Yeremia
27 Oko mwanzo w’obutabali bwa Yehoyakimu mughala wa Yosia, omwami we Yuda, Yehova mwakania na Yeremia. 2 Neryo Yeremia mwabugha ati: “Bino byo Yehova alyanibwira, ‘Uyikokoteraye esyokamba n’omuketo, neryo uhirebyo oko ngoto yaghu. 3 Enyuma sy’aho, utumirebyo omwami we Edomu, omwami we Moabu, omwami w’Abaamoni, omwami we Tiro, n’omwami we Sidoni. Ukendihekyabyo abatumwa abalyasa e Yerusalema bakasyabana Zedekia, omwami we Yuda. 4 Ukendibabwira uti bakendibwira abakama babo bati:
“‘“Yehova oMungu w’emilondo, oMungu we Israeli, ati; mutolere imwabwira abakama benyu muti: 5 ‘Ingye nahangyika ekihugho, abandu, n’esyonyama esiri oko kihugho omo kaghala kaghe kanene n’omo kuboko kwaghe kw’amaka;* kandi nabirihakyo oyo nanzire.* 6 Neryo lino, nabirihira ebihugho byosi ebi omo byala by’omughombe waghe Nebukadneza, omwami we Babiloni; nibya nabirimuha n’esyonyama sy’emoli sitoke erimukolera. 7 Ebihanda byosi bikendisyamukolera, iye, omughala wiwe, n’omwitsikulu wiwe, erihika omughulu ekihugho kiwe nakyo kikendisyatabalwa. Neryo ebihanda bingyi n’abami bakulu-bakulu bakendisyamuyira mo mukobe wabo.’
8 “‘“‘Hamabya ekihanda kutse obwami obukaghana erikolera omwami Nebukadneza we Babiloni kutse obukaghana erihira engoto yabo eyikwa w’omuketo w’omwami we Babiloni, ingendiha ekihanda ekyo ky’amalipizi omo muyali, omo nzala, n’omo kihunzo,* erihika oko kika nibabugheho erilabira ebyala bya Nebukadneza,’ Yehova atya.
9 “‘“‘Neryo isimwahulikirira abaminyereri benyu, abalaghuli benyu, abandu benyu abakalota, abakumu benyu, n’abaloyi benyu, abakabya ibanemubabwira bati: “Simwendisyakolera omwami we Babiloni.” 10 Kundi ebyo bakababwira ni mabehi; kundi mwamabihulikirirabo, imukenditwalwa hali oko kihugho kyenyu, kandi ingendibapanza-panza kandi imukendihwaho.
11 “‘“‘Aliwe ekihanda ekikendihira engoto yakyo eyikwa w’omuketo w’omwami we Babiloni n’erimukolera, ngendilekakyo omo kihugho kyakyo, kitoke erilimakyo n’erikala mukyo,’ Yehova atya.’”’”
12 Na Zedekia, omwami we Yuda, naye mungamubwira ebinywa bighumerera ebyo, niti: “Muhire esyongoto syenyu eyikwa w’omuketo w’omwami we Babiloni. Mumukolere, iye n’abandu biwe, neryo simwendihola. 13 Iwe n’abandu baghu, mukendiligha erihola omo muyali, omo nzala, n’omo kihunzo, ngoko Yehova anabugha oko kihanda ekitendikolera omwami we Babiloni? 14 Isimwahulikirira ebinywa by’abaminyereri abakababwira bati, ‘Simwendisyakolera omwami we Babiloni,’ kundi bakabateba.
15 “‘Kundi s’ingye natumabo,’ Yehova atya, ‘aliwe bakabugha obuminyereri bw’amabehi omo rina ryaghe. Mwamabihulikirirabo, ingendibapanza-panza kandi imukendihwaho, inywe n’abaminyereri abakababwira obuminyereri.’”
16 Kandi munabwira abahereri n’abandu bosi aba niti: “Yehova ati, ‘Isimwahulikirira ebinywa by’abaminyereri benyu abakababwira obuminyereri, bati: “Ebindu by’omo nyumba ya Yehova bikendilusibwa e Babiloni yo luba!” kundi bakabateba. 17 Isimwabahulikirira. Mukolere omwami we Babiloni, neryo simwendihola. Mukendiligha muti omuyi ono abye bisambukalirya? 18 Aliwe bamabya kwenene ini baminyereri kandi ebyo bakabugha byamabya kwenene ibikalua oko Yehova, balembe-lembe Yehova w’emilondo bati ebindu ebikiri omo nyumba ya Yehova, omo nyumba y’omwami we Yuda, ne Yerusalema isibyatwalawa e Babiloni.’
19 “Kundi bino byo Yehova w’emilondo akabugha oko syonduyi, oko Ngetse,* oko syongurubani, n’oko bindu ebiryasighalira ebikiri omo muyi ono, 20 ebyo omwami Nebukadneza we Babiloni ataheka omughulu atwala omo bunyewa mo Yekonia mughala wa Yehoyakimu, omwami we Yuda, akamulusya e Yerusalema n’erimutwala e Babiloni, haghuma n’esyoseghu-seghu syosi sye Yuda n’esye Yerusalema; 21 inga, bino byo Yehova w’emilondo, oMungu we Israeli akabugha oko bindu ebyasighala omo nyumba ya Yehova, omo nyumba y’omwami we Yuda, n’omo Yerusalema: 22 ‘“Bikendisyatwalwa e Babiloni, n’eyo yo bikendisyabya erihika omughulu ngendisyalengekania kubyo,” Yehova atya. “N’enyuma sy’aho, ngendisyasubulyabyo n’erisubyabyo omo mwanya ono.”’”