Yeremia
21 Yehova mwakania na Yeremia. Oko mughulu oyo, omwami Zedekia abya iniabirimutumako Pashuri mughala wa Malkiya na Zefania mughala wa Maaseya, omuhereri, ati amubwire ati: 2 “Kisi utubuliraye Yehova, kundi omwami Nebukadneza* we Babiloni anemulwa netu. Kwa muhwa Yehova anganatukolera omughuma w’oko myatsi y’obutoki eyo akakola, neryo Nebukadneza inialua ewetu.”
3 Neryo Yeremia mwababwira ati: “Bino byo mutolere imwabwira Zedekia: 4 ‘Yehova oMungu we Israeli ati: “Ebindu by’amalwa ebiri omo byala byenyu, ebyo mukalwamo n’omwami we Babiloni n’Abakaldayo ababiribatimbako ehihya w’oluhimbo batoke erilwa nenyu, ngendibitisya omo bindu by’amalwa ebyo. Kandi ngendihindaniabo omo kati-kati k’omuyi ono. 5 Naghe ingyuwene-wene ngendilwa nenyu omo byala byaghe by’amaka* n’okuboko kwaghe kw’amaka, omo kinigha, omo buhitane, n’omw’ihitana rinene. 6 Ngendiita abikalani b’omo muyi ono, abandu n’esyonyama. Bakendikwa omo kihunzo kinene.”’*
7 “‘“Enyuma sy’emyatsi eyo,” Yehova atya, “omwami Zedekia we Yuda, abaghombe biwe, n’abandu b’omo muyi ono, ni bugha ambu, abatalyakwa omo kihunzo, omo muyali, n’omo nzala, ngendihirabo omo byala by’omwami Nebukadneza* we Babiloni, omo byala by’esyonzighu syabo, n’omo byala by’abandu abakasonda eriitabo.* Akendisyitabo omo muyali. Syendisyabakwira obulighe, syendisyabaghanyira, kutse eriyowa muhanda busana nabo.”’
8 “Kandi utolere iwabwira abandu aba uti, ‘Yehova ati: “Ngahira embere syenyu enzira y’engebe n’enzira y’oluholo. 9 Abakendisyasighala omo muyi ono bakendisyakwa omo muyali, omo nzala, n’omo kihunzo. Aliwe abosi abakendisyalua mugho n’eriyihira omo byala by’Abakaldayo ababiritimba oko muyi wenyu batoke erilwa nenyu, abo sibendisyahola; bakendisyabalya engebe* yabo.”’
10 “‘“Kundi nabiriyisogha erileta omo muyi ono m’obuhanya butsira ekibuya,” Yehova atya. “Omuyi ono akendisyahirwa omo byala by’omwami we Babiloni, neryo akendisyahisyagho omo muliro.”
11 “‘Muhulikirire ekinywa kya Yehova, inywe b’omo kihanda ky’omwami we Yuda. 12 Inywe kihanda kya Daudi, Yehova ati:
“Mukole eritunganene obuli tututu,
Kandi mulwire oko mundu oyo ababandi balyapurako ebindu.
Bite bitya, ekinigha kyaghe ikikendyaka ng’omuliro
Kikendyaka ihatasungika oyukalimayakyo
Busana n’ebibi ebyo mukakola.”’
‘Nenyu inywe mukabugha muti: “Nindi yukendisyalwa netu?
Kandi nindi yukendisyingira omo bwikalo bwetu?”
14 Ngendisyabaha amalipizi ogho mutolere
Busana n’ebibi ebyo mwakola,’ Yehova atya.
‘Kandi ngendisyahira oko musitu wiwe k’omuliro,
N’omuliro oyo akendisyatimya ebyosi ebimutimbireko.’”