Yeremia
39 Omo mwisi we 10 w’oko mwaka we 9 w’obutabali bw’omwami Zedekia we Yuda, omwami Nebukadneza* we Babiloni n’abasuda biwe bosi mubasyatimba oko muyi we Yerusalema batoke erilwa nagho.
2 Ekiro kye 9 ky’omwisi w’akani, omo mwaka we 11 w’obutabali bwa Zedekia, mubatobola ekitobo ky’omo luhimbo lw’omuyi. 3 Neryo abakulu bosi b’omo butabali bw’omwami we Babiloni mubingira omo muyi n’eriyikala omo Lukyo lw’Omo Kati-kati. Habya Nergali-sharezeri Omusamgari, Nebosarsekimu Omurabsari,* Nergali-sharezeri Omurabmagi,* n’abandi bakulu bosi b’omo butabali bw’omwami we Babiloni.
4 Omwami Zedekia we Yuda n’abasuda biwe bosi mubabya babilangirabo, mubatibita, bamalua omo muyi m’omo kiro, bamalaba omo nzira eyilabire omo ririma ry’omwami, bamalaba omo mulango owali omo kati-kati k’esyombimbo ibiri, bamalolera e Araba. 5 Aliwe abasuda Bakaldayo mubakwamirirabo, bamayahambira Zedekia omo ribanda eriri ng’embwarara rye Yeriko. Mubamuhamba, neryo bamamutwala eyiri omwami Nebukadneza* we Babiloni, e Ribla, omo kiharo kye Hamati. Eyo y’omwami amutswerera. 6 Omwami we Babiloni mwabugha ati bakere abana ba Zedekia e Ribla, Zedekia inianalangire, kandi omwami we Babiloni mwabugha ati bakere esyoseghu-seghu syosi sye Yuda. 7 Enyuma sy’aho, mwayira Zedekia mo ndime-time, n’enyuma sy’aho amamuboha omo minyororo* y’ekwivre,* n’erimutwala e Babiloni.
8 Enyuma sy’aho, Abakaldayo mubahisya enyumba y’omwami n’amanyumba w’abandu, kandi mubahimbula n’esyombimbo sye Yerusalema. 9 Abandu abasighalira omo muyi, abandu abatswa ababya ibabiriyighunga naye n’abandi bandu bosi, Nebuzaradani, omukulu w’abateya, mwatwalabo omo bunyewa mwe Babiloni.
10 Aliwe Nebuzaradani omukulu w’abateya mwasigha omo kihugho kye Yuda mw’abandu balebe ababya bera kutsibu, ababya isibawite oko kindu. Ekiro ekyo, mwahabo amalima w’emizabibu n’awandi malima w’erilima.*
11 Nikwa omwami Nebukadneza* we Babiloni mwabwira Nebuzaradani, omukulu w’abateya, ebyo akolere Yeremia. Mwamubwira ati: 12 “Uyamurondaye n’erimuteya. Isiwamuyira kindu, kandi umuhe ekyosi-kyosi ekyo akendikusaba.”
13 Neryo Nebuzaradani, omukulu w’abateya, Nebushazbani Omurabsari,* Nergali-sharezeri Omurabmagi,* n’esyoseghu-seghu syosi esikakolera omwami we Babiloni musyatuma abandu 14 bayalusaye Yeremia omo Kibugha ky’Abateya. Mubamuhira omo byala bya Gedalia mughala wa Ahikamu, mughala wa Shafani, atoke erimutwala omo nyumba yiwe. Yeremia kw’ikala atya omo bandu.
15 Omughulu Yeremia abya aboherwe omo Kibugha ky’Abateya, Yehova mwakania naye, amamubwira ati: 16 “Ghenda, uyabwire Ebedi-meleki Omuetopia uti, ‘Yehova w’emilondo, oMungu we Israeli, ati: “Ngendiberererya ebinywa ebyo nabugha oko muyi ono: Akendihikirwa n’obuhanya, syendihikirwa n’ekibuya. Ekiro ekyo, ukendisyayilangirira omwatsi oyo akabya.”’
17 “‘Aliwe ngendisyakusabula omo kiro ekyo,’ Yehova atya, ‘siwendisyahirwa omo byala by’abo ukasagha.’
18 “‘Kundi oko kwenene, ngendisyakubalya, kandi siwendisyakwa omo muyali. Ukendisyabalya engebe* yaghu, kundi muwayiketera ingye,’ Yehova atya.”