Yeremia
20 Nikwa Pashuri mughala wa Imeri, omuhereri, kandi oyo wabya mwimaniri mukulu w’ehekalu ya Yehova, abya akahulikirira Yeremia anianemubugha emyatsi eyo. 2 Neryo Pashuri mwahunza omuminyereri Yeremia n’erimuhira omo kindu ky’esyombagho ky’eriboheramo mundu* ekyabya oko Lukyo lw’Endata lwa Benyamini, olwabya hakuhi n’ehekalu ya Yehova. 3 Aliwe ekiro ekikwamire, omughulu Pashuri alusaya Yeremia omo kindu ky’esyombagho ky’eriboheramo mundu,* Yeremia mwamubwira ati:
“Yehova syendisyakwahula mo Pashuri, aliwe ukendyahulwa mo Obuba Ehosi-hosi. 4 Kundi Yehova ati, ‘Ngendikuyira mo kindu ekikakwita obuba n’ekikita abira baghu bosi b’obuba, esyonzighu syabo sikenditabo omo muyali ighunalangire. Kandi ngendihira e Yuda yosi omo byala by’omwami we Babiloni; akendisyatwalabo omo bunyewa mwe Babiloni n’eriitabo omo muyali. 5 Kandi ngendisyaha esyonzighu syabo obuteke bosi bw’omo muyi ono, ebindu byosi ebiri mugho, ebindu byosi by’obughuli ebiri mugho, n’ebindu byosi by’obughuli by’abami be Yuda. Bakendisyapurabyo, bakendisyimyabyo, n’eritwalabyo e Babiloni. 6 Aliwe iwe, Pashuri, n’abosi abikere omo nyumba yaghu, mukendisyaya omo bunyewa. Ukendisyaya e Babiloni, n’eyo yo ukendisyaholera. Kandi eyo yo ukendisyatabwa, iwe n’abira baghu bosi, kundi muwababwira obuminyereri bw’amabehi.’”
7 Yehova, wabiriniteba, naghe nabiriligha eritebwa.
Mughukakolesaya akaghala kaghu erilwa naghe, neryo mughukanisinga.
Omo musibo wosi, bakabya ibanemunisekererya;
Obuli mundu akanisekereraya.
8 Kundi ngabya nabibugha, kikatolera inabugha omo mulenge muli niti:
“Obutsururu n’eritoghotya!”
Omo musibo wosi, ngatsambawa n’erisekereribwa busana n’ekinywa kya Yehova.
9 Neryo munabugha niti: “Sinendisyasyamwahula,
Kandi sinendisyasyabugha omo rina riwe.”
Aliwe ekinywa kiwe mukyabya omo mutima waghe ng’omuliro owakaka kutsibu, ogho babirikingira omo makuha waghe.
Kandi nabya isinangatoka erileka womo.
Nabya isinangatoka erivumiliagho.
10 Kundi munowa esyongulu nyingyi esituwene;
Obuba bunene mubwanitimbako.
“Mumushitake, tumushitake!”
Abosi ababya bakanisunzira obuholo babya bakalindirira ambu ngendiwa ahisi,
Babya bakayibwira bati:
“Amabikola akakosa kangaha-ngaha,
Itwanganamusinga n’erimuha amalipizi busana n’ebyo abiritukolera.”
11 Aliwe Yehova abya haghuma naye ng’omusuda oyukita obuba.
Busana n’ekyo, abakaniaghalaya bakenditwikala. Sibendisyasinga.
Bakendisyahemulwa kutsibu, kundi sibendisyasinga.
Erihemuka ryabo rikendisyabya rya kera na kera, siryendisyabiriranwa.
12 Aliwe iwe, Yehova w’emilondo, ukatsopolaya omutunganene.
Ukalangira amalengekania w’emwisi-mwisi* n’omutima.
Leka nilangire ngoko ukahabo amalipizi,
Kundi iwe nabirilekera olubanza lwaghe.
13 Mwimbire Yehova! Mupipe Yehova!
Kundi abirisabula omwera* oyulue omo byala by’ababi.
14 Ekiro ekyo nabutawamo kitakirawe!
Ekiro ekyo mama waghe anibutamo isikyatsumulawa!
15 Atakirawe omundu oyo wasyabwira baba waghe engulu mbuya eno, ati:
“Babirikubutira omwana w’obulume, omulwana!”
Ekyo mukyaleka iniatsema kutsibu.
16 Omundu oyo abye ng’emiyi eyo Yehova atsandaya butsir’iyikubya bomo.
Omundu oyo owe emilenge miri-miri omo asubui, owe n’omulenge w’amalwa oko medi.
17 Busanaki mwataniita inikine omo nda ya mama waghe,
Neryo mama waghe inialw’iniabya yisinda yaghe
Kandi inialw’iniabya iniane mukule omo ngebe yiwe yosi?
18 Erilua omo nda ya mama waghe riri na mughaso ki,
Namabya imonaluamo busana n’eryaghalwa n’eribya omo bulighe,
N’eribughirira ebiro byaghe omw’ihemuka?