Yeremia
28 Oko mwaka mughumerera oyo, oko mwanzo w’obutabali bwa Zedekia omwami we Yuda, oko mwaka w’akani, oko mwisi w’akatano, omuminyereri Hanania mughala wa Azuri owe Gibeoni mwanibwirira omo nyumba ya Yehova embere sy’abahereri n’embere sy’abandu bosi ati: 2 “Yehova w’emilondo, oMungu we Israeli, ati, ‘Ngenditwa omuketo w’omwami we Babiloni. 3 Omo myaka ibiri,* ngendisubya omo mwanya ono mw’ebindu byosi by’omo nyumba ya Yehova ebyo omwami Nebukadneza we Babiloni alusaya omo mwanya ono n’eribitwala e Babiloni.’” 4 “‘Kandi ngendisubya omo mwanya ono mo Yekonia mughala wa Yehoyakimu, omwami we Yuda, n’abandu bosi be Yuda abatwalawa omo bunyewa mwe Babiloni,’ Yehova atya, ‘kundi ngenditwa omuketo w’omwami we Babiloni.’”
5 Neryo omuminyereri Yeremia mwakania n’omuminyereri Hanania embere sy’abahereri n’abandu bosi ababya bimene omo nyumba ya Yehova. 6 Omuminyereri Yeremia mwabugha ati: “Amina!* Yehova akole atya! Yehova aberereraye ebinywa by’obuminyereri bwaghu omw’isubya omo mwanya ono mw’ebindu by’omo nyumba ya Yehova n’abandu bosi abatwalawa omo bunyewa abali e Babiloni! 7 Aliwe, kisi hulikirira ebinywa ebi ebyo ngakubwira, iwe n’abandu bosi. 8 Kera, abaminyereri ababyaho embere syaghe n’embere syaghu ibakabya ibane mubugha obuminyereri oko bihanda bingyi n’oko mami manene-manene, oko malwa, oko buhanya, n’oko kihunzo.* 9 Omuminyereri amabibugha obuminyereri obukakanganaya ngoko hakendibya obuholo, neryo ebinywa biwe ibyabererera, aho abandu ibakendiminya ngoko oko kwenene-kwenene Yehova yulyatuma omuminyereri oyo.”
10 Neryo omuminyereri Hanania mwimya omuketo owabya oko ngoto y’omuminyereri Yeremia, amatwagho. 11 Enyuma sy’aho, Hanania mwabughira embere sy’abandu bosi ati: “Yehova ati, ‘Omo myaka ibiri, ko ninemwenditwa nitya omuketo ogho omwami Nebukadneza we Babiloni abirihira oko ngoto y’ebihanda byosi.’” Neryo omuminyereri Yeremia mwayighendera.
12 Omuminyereri Hanania mwabya abitwa omuketo w’omuti owabya oko ngoto y’omuminyereri Yeremia, Yehova mwabwira Yeremia ati: 13 “Ghenda, uyabwire Hanania uti, ‘Yehova ati: “Si wamabitwa omuketo w’omuti, aliwe omo mwanya w’omuketo oyo w’omuti, iwe ukendikokotya omuketo w’ekyuma.” 14 Kundi Yehova w’emilondo, oMungu we Israeli, ati: “Ngendihira omuketo w’ekyuma oko ngoto y’ebihanda byosi ebi, bitoke erikolera omwami Nebukadneza we Babiloni, kandi bighane kutse bilighe, bikendimukolera tu. Nibya nabirimuha n’esyonyama sy’emoli.”’”
15 Neryo omuminyereri Yeremia mwabwira omuminyereri Hanania ati: “Hulikirira kisi! Yehova syetakutuma, aliwe wabirileka abandu aba ibikirirya amabehi. 16 Busana n’ekyo, Yehova ati: ‘Ngakulusaya oko kihugho. Ukendihola oko mwaka ono, kundi mughukaleka abandu ibaghana erikwama Yehova.’”
17 Neryo omuminyereri Hanania mwahola oko mwisi we 7 w’omwaka oyo.