Yeremia
40 Nebuzaradani omukulu w’abateya mwabya abileka Yeremia aye e Rama, Yehova mwakania na Yeremia. Nebuzaradani abya iniabirileta Yeremia omo muyi oyo, inianabohirwe omo byuma by’eribohamo ebyala. Kandi Yeremia abya omo kati-kati k’abanyewa bosi be Yerusalema n’abe Yuda ababya bakatwalwa omo bunyewa mwe Babiloni. 2 Neryo omukulu w’abateya mwahengeka Yeremia, amamubwira ati: “Yehova oMungu waghu yo wabugha ati obuhanya obu bukendihikira omwanya ono. 3 Kandi Yehova yulyaleta obuhanya obo, ngoko anabugha, kundi mwabirikolera Yehova y’erilolo, kandi mumutakwama omulenge wiwe. Kyo kyamaleka ebi ibyabahikira. 4 Munabwire ngendikulusyako ebyuma by’eribohamo ebyala. Twanganaghenda naghu e Babiloni wamabya ighunanzire eriyayo. Ngendikusulubirira. Aliwe wamabya isiwanzire eriya naghe e Babiloni, iwaleka. Lebaya ekihugho kyosi eki, wanganikala oho wanzire.”
5 Yeremia iniakinatika-tika, Nebuzaradani mwamubwira ati: “Suba eyiri Gedalia mughala wa Ahikamu, mughala wa Shafani, oyo mwami we Babiloni abiriyira mo mwimaniri w’emiyi ye Yuda, neryo usighale hakuhi naye omo kati-kati k’abandu; kutse uye ahosi-hosi oho wanzire.”
Omukulu w’abateya mwamuha akalyo n’ekihembo, n’enyuma sy’aho amamuleka aghende. 6 Neryo Yeremia mwaya e Mizpa eyiri Gedalia mughala wa Ahikamu, mwasighala hakuhi na Gedalia omo kati-kati k’abandu abasighala omo kihugho.
7 Enyuma sy’aho, abakulu bosi b’abasuda ababya omo kisuki haghuma n’abasuda babo, mubowa ngoko omwami we Babiloni abiriyira Gedalia mughala wa Ahikamu mo mwimaniri w’ekihugho, kandi ngoko abirimuyira mo mwimaniri w’abera b’omo kihugho abatatwalawa omo bunyewa mwe Babiloni, ni bugha ambu, abalume, abakali, n’abana. 8 Neryo mubasyasungana na Gedalia e Mizpa. Habya Ismaeli mughala wa Netania, Yohanani, na Yonatani, abaghala ba Karea, Seraya mughala wa Tanumeti, abaghala ba Efai Omunetofati, na Yezania mughala wa Maakati, ibo haghuma n’abasuda babo. 9 Gedalia mughala wa Ahikamu, mughala wa Shafani, mwalapira abakulu abo n’abasuda babo ati: “Isimwasagha erikolera Abakaldayo. Mwikale omo kihugho n’erikolera omwami we Babiloni, n’emyatsi yosi ikendibaghendera ndeke. 10 Ingye, ngendisighala e Mizpa nitoke eribya ngababughira oko Bakaldayo* babyasa. Aliwe inywe mukendibya mukakokotya edivai, mukendibya mukoha amatunda w’oko mughulu w’ekipwa* n’eryenga amaghuta, n’erihirabyo omo malegha wenyu. Mukendikala omo miyi eyo mwabirimya.”
11 Abayahudi bosi ababya e Moabu, Amoni, ne Edomu, n’ababya omo bindi bihugho byosi, nabo mubowa ngoko omwami we Babiloni mwakasigha abandu balebe be Yuda, kandi ngoko abiriyira Gedalia mughala wa Ahikamu, mughala wa Shafani mo mwimaniri wabo. 12 Neryo Abayahudi bosi mubatsuka erilua omo myanya yosi eyo bapanza-panzirawamo. Mubahika omo kihugho kye Yuda, eyiri Gedalia, e Mizpa. Neryo mubabya bakakokotya edivai nene kutsibu n’eryoha amatunda manene kutsibu w’oko mughulu w’ekipwa.*
13 Aliwe Yohanani mughala wa Karea n’abakulu bosi b’abasuda ababya omo kisuki mubayasungana na Gedalia e Mizpa. 14 Mubamubwira bati: “Unasi ngoko Baalisi, omwami w’Abamoni, abirituma Ismaeli mughala wa Netania ati asyakwite?”* Aliwe Gedalia mughala wa Ahikamu mwatikirirya ebyo babugha.
15 Neryo Yohanani mughala wa Karea mwabwira Gedalia omo bubiso-biso e Mizpa ati: “Nanzire inayita Ismaeli mughala wa Netania, sihali oyukendiminya. Ukendiligha uti tu akwite?* Siwasi ngoko ekyo kyanganaleka abikalani bosi be Yuda ababiriyighunga okw’iwe ibapanzwa-panzwa? Wanzire ibahola?” 16 Aliwe Gedalia mughala wa Ahikamu mwasubirya Yohanani mughala wa Karea ati: “Isiwakola ekyo, kundi ebyo ukabugha oko Ismaeli ni mabehi.”