Yeremia
14 Bino byo Yehova abwira Yeremia ebilebirye emighulu y’ekipwa:*
2 Yuda ali omo kiriro n’emilango yayo yabiritsanda.
Yabiritobera erihika omo kitaka n’erihangya-hangya,
N’omulenge anemulua omo Yerusalema.
3 Abakama bakatuma abaghombe* babo bayende amaghetse.
Abaghombe bakaya eyiri ebyuna by’amaghetse, aliwe ibatasunga amaghetse.
Bakasubula n’ebindu byabo by’erihekamo amaghetse isibirimo maghetse.
Babirihemuka n’eribunika mutima,
Kandi bakaswika emitwe yabo.
4 Abalimi bakaswika omutwe busana n’esisoni,
Kundi ekitaka kyabirilabamo emighenye-mighenye
Kusangwa embula siyirisyawa omo kihugho.
5 Nibya n’engabi y’obukali eyiri omoli yabirisigha ekyana kyayo ekyo yikalua okw’ibuta,
Kundi sihakiri ebiti.
6 Esyopunda sy’omoli syabirimana oko hitwa ehiteko kindu.
Isinehumula-humula ng’emyondo;*
Ameso wasyo abiriluha busana n’erisondya ebiti.
7 Yehova, lwira oko rina ryaghu,
Nomo amakosa wetu anemukangania ngoko tuliko musango,
Kundi erileghula ryetu okw’iwe ni rinene,
Kandi n’iwe twabirikolera erilolo.
8 Iwe maha we Israeli, Omulamya wiwe, oyukasabula Israeli omo mighulu eyikalire,
Busanaki uli ng’omugheni omo kihugho,
Ng’omubalami oyukimana busana n’erighotsera risa?
9 Busanaki uli ng’omundu oyo wabirisweka,
Ng’omundu w’amaka oyutewangasabula?
Kundi uli omo kati-kati ketu, Yehova,
N’erina ryaghu riri okw’itwe.
Isiwatulekeranaya.
10 Bino byo Yehova akabugha oko bandu aba: “Banzire erighanga-ghanga. Sibaliligha ebisando byabo bikabya ibine haghumerera. N’ekyo sikiritsemesaya Yehova. Neryo akendisyibuka ekosa yabo n’eribatswera busana n’amalolo wabo.”
11 Enyuma sy’aho, Yehova mwanibwira ati: “Isiwanisaba uti nikolere abandu aba b’ekibuya. 12 Omughulu bakakola amafungo, siniryowa emisabe yabo y’erinilemba-lemba. N’omughulu bakaherera amahere w’eryokererya awaghonere n’ebihembo by’akalyo, sinditsomanabyo, kundi ngendibabughaho omo muyali, omo nzala, n’omo bihunzo.”*
13 Aliwe munabugha niti: “Bulighe bwaghe! Yehova, iwe Mukama Mukulu oko Bosi! Ibwa abaminyereri ko banemubabwira bati, ‘Simwendilola oko muyali n’oko nzala, kundi ngendibaha obuholo bw’ekwenene omo mwanya ono.’”
14 Kandi Yehova mwanibwira ati: “Abaminyereri bakabugha obuminyereri bw’amabehi omo rina ryaghe. S’ingye niryabatuma, s’ingye niryababwira niti babughe obuminyereri, munitetakania nabo. Enzoli y’amabehi, erilaghula erite na mughaso, n’amabehi w’omutima wabo, ebyo byo babiribya bakababwira. 15 Busana n’ekyo, bino byo Yehova akabugha oko baminyereri abakabugha obuminyereri omo rina ryaghe is’ingye niryatumabo, kandi abakabugha bati ekihugho sikyendihikamo omuyali kutse enzala: ‘Abaminyereri abo bakendihwa omo muyali n’omo nzala. 16 N’abandu abo abaminyereri abo bakabwira obuminyereri, bakendikwa omo nzala n’omo muyali. Bakendisyaghuswa omo syondaki sye Yerusalema, sihendisyabya oyukendisyatabo, ibo, abakali babo, abana babo b’obulume, n’abana babo b’obukali. Kundi ngendibutulirako obuhanya obo batolere.’
17 “Litolere iwababwira uti,
‘Ameso waghe asendemo emisonia omo kiro n’omw’itungyi butsir’ileka,
Kundi omumbesa mubikira w’abandu baghe abiripondwa-pondwa ndeke-ndeke n’eritsutsangika,
Aliko ekironda kinene kutsibu.
18 Ngabya nabiya emoli,
Ngalangira abandu abalyakwa omo muyali!
Kandi ngabya nabingira omo muyi,
Ngalangira abandu ababirilwala busana n’enzala!
Kundi omuminyereri n’omuhereri mubayatimba-timba omo kihugho ekyo batasi.’”
19 Wabirilw’iwaghana e Yuda yo losi, kutse wabirilw’iwapona* Sioni?
Busanaki wabiritunyatsya, erihika oko kika sitwangalama?
Twabya tukalindirira obuholo, aliwe sihetabya kindu kibuya,
Twabya tukalindirira omughulu w’erilama, aliwe hali obuba bunene!
20 Yehova, twamaligha ngoko twabirikola ebibi,
Kandi twamaligha ngoko abotata-kulu wetu mubakola ekosa,
Kundi twabirikukolera erilolo.
21 Isiwatulekeranaya busana n’erina ryaghu,
Isiwapokaya ekitumbi kyaghu ky’obwami ky’olukengerwa.
Wibuke endaghane eyo wakola haghuma netu, isiwatwayo.
22 Esanamu y’abandu b’ebihanda eyitawite mughaso yanganatoka eriwisya embula?
Kutse nibya n’olubula lwanganatoka eriwisya embula nene olwilwene-lwene?
Yehova Mungu wetu, iwe musa n’iwe wangatoka erikola ekyo!
Kandi iwe tuhiriremo amaha,
Kundi iwe musa, n’iwe wahangyika ebindu byosi ebyo.