Yeremia
41 Omo mwisi we 7, Ismaeli mughala wa Netania, mughala wa Elishama, oyo wabya w’omo kihanda ky’abami, kandi oyo wabya mughuma w’oko syoseghu-seghu esyabya sikakolera omwami mwaya e Mizpa haghuma n’abandi balume 10 batoke eriyasungana na Gedalia mughala wa Ahikamu. Ibanemulira akalyo ko haghuma e Mizpa, 2 Ismaeli mughala wa Netania n’abandi balume 10 ababya haghuma naye mubahangana, bamita Gedalia mughala wa Ahikamu, mughala wa Shafani omo muyali. Ismaeli kw’ita atya omulume oyo omwami we Babiloni ayira mo mwimaniri w’ekihugho. 3 Ismaeli mwita n’Abayahudi bosi ababya haghuma na Gedalia e Mizpa, mwita n’abasuda Bakaldayo ababyayo.
4 Ekiro ky’akabiri, Gedalia abitibwa, isihehabya oyukaminya oko mwatsi oyo, 5 abandu 80 mubahika bakalua e Shekemu, e Shilo, ne Samaria. Babya ibabiritwa esyonderu syabo, babya bambite esyongyimba esitulangikire, kandi babya ibabirisara-sara emibiri yabo. Babya n’ebihembo by’akalyo n’obubani ebyo babyabakaleta omo nyumba ya Yehova. 6 Neryo Ismaeli mughala wa Netania mwalua e Mizpa akayahindana nabo. Abya akaghenda inianemulira. Mwabya abihika oho bali, mwababwira ati: “Mwase muyasunge Gedalia mughala wa Ahikamu.” 7 Aliwe babere babingira omo muyi, Ismaeli mughala wa Netania n’abalume biwe mubitabo n’erighusabo omo kyuna ky’amaghetse.
8 Aliwe abalume 10 b’omo balume abo mubabwira Ismaeli bati: “Isiwatwita, kundi twabiribisa emoli y’engano, ekisusu, amaghuta, n’obuki.” Neryo Ismaeli mwatitabo, ibo n’abalikyabo. 9 Aliwe Ismaeli mwaghusa ebinda byosi by’abalume abo alita omo kyuna kinene ky’amaghetse, ekyo mwami Asa atakula busana n’omwami Baasha we Israeli. Ekyuna ekyo kyo Ismaeli mughala wa Netania alundamo ebinda.
10 Ismaeli mwahamba abandu bosi abasighala e Mizpa. Omw’ibo mwabya n’abali b’omwami n’abandu bosi abasighala e Mizpa abo Nebuzaradani omukulu w’abateya asighira Gedalia mughala wa Ahikamu. Ismaeli mughala wa Netania mwabohabo, neryo amaya ewa Baamoni.
11 Omughulu Yohanani mughala wa Karea n’abakulu bosi b’abasuda ababya haghuma naye bowa emyatsi yosi eyituwene eyo Ismaeli mughala wa Netania akola, 12 mubaghenda haghuma n’abasuda babo bosi bakayalwa na Ismaeli mughala wa Netania. Mubayamweya hakuhi n’amaghetse manene* we Gibeoni.
13 Abandu bosi ababya haghuma na Ismaeli mubatsema bakalangira Yohanani mughala wa Karea iniane n’abakulu bosi b’abasuda. 14 Neryo abandu bosi abo Ismaeli abohera e Mizpa mubabinduka, bamaghenda haghuma na Yohanani mughala wa Karea. 15 Aliwe Ismaeli mughala wa Netania n’abalume 8 b’oko balume biwe mubatswa oko Yohanani n’eriya ewa Baamoni.
16 Yohanani mughala wa Karea n’abakulu bosi b’abasuda ababya haghuma naye mubaghenda haghuma n’abandu abasighala e Mizpa, ni bugha ambu, abandu abo balusaya oko Ismaeli mughala wa Netania abita Gedalia mughala wa Ahikamu. Mubasuba e Gibeoni haghuma n’abalume, abasuda, abakali, abana, n’abakulu abakakolera oko bwikalo bw’omwami. 17 Mubayaluhukira omo mwanya w’eripangamo we Kimamu, hakuhi ne Betlehemu, kundi babya ibanzire eriya e Misri 18 busana n’erisagha Abakaldayo. Babya ibabirisaghabo kundi Ismaeli mughala wa Netania mwita Gedalia mughala wa Ahikamu, oyo mwami we Babiloni ayira mo mwimaniri w’ekihugho.