Yeremia
22 Yehova ati: “Uye eyiri enyumba y’omwami we Yuda, uyamubwire omwatsi ono. 2 Utolere iwamubwira uti, ‘Hulikirira ekinywa kya Yehova, iwe mwami we Yuda, iwe wikere oko kitumbi ky’obwami kya Daudi, iwe, abaghombe baghu, n’abandu abakalaba omo milango eyi. 3 Yehova ati: “Mukole ebyuwene n’ebitunganene. Mulwire oko mundu oyo ababandi balyapurako ebindu. Isimwatesa abagheni, kandi isimwaghalaya abana abatawite baba,* n’abakwa-kali. Kandi isimutira omo mwanya ono m’omusasi w’abandu abate n’ekosa. 4 Kundi mwamabikola ebyo ngababwira, abami abikere oko kitumbi ky’obwami kya Daudi ibakendisyingira omo milango y’enyumba eyi y’omwami, ibane omo mitoka n’oko syosabayiri,* haghuma n’abaghombe babo n’abandu babo.”’
5 “‘Aliwe mwamatendikola ebyo ngababwira,’ Yehova atya, ‘ngalapa omo rina ryaghe niti enyumba y’omwami eyi iyikendisyabya matongo.’
6 “Kundi Yehova akabugha oko nyumba y’omwami we Yuda ati:
‘Okw’ingye, uli nge Gileadi,
Uli ng’esingyi y’oko Kitwa kye Lebanoni.
Aliwe ngendisyakuyira mo mbwarara;
Sihali n’omughuma w’oko miyi yaghu owakendisyabyamo abandu.
7 Ngendisyakutumako abatsandya* batoke erilwa naghu
Obuli mughuma wa kubo iniane n’ebindu biwe by’amalwa.
Bakendisyakonda emiti yaghu y’emierezi eyuwene kutsibu
Kandi bakendisyatereryayo omo muliro.
8 “‘N’abandu b’omo bihanda binene bakendisyalaba hakuhi n’omuyi ono, neryo bakendisyabya bakabwirana bati: “Yehova mwakakolera omuyi munene ono watya busanaki?” 9 Neryo abandu bakendisyabasuribya bati: “Ni kundi mubatasikya endaghane ya Yehova oMungu wabo, bamakukamira eyindi miungu, n’erikolerayo.”’
10 Isimwalira oyulyahola,
Kandi isimwabya omo bulighe busana naye.
Aliwe mulire kutsibu busana n’oyukaghenda,
Kundi syendisyasyasuba omo kihugho ekyo abutirawamo, syendisyasyalangirakyo.
11 “Kundi bino byo Yehova akabugha oko Shalumu mughala wa Yosia, omwami we Yuda oyukatabala omo mwanya wa baba wiwe Yosia, kandi oyo walua omo mwanya ono: ‘Syendisyasuba hano, 12 kundi akendisyaholera omo kiharo ekyo atwalawamo omo bunyewa, kandi syendisyasyalola oko kihugho kino.’
13 Bulighe oko oyukahimba enyumba yiwe butsir’isikya ebitunganene
N’erihirako ebyumba by’endata butsir’isikya ebitunganene,
Oyukatumikisaya omulikyabo yo bule,
Iniatamuliha;
14 Oyukabugha ati: “Ngendiyihimbira enyumba nene
Eyirimo ebyumba by’endata binene-binene,
Ngendihirako amadirisa,
Inapambayo omo syombagho sy’emiti y’emierezi n’erihakako erangyi y’eruje.’
15 Ukalengekanaya uti ukendibya ighunemutabala kundi ukakolesaya emiti minene y’emierezi kulenga abandi?
Sindi baba waghu naye iniakalya n’erinywa,
Aliwe iye, iniakakola ebyuwene n’ebitunganene,
N’emyatsi yosi muyamughendera ndeke.
16 Mwalwira oko syombangwa sy’abakaghalibawa n’esy’abera,
Neryo emyatsi yosi muyamughendera ndeke.
‘Sighulangire ngoko erikola utya ry’eriniminya?’ Yehova atya.
17 ‘Aliwe iwe, ukabera erihira ameso waghu n’omutima waghu okw’iyironderya endundi omo bwibi,
Ok’uta omusasi w’abandu abate n’ekosa,
N’okw’iba abandi n’erinyegha ebindu byabo.’
18 “Neryo bino byo Yehova akabugha oko Yehoyakimu mughala wa Yosia, omwami we Yuda:
‘Sibendisyamulira bati:
“Ni mwatsi w’obulighe mughala wetu! Ni mwatsi w’obulighe mwali wetu!”
Sibendisyamulira bati:
“Ni mwatsi w’obulighe, mukama wetu! Ni mwatsi w’obulighe, iwe w’olukengerwa!”
19 Bakendisyamuta ngoko bakata epunda.
Bakendisyakurubana ekinda kiwe n’erighusakyo,
Ehihya w’emilango ye Yerusalema.’
20 Uhetukire e Lebanoni n’eribugha omo mulenge muli,
Ubughe omo mulenge muli e Bashani,
Kandi ubughe omo mulenge muli ighune e Abarimu,
Kundi abosi abakwanzire kutsibu babiritsutsangwa.
21 Munakania naghu omughulu wabya ukayowa buholo.
Aliwe muwabugha uti, ‘Sinendikwama ebyo ukabugha.’
Ko ukanayiwata utya eritsuka omo bulwana bwaghu.
Kundi muwatakwama omulenge waghe.
22 Ekihunga kikendisyaheka* abalisya baghu bosi,
N’abakwanzire kutsibu bakendisyaya omo bunyewa.
Neryo ukendisyakwa esisoni n’erihemulwa busana n’obuhanya bosi obukendisyakuhikira.
23 Iwe wikere e Lebanoni,
Iwe wabirihira olutu lwaghu omo miti y’emierezi,
Ukendisyasimba kutsibu omughulu ukendisyowa obulumi
Obulumi obuli ng’obo mukali oyunemubuta!”
24 “‘Oko kwenene-kwenene ngoko niriho,’ Yehova atya, ‘nomo Konia* mughala wa Yehoyakimu, omwami we Yuda, angabere embuka eyikakolesibawa erihira oko kindu kw’ekikumo eyo nimbite oko byala byaghe by’amali, nangalusirye yoho! 25 Ngendikuhira omo byala by’abakasonda erikwita,* omo byala by’obo ukasagha, omo byala by’omwami Nebukadneza* we Babiloni, n’omo byala by’Abakaldayo. 26 Kandi ngendikughusa, iwe na mama waghu oyo wakubuta, omo kindi kihugho ekyo watabutirawamo, n’eyo yo mukendisyaholera. 27 Kandi sibendisyasyasuba n’ekiro n’ekighuma omo kihugho ekyo bakakandira kutsibu.
28 Konia oyu si ni kindu ekipokirwe kandi ekitsutsangikire,
Ekyo mundu ate anganza eribya nakyo!
Busanaki iye n’abana biwe babirighuswa ahisi
N’erighuswa omo kihugho ekyo batasi?’
29 Iwe kihugho, kihugho, kihugho, hulikirira ekinywa kya Yehova.
30 Yehova ati:
‘Muhandike omundu oyo mo mundu oyutawite bana,
Mo mundu oyutewatatoka omwatsi wosi-wosi omo ngebe* yiwe,
Kundi sihali n’omughuma w’oko bana biwe oyukendisyatoka
Erikala oko kitumbi ky’obwami kya Daudi n’eritasyatabala e Yuda.’”