Yeremia

26 Oko mwanzo w’obutabali bwa Yehoyakimu mughala wa Yosia, omwami we Yuda, Yehova mwakania na Yeremia. Mwamubwira ati: 2 “Yehova ati, ‘Imana omo kibugha ky’enyumba ya Yehova, neryo ubughe emyatsi eyilebirye abandu bosi b’omo miyi ye Yuda abakasyaramiraya* omo nyumba ya Yehova. Ubabwire ebyosi ebyo ngakubwira niti ubabwire; isiwasigha n’ekinywa n’ekighuma. 3 Kwa muhwa bakendihulikirira, neryo obuli mughuma wa kubo inialeka emighendere yiwe mibi, neryo naghe ingendibindula amalengekania waghe* awalebirye obuhanya obo nilue ngasonda eribaletera busana n’emikolere yabo mibi. 4 Ubabwire uti: “Yehova ati, ‘Mutetanihulikirira omw’isikya emighambo* yaghe eyo nabaha, 5 omw’ihulikirira ebinywa by’abaghombe baghe abaminyereri, abo ngabatumako kangyi-kangyi,* abo mwatahulikirira, 6 neryo ingendiyira enyumba eyi nge Shilo, kandi ingendiyira omuyi ono mo kindu ekyo bihanda byosi by’oko kihugho bikendisyabya bikahula omughulu bikatakira.’”’”

7 Abahereri, abaminyereri, n’abandu bosi mubowa Yeremia akabugha ebinywa ebyo omo nyumba ya Yehova. 8 Neryo Yeremia mwabya abibugha eribugha ebinywa byosi ebyo Yehova abugha ati abwire abandu bosi, abahereri n’abaminyereri n’abandu bosi mubamuhamba n’erimubwira bati: “Ukendihola! 9 Busanaki mughukabugha obuminyereri omo rina rya Yehova uti, ‘Enyumba eno ikendibya nge Shilo, n’omuyi ono akenditsandibwa kandi simwendikala mundu’?” Neryo abandu bosi mubatimba oko Yeremia omo nyumba ya Yehova.

10 Abakulu be Yuda mubabya babyowa ebinywa ebyo, mubalua omo nyumba y’omwami, bamahetukira eyiri ehekalu ya Yehova, n’erikala oko bwingiriro bw’omulango muhya-muhya w’ehekalu ya Yehova. 11 Abahereri n’abaminyereri mubabwira abakulu n’abandu bosi bati: “Omulume oyu atolere iniakwa, kundi mwakabugha obuminyereri obutuwene oko muyi ono. Mumukayowirakyo omo matwi wenyu!”

12 Neryo Yeremia mwabwira abakulu bosi n’abandu bosi ati: “Ebinywa byosi by’obuminyereri ebyo mulyowa, Yehova yulyanituma ati nibughebyo oko nyumba eyi n’oko muyi oyu. 13 Neryo, musube oko mibere yenyu n’oko mighendere yenyu, kandi mukwame omulenge wa Yehova oMungu wenyu. Mwamabikola mutya, Yehova iniakendibindula amalengekania wiwe awalebirye obuhanya obo abugha ati akendibaletera. 14 Aliwe ingye y’ono. Munikolere ekyosi-kyosi ekyo mukalangira muti kyuwene kandi kitolere. 15 Aliwe muminye ngoko mwamabiniita, omusasi w’omundu oyute na kosa iniamabya omo byala byenyu, inywe, omuyi ono, n’abikalani bamo, kundi oko kwenene Yehova yulyanituma okw’inywe ati nibabwire ebinywa byosi ebyo mwamabyowa.”

16 Neryo abakulu n’abandu bosi mubabwira abahereri n’abaminyereri bati: “Omulume oyo syatolere eritibwa, kundi alyabugha netu omo rina rya Yehova, oMungu wetu.”

17 N’abasyakulu balebe b’omo kihugho mubahangana n’eribwira abandu bosi ababya ibahindene bati: 18 “Mika we Moresheti mwabya akabugha obuminyereri omughulu Hezekia omwami we Yuda abya akatabala. Mwabwira abandu bosi be Yuda ati: Yehova w’emilondo ati:

19 “Ekyo mukyanaleka omwami Hezekia we Yuda n’abandu bosi be Yuda ibamwita? Iyehe. Omwami mubaha Yehova n’erilemba-lemba Yehova ati amukanganaye olukogho,* neryo Yehova mwabindula amalengekania wiwe* awalebirye obuhanya obo abugha ati akendileterabo. Aliwe itwe, aho tukasonda eriyiletera* obuhanya bunene.

20 “Muhanabya n’oghundi mulume oyo wabya akabugha obuminyereri omo rina rya Yehova; omulume oyo abya Uriya mughala wa Shemaya, owe Kiriati-yearimu. Naye mwabugha ati obuhanya bukendihikira omuyi ono n’ekihugho kino, naye ebinywa biwe byabya ng’ebya Yeremia. 21 Omwami Yehoyakimu n’abalume biwe bosi b’amaka n’abakulu bosi mubowa ebyo abugha, n’omwami mwasonda erimwita. Uriya mwabya abyowa oko mwatsi oyo, mwalw’iniasagha n’eritibita e Misri. 22 Neryo omwami Yehoyakimu mwatuma e Misri yo Elnatani mughala wa Akbori haghuma n’abandi balume. 23 Mubalusya Uriya ye Misri n’erimuleta ahali omwami Yehoyakimu. Neryo omwami mwamwita omo muyali, amaghusa n’ekinda kiwe omo kimbaseke ky’abandu ba kawaida.”

24 Aliwe Ahikamu mughala wa Shafani mwalwira oko Yeremia. Neryo Yeremia mwatahirwa omo byala by’abandu ababya banzire erimwita.