Yeremia
13 Yehova mwanibwira ati: “Ghenda, uyaghule omukaba w’ekitani, neryo uhangegho omo mbindi, aliwe isiwahiragho omo maghetse.” 2 Neryo munaghula omukaba, ngoko Yehova anibwira, namahangagho omo mbindi. 3 Kandi Yehova mwakania naghe engendo y’akabiri, amanibwira ati: 4 “Wimaye omukaba ogho ulyaghula, ogho wabiryambala omo mbindi, neryo ughende oko musike we Efrati. Ukendibya wahikayo, iwabisa omukaba oyo omo mughenyo w’olukuka.”* 5 Neryo munaghenda, namayabisa omukaba oko musike we Efrati, ngoko Yehova ananibwira.
6 Aliwe habere habilaba ebiro binene, Yehova mwanibwira ati: “Uye oko musike we Efrati, uyende omukaba ogho nakubwira niti uyabise eyo.” 7 Neryo munaya eyiri omusike we Efrati, namatabula omukaba, n’erilusyagho aho nabisagho. Nabere babilusya w’oho, munafumbula ngoko abiritsanda; abya isyakiwite mughaso n’ahake.
8 Kandi Yehova mwakania naghe, amanibwira ati: 9 “Yehova ati, ‘Ko ngenditsandya nitya eriyiheka ry’abikalani be Yuda n’eriyiheka kutsibu ry’abikalani be Yerusalema. 10 Abandu babi aba, abakaghana eryowa ebinywa byaghe, abakakwama omutima wabo omo righundu, kandi abakaramaya eyindi miungu, omw’ikolerayo n’erikukamirayo, bakendisyabya ng’omukaba oyo owatawite mughaso n’ahake.’ 11 ‘Kundi ngoko omundu akahanga omukaba omo mbindi yiwe, kutya naghe munayihangako ekihanda* kyosi kye Israeli n’ekihanda* kyosi kye Yuda,’ Yehova atya. ‘Munayira nitya batoke eribya bandu baghe, ekindu ekikaleka erina ryaghe iryakumayira, ekindu ekikaleka inapipwa, n’ekindu ekyuwene nga. Aliwe mubatowa.’
12 “Neryo kandi litolere iwababwira ebinywa bino: ‘Yehova oMungu we Israeli ati: “Litolere obuli rilegha rinene iryusulibwamo edivai.”’ Neryo bakendikusubirya bati, ‘Tunasi ndeke-ndeke ngoko litolere obuli rilegha rinene iryusulibwamo edivai.’ 13 Neryo ukendibabwira uti, ‘Yehova ati: “Ngendyusulya obutamiri omo bikalani bosi b’ekihugho kino, omo bami abikere oko kitumbi ky’obwami kya Daudi, omo bahereri, omo baminyereri, n’omo bikalani bosi be Yerusalema. 14 Ngenditundulirabo oghundi oko ghundi, abobaba n’abana babo kutya,” Yehova atya. “Sinendikwa obulighe, sinendiyowa muhanda busana nabo, kutse sinendibaghanyira; sihali ekikendinikakirya eribabughaho.”’
15 Muhulikirire n’eritegha okutu.
Isimwayiheka, kundi Yehova abiribugha.
16 Muhe Yehova oMungu wenyu y’olukengerwa
Embere alete omwirimya
N’embere ebisando byenyu bitwikale oko bitwa, omw’igholo-gholo.
Mukendisyalindirira ekyakakala
Aliwe akendisyaleta ekitsutsu kinenene;
Akendisyahindula ekyakakala mo mwirimya munene.
17 Kandi mwamabighana eryowa,
Ingendilira* omo bubiso-biso busana n’eriyiheka ryenyu.
Ingenditoghongya emisonia minene n’ameso waghe iniakendisendamo emisonia,
Kundi esyombuli sya Yehova isyabiritwalwa omo bunyewa.
18 Ubwire omwami n’omughole mukulu uti, ‘Mwikale omo mwanya w’ahisi kutsibu,
Kundi embita yenyu eyighambire ikenditogha oko mutwe wenyu.’
19 Emiyi y’oko luhande lw’eyikwa yabirikingwa,* sihali oyo wangakingulayo.
Abandu bosi be Yuda babiritwalwa omo bunyewa, abosi babiritwalwa omo bunyewa.
20 Usumbe ameso waghu, neryo ulangire abakasira oko luhande lw’endata.
Ekihyo ekyo wahabawa, esyombuli syaghu esyuwene siri hayi?
21 Omughulu abira baghu b’oko mutima abo watsuka erikola nabo obwira bakendisyakuha amalipizi
Ukendisyabugha utiki?
Siwendisyowa obulumi ng’obw’omukali oyunemubuta?
22 Ukendisyabugha omo mutima uti, ‘Busanaki emyatsi eyi muyikanihikira?’
Ni busana n’ekosa yaghu eyikalire eyiryaleka ibakulusyako ekitswe ky’eyikwa ky’oko ropo yaghu
N’ekyo kyo kiryaleka ehisinziro hyaghu ihyakolerwa muhanda.
Ebyo byamabya ibyanganatokekana,
Kwesi imwanganatoka erikola ebyuwene,
Inywe bandu mubeghere erikola ebibi.
24 Neryo ngendibapanza-panza ngoko erihunga ryomo mbwarara rikabiraya ebiti.
25 Ekyo kyo kikendikuhikira,* ekyo ky’ekihande ekyo nabirikulengera,” Yehova atya,
“Kundi wabirinibirirwa, kandi kundi ukikiriraya amabehi.
26 Busana n’ekyo, ngendisumbira ekitswe ky’eyikwa ky’eropo yaghu omo busu bwaghu,
Neryo abandu bakendilangira obusoni bwaghu,
27 Obusingiri bwaghu, n’eribehererya ryaghu busana n’engumbu nene,
Obumbalaka bwaghu obukita esyonye*
Omo hitwa, omo kisuki,
Nabirilangira emighendere yaghu eyikita esyonye.
Bulighe okw’iwe, iwe Yerusalema!
Erihika mughulu wahi ukendisyabya isiwerire?”