimo esyorangyi-rangyi;*
Ehindi hinyunyu ehikahigha hikatimba kuko n’erilwa nako.
Mwase muhindane haghuma, inywe syonyama syosi sy’omoli,
Mwase mulye.
10 Abalisya bangyi babiritsandya eririma ryaghe ry’emizabibu;
Babirilyatangira ekitaka kyaghe.
Babiriyira ekitaka kyaghe ekyuwene mo mbwarara n’amatongo.
11 Kyabiribya kisambu.
Kyabirihonga;*
Ngalangirakyo ng’amatongo.
Ekihugho kyosi kyabiriyirwa mo matongo,
Sihali oyutsomene.
12 Abakatsandaya babiryasira omo syonzira syosi esitsandire esilabire omo mbwarara,
Kundi omuyali wa Yehova kw’anemwita abandu b’omo kihugho eritsuka oko mupaka mughuma erihika oko ghundi.
Sihali omundu* oyo wikere buholo.
13 Mubahera engano, aliwe bamahulula amahwa.
Mubayiluhya buyira.
Bakendisyahemuka busana n’ebyo beraya
Kundi Yehova abirihitana kutsibu.”
14 Bino byo Yehova akabwira abahimbani baghe bosi abakakola obubi, abakatula oko mwandu ogho naha abandu baghe be Israeli mo wabo: “Ngendikulabo omo kihugho kyabo, kandi ngendikula abandu be Yuda balue omo kati-kati kabo. 15 Aliwe ngendisyabya nabikulabo, kandi ngendisyabakwira obulighe n’erisubya obuli mundu oko mwandu wiwe n’omo kiharo kiwe.”
16 “Bamabigha eriyighendya ng’abandu baghe n’erilapa omo rina ryaghe omw’ibugha bati, ‘Oko kwenene-kwenene ngoko Yehova aliho!’ ngoko nabo bakangiriraya abandu baghe erilapa omo rina rya Baali, ibakendihabwa omwanya omo kati-kati k’abandu baghe. 17 Aliwe bamabighana eryowa, ekihanda ekyo nakyo ingendikulakyo, ingendikulakyo n’eritoghotyakyo,” Yehova atya.